Read Nzema Mrɛ 23 Bible Online

Mrɛ 23 - Nzema bible

Mrɛ 23

¹Saa ɛtɛnla aze kɛ ɛ nee kpanyinli bie di debie a, nea ahenle mɔɔ ɛ nee ye ɛlɛdi aleɛ ne la kpalɛ;

²saa kanza ɛ kɔmenzia ɛlɛme bɔbɔ a, sɔ ɛ nwo.

³Mmamaa ɛ nye bolo aleɛ sosɔɔ ne mɔɔ yeva yezie ɛ nyunlu ɛkɛ ne la, ɔkɛyɛ kɛ ɔfa yeazɔ wɔ yeanlea.

⁴Mmapele kɛ ɛkɛnyia ɛ nwo, bɔ mɔdenle sɔ ɛ nwo,

⁵ɔluakɛ ezukoa lɛ ndɛbalɛ; ɔkola ɔtu arɛlevilɛ nu kɛ kɔleɛ ɔminliminli ɛ nye zo.

⁶Mmadi sonla mɔɔ le abolɛ la aleɛ; mmamaa ɛ nye bolo ye aleɛ sosɔɔ ne,

⁷ɔluakɛ ɔbaha yeahile wɔ bɔbɔ kɛ, “Di debie, no nza ne bie!” noko tɛ ɔ kunlu anu ɔ; ɔlɛsese mɔɔ ɛlɛdi la amuala.

⁸Ye mekɛ dwu a ɛbave mɔɔ wɔli la amuala, yeamaa wɔ edwɛkɛ ngɛnlɛma ne ayɛ mgbane.

⁹Mmaka nrɛlɛbɛ edwɛkɛ ɛkile koasea, ɔluakɛ ɔnrɛva wɔ edwɛkɛ ne ɔnrɛyɛ ɛhwee.

¹⁰Mmatu ɛweɛne dɛba ɛfi ɔ bo zo ne ɛlɛ anzɛɛ mmasa menli mɔɔ ɛnlɛ bɛ ze mɔ la ɛdie bɛ ɛya,

¹¹ɔluakɛ bɛ kpɔnevolɛ ne anwo yɛ se kpalɛ, yɛɛ ɔbali bɛ edwɛkɛ yeamaa bɛ.

¹²Fa wɔ adwenle kɔ mɔɔ bɛkilehile wɔ la azo na maa ɛ nzo ɛhɔ edwɛkɛ mɔɔ buke adwenle nu la azo.

¹³Kakula yɛ ɛtane a tea ye; ɛbo ye a ɔnwu.

¹⁴Saa ɛbila ye empele a, ɛbalie ye ngoane wɔavi ɛbolɔ.

¹⁵Me ra nrenya, saa ɛnwu nrɛlɛbɛ a, ɔbayɛ me fɛ.

¹⁶Saa mete kɛ ɛka nrɛlɛbɛ edwɛkɛ a me nye balie somaa.

¹⁷Mmamaa ɛ nye bolo menli mɔɔ di ɛtane la; kɔ zolɛ sulo Ɛdɛnkɛma alehyenlɛ biala.

¹⁸Nɔhalɛ, alehyenlɛ tɛba yɛɛ wɔ anyelazo ɛnrɛyɛ gyɛne.

¹⁹Me ra nrenya, tie, nwu nrɛlɛbɛ na dwenle wɔ ɛbɛlabɔlɛ nwo.

²⁰Ɛ nee nzabovoma mmatu, yɛɛ ɛ nee aleɛmgbolema mmadua,

²¹ɔluakɛ nzabovoma nee aleɛmgbolema bali ehyia, yɛɛ nafelɛ mgbole maa sonla keda avuazinli.

²²Tie ɛ ze mɔɔ wole wɔ la edwɛkɛ, yɛɛ ɛ nli yɛ ɛrelera a, mmakpo ye.

²³Su ezukoa tɔ nɔhalɛ, nrɛlɛbɛ, ngilehilelɛ, yɛɛ ndelebɛbo; mmatɔne bie.

²⁴Tenlenenli ɔ ze anye balie kpole, yɛɛ mɔɔ kɛwo kakula nrenya nrɛlɛbɛvolɛ la bali fɛlɛko.

²⁵Maa ɛ ze nee ɛ nli ɛli fɛlɛko; maa raalɛ ne mɔɔ wole wɔ la anye ɛlie.

²⁶Me ra nrenya, fa wɔ ahonle maa me, na fa me gyakɛ,

²⁷ɔluakɛ raalɛ tuutuu le ewule kuma belemele, yɛɛ raalɛ gyantɛla le bula.

²⁸Ɔkɔ nzia kɛ awule na ɔmaa mrenya bɔ adwɔmane.

²⁹Nwane a munzule ɛdo ye a? Nwane a ɛlɛdi nyane a? Nwane a manzonle ɛdo ye a? Nwane a kulo edwɛkɛ ɛhehanlɛ a? Nwane a tudu nganlɛ mɔɔ ɔnde ɔ bo a? Nwane a anye ɛbolobolo a?

³⁰Bɛdabɛ mɔɔ bɛtɛnla nza bo bɛkyɛ na bɛfa nwanye ngakyile bɛfonla nu bɛno la ɔ.

³¹Mmamaa ɛ nye bolo nwanye mɔɔ ɛwie be, ɔ nye le kɔkɔlɛ, na ɛgua ye kɔpo nu a ɔwu awubue na ɔgua aze bɛtɛɛ la.

³²Saa ɛ nye bolo ye a, nzinlii ɔbaha wɔ kɛ ɛwɔlɛ na yeafofo wɔ kɛ asɛɛ bɔna ɛha wɔ la.

³³Ɛ nye banwu ninyɛne ngakyile yɛɛ wɔ ɛdendɛlɛ bayɛ mgbane mgbane.

³⁴Ɛbayɛ kɛ sonla mɔɔ la nyevile nu la, anzɛɛ kɛ sonla mɔɔ la meli avela baka ti zo la.

³⁵Ɛbaha kɛ, “Bɛbɔle me, na meamboda; bɛbole me, na meande ye me nwonane nu. Kenlenzu a me nye zo kɛtete me a? Mebakpondɛ nza bieko meanlo.”