Read Nzema Mrɛ 21 Bible Online

Mrɛ 21 - Nzema bible

Mrɛ 21

¹Belemgbunli biala adwenle le kɛ azudenle wɔ Ɛdɛnkɛma asa anu; ɛleka mɔɔ ɔkulo la yɛɛ ɔmaa ɔse ɔdua a.

²Sonla adenle biala le kpalɛ wɔ ɔ nye zo, na Ɛdɛnkɛma, yemɔ ɔnea ahonle nu.

³Tenlene ɛbɛla nee pɛlepɛlelilɛ sɔ Ɛdɛnkɛma anye kpalɛ tɛla azubɔlɛ.

⁴Adubɛnwo nee mgbanyizonle ɛyɛlɛ le amumuyɛnli kɛnlaneɛ, yɛɛ bɛle ɛtane.

⁵Sonla mɔɔ anye bolo ye gyima nwo la adwenle ngyehyɛlɛ maa ɔnyia aleɛ dɔɔnwo, na sonla mɔɔ pe yɛ debie la ɛnnyia ɛhwee.

⁶Sonla mɔɔ fa adalɛ nyia anwonyia la gya le kɛ kpukpuke, yɛɛ ɔle ewule ɛhane ɔmaa ye.

⁷Amumuyɛma konle ɛhulolɛ bahu bɛdabɛ mumua ne, ɔboalekɛ bɛkpo kɛ bɛnrɛli boɛ.

⁸Sonla mɔɔ di fɔlɛ la adenle kyeɛhyea, na mɔɔ anwo te la nyɛleɛ le fɔɔnwo.

⁹Ɔle kpalɛ kɛ sonla kɛdɛnla anwuma ekpumgbunli kodoka bie anu tɛla kɛ ɔ nee raalɛ mɔɔ kulo butule la kɛdɛnla sua ko anu.

¹⁰Amumuyɛnli biala kulo ɛtanelilɛ; ɔnze agɔnwolɛ bɔbɔ anwunvɔne.

¹¹Saa bɛtea agolobɛnwonli a, mɔɔ ɛnlɛ adwenle la sukoa nrɛlɛbɛ; saa bɛtu nrɛlɛbɛvolɛ folɛ a ye adwenle nu buke.

¹²Tenlenenli Ko Ne nwu mɔɔ ɛlɛkɔ zolɛ wɔ amumuyɛma sua nu la na ɔsɛkye bɛ.

¹³Sonla mɔɔ ehyianvolɛma su fɛlɛ ye a ɔtuodua ɔ nzo la, kenle bie ɔdaye ɔbazu na awie ɛnrɛdɛne ye zo.

¹⁴Fealera nu ahyɛlɛdeɛ maa ɛya dwo, na ndoloboa mɔɔ bɛsoa ye bɛ kɛnra azo la ka ɛya kpole.

¹⁵Saa pɛlepɛle yɛ gyima a, mɔɔ di boɛ la anye die, na amumuyɛma arɛle bɔ.

¹⁶Sonla mɔɔ twe ɔ nwo fi ndelebɛbo adenle nu la die ye ɛnwomenle wɔ mɔwuamra avinli.

¹⁷Sonla mɔɔ kulo anyelielɛ la bali ehyia, yɛɛ mɔɔ kulo nwanye nee nwole la ɛnrɛnyia ɔ nwo.

¹⁸Amumuyɛnli le tenlenenli ɛkpɔnedeɛ, yɛɛ mɔɔ ɛnlɛ diedi la le sonla mɔɔ di boɛ la ɛkpɔnedeɛ.

¹⁹Ɔle kpalɛ kɛ sonla kɛdɛnla ɛsɛlɛ zo tɛla kɛ ɔ nee raalɛ mɔɔ di butule na ɔ kunlu ɛndwo ɔ nwo la kɛdɛnla.

²⁰Gyadeɛ mɔɔ sonle bolɛ la kyɛ nrɛlɛbɛvolɛ sua nu, koasea asa ka ye a ɔsɛkye ye.

²¹Sonla mɔɔ di tenleneyɛlɛ nee kpalɛyɛlɛ nzi la banyia ngoane, yeanyia ɔ nyunlu.

²²Nrɛlɛbɛvolɛ to katakyiema suakpole sɔ nea, na ɔgologolo bɛ aranemgbole mɔɔ bɛva bɛ rɛle bɛzɔ ye la ɔgua.

²³Sonla mɔɔ ka ɔ nloa to nu na ɔndendɛ dɔɔnwo la twe ɔ nwo fi ngyegyelɛ nu.

²⁴Sonla mɔɔ memaa ɔ nwo zo, tu ɔ nloa anu, na ɔyɛ ye debie adubɛnwo nu la, ye duma a le “Agolobɛnwo!”

²⁵Sonla mgbovonle atiakunluwɔzo a ku ye a, ɔluakɛ ɔkpo kɛ ɔnrɛyɛ gyima.

²⁶Anyebolo tɔ amumuyɛnli anwo alehyenlɛ ne anu amuala, na tenlenenli ɛdeɛ, ɔbuke ɔ sa nu, yɛɛ ɔbuke ye ahonle nu ɔfa ɔmaa.

²⁷Amumuyɛnli azubɔlɛ le Nyamenle kyibadeɛ, na saa akee ɔfa adwenle ɛtane ɔbɔ azu a ɛnee kɛ ɔde ɛ?

²⁸Sonla mɔɔ di adalɛ daselɛ la ɛnrɛhyɛ, na mɔɔ te na yeabua la bagyinla kpundii.

²⁹Sonla mɔɔ le amumuyɛ la yɛ ɔ nwo kɛ ɔle sonlakpole, na sonla mɔɔ di boɛ la dwenle ye adenle nu boɛ.

³⁰Nrɛlɛbɛ, ndelebɛbo, yɛɛ folɛdulɛ biala ɛnle ɛkɛ mɔɔ kola gyinla Ɛdɛnkɛma anyunlu a.

³¹Bɛsiezie ɛkpɔnwɔ bɛkendɛ konle kenle ne, na konimlilɛ ne le Ɛdɛnkɛma ɛdeɛ.