Read Nzema Mrɛ 22 Bible Online

Mrɛ 22 - Nzema bible

Mrɛ 22

¹Dumamɔlɛ kpalɛ le kpalɛ tɛla anwonyia, yɛɛ anyenzɔlɛ le kpalɛ tɛla dwɛtɛ fufule anzɛɛ ezukoa nvutuke.

²Sukoavolɛma nee ehyianvolɛma bɔ nu yia; Ɛdɛnkɛma a bɔle bɛ muala a.

³Sonla mɔɔ anye gyi ɔ ti anwo la nwu munzule na ɔtwe ɔ nwo ɔfea, na mɔɔ ɛnlɛ adwenle la kɔtɔ nu na ɔnwu amaneɛ.

⁴Mɛlɛbɛnwoaze nee Ɛdɛnkɛma ɛzulolɛ nwo ahatualɛ a le anwonyia, enililɛ, yɛɛ ngoane.

⁵Mbowule nee ngane wɔ sonla mɔɔ ɛnle kpalɛ la adenle nu; sonla mɔɔ sinza ɔ nwo la ɛnrɛbikye nwolɛ.

⁶Tete kakula wɔ adenle mɔɔ ɔwɔ kɛ ɔfa zo la anu na saa ɔnyi a ɔnrɛvi zolɛ.

⁷Sukoavolɛ sie ehyianli, yɛɛ mɔɔ biza bosea la le sonla mɔɔ bɔ ye bosea la kanranli.

⁸Sonla mɔɔ dua ndunlumi la babu munzule, na ye ɛya empele ne badɔ aze.

⁹Sonla mɔɔ asa do la banyia nyilalɛ, ɔluakɛ ɔ nee ehyianvolɛma kyɛ ye aleɛ.

¹⁰Foa agolobɛnwonli ne fi ɛ nwo, na ɛbanwu kɛ manzonle bawie, yɛɛ butule nee aholoba ɛbɔlɛ bo bagua.

¹¹Sonla mɔɔ kulo ahonle mɔɔ anu te, na ye ɛdendɛlɛ yɛ fɛ la bayɛ belemgbunli ne agɔnwo.

¹²Ɛdɛnkɛma anye wɔ sonla mɔɔ lɛ adwenle la anwo zo, na ɔfuandi mɔɔ le adalɛ la edwɛkɛ ɔgua.

¹³Mgbovonle sonla edwɛkɛ a le kɛ, “Awenade la gua ne azo, ɔkɛhu me!”

¹⁴Raalɛ mɔɔ le mgbane la anloa le kuma belemele; nrenya mɔɔ Ɛdɛnkɛma ɛva ɔ nwo ɛya la badɔ nu.

¹⁵Ngoaseade yɛ kakula biala fɛ, na ndeanlɛ baka ne maa ye ngoaseade ne fi ɔ nwo.

¹⁶Sonla mɔɔ sisi ehyianli fa nyia ɔ nwo, anzɛɛ mɔɔ ɔnyia ye a ɔfa ɔmaa sukoavolɛ la bali ehyia.

¹⁷Tie nrɛlɛbɛ edwɛkɛ na fa wɔ adwenle kɔ me adwenlenubukelɛ ngilehilelɛ zo,

¹⁸ɔluakɛ saa ɛfa ɛsie na dahuu ɔla ɛ nloa a, ɔbayɛ kpalɛ yeamaa wɔ.

¹⁹Meha mehile wɔ ɛnɛ, ɛdawɔ ala, amaa wɔava ɛ rɛle wɔawula Ɛdɛnkɛma anu.

²⁰Mehɛlɛ edwɛkɛ abulasa mɔɔ kɔ adwenle nu na ɔhyia ndwenlenwo la memaa wɔ,

²¹mehile wɔ mɔɔ le kpalɛ nee mɔɔ le nɔhalɛ la, amaa saa menli soa wɔ a wɔava mualɛ mɔɔ le nɔhalɛ la wɔarɛlɛ bɛ.

²²Mmawua ehyianli na ɔyɛ anwunvɔne, anzɛɛ mmamia mɔɔ ɛnyia edwɛkɛ na ɔgyi bagua nu la,

²³ɔluakɛ Ɛdɛnkɛma bali ye edwɛkɛ amaa ye na yeazɛkye bɛdabɛ mɔɔ bɛsɛkye menli mɔɔ ehyia la ɛbɛlabɔlɛ la.

²⁴Mmafa sonla mɔɔ ye ahonle bikye ye la agɔnwolɛ, yɛɛ ɛ nee sonla mɔɔ fa ɛya mgbane mgbane la mmatu,

²⁵anrɛɛ ɛkɛva ɔ gyakɛ na ɛkɛva ɛ nwo ɛkɛdo ɛhane nu.

²⁶Mmadi awie mɔɔ tua kakɛ la agyinlanu, ɛbɔ ɛwɔkɛ kɛ ɛbadua.

²⁷Saa wɔangola ye tua a, bɛbalie ɛ nwo ninyɛne na bɛaye ɛ bo ɛkpa bɔbɔ.

²⁸Mmatu ɛweɛne mɔɔ ɛ nlenya mɔ ɛkpɔnla la.

²⁹Ɛze sonla mɔɔ asa anloa adwinli le kɛnlɛma la ɔ? Ɔbagyinla arelemgbunli nyunlu; ɔnrɛgyinla menli mɔɔ awie ɛmbu bɛ bie la anyunlu.