Read Nzema Mrɛ 24 Bible Online

Mrɛ 24 - Nzema bible

Mrɛ 24

¹Mmamaa ɛ nye bolo ɛtanema, yɛɛ mmanyia ɛhulolɛ kɛ ɛ nee bɛ kɛdɛnla,

²ɔluakɛ bɛtwehwe kpolera, yɛɛ bɛ nloa edwɛkɛ ku sunsum.

³Bɛfa nrɛlɛbɛ a bɛsi sua a, bɛfa ndelebɛbo a bɛkyekye awuke a,

⁴yɛɛ bɛfa adwenle na bɛahola bɛava ninyɛne ngɛnlɛma mɔɔ sonle bolɛ la bɛaziezie sua nu.

⁵Sonla mɔɔ ze nrɛlɛbɛ la le katakyie tɛla sonla mɔɔ anwo yɛ se la, yɛɛ sonla mɔɔ lɛ adwenle la tɛla mɔɔ lɛ anwosesebɛ la.

⁶Ɔluakɛ bɛfa adwenle a bɛko konle a, yɛɛ folɛdulɛ kpalɛ dɔɔnwo maa bɛdi konim.

⁷Nrɛlɛbɛ bo koasea nwo zo; koasea dwu bagua nu a ɔmbuke ɔ nloa.

⁸Sonla mɔɔ dwenle nwolɛ kɛ ɔdi ɛtane la, bɛbavɛlɛ ye munzuvolɛ.

⁹Ngoaseade nwo adwenle ɛbɔlɛ le ɛtane, yɛɛ sonla mɔɔ le agolobɛnwo la le menli kyibadeɛ.

¹⁰Saa edwɛkɛ to wɔ na ɛ rɛle bɔ a, ɛnee noko wɔ anwosesebɛ le ekyi.

¹¹Die bɛdabɛ mɔɔ bɛ nee bɛ ɛlɛkɔ ahunleɛ la. Sɔ bɛdabɛ mɔɔ bɛlɛpele kɛ bɛnrɛhɔ ahunleɛ la.

¹²Saa ɛka kɛ, “Bɛnlea, yɛnze ɛhye anwo ɛhwee” a, ɛnee ɔkile kɛ mɔɔ ze ahonle muala anu la noko ɛnze ɔ? Asoo mɔɔ nea ɛ nwo zo la ɛnze, yɛɛ ɔnrɛdua sonla kakɛ, kɛmɔ ye nyɛleɛ ne mɔ si de la ɔ?

¹³Me ra nrenya, no wolɛ, ɔluakɛ ɔle kpalɛ, yɛɛ kɛ wolɛ ndɛlamoa ne anu nzule mɔɔ ɛlɛpepe la si yɛ fɛ la,

¹⁴zɔhane ala yɛɛ nrɛlɛbɛ de maa wɔ ɛkɛla a; saa ɛnwu nrɛlɛbɛ a ɔbayɛ anyelazo kpole yeamaa wɔ kenle bie, yɛɛ wɔ anyelazo ɛnrɛwie ɛlɛ.

¹⁵Mmakɔ nzia wɔ ɛleka mɔɔ tenlenenli de la, kɛmɔ amumuyɛnli yɛ la; mmatwe konle ɛto ye sua nu,

¹⁶ɔluakɛ saa tenlenenli tɔ aze fane nsuu bɔbɔ a, ɔdwazo; na amumuyɛnli ne, munzule sɛkye ye.

¹⁷Saa wɔ kpɔvolɛ kpo aze a, mmadi nwolɛ fɛlɛko, yɛɛ saa ɔtu koti a, mmamaa ɛ nye die nwolɛ,

¹⁸anrɛɛ Ɛdɛnkɛma kɛnwu ye, ɔ nye ɛnrɛlie nwolɛ, na ɔkɛye ye ɛya ne ɔkɛvi ɔ nwo zo.

¹⁹Mmamaa wɔ adwenle gyegye wɔ wɔ amumuyɛma ati, yɛɛ mmamaa ɛ nye bolo bɛ;

²⁰ɔluakɛ amumuyɛnli anye ɛnla debie zo. Bɛbanlua amumuyɛnli ne kɛnlaneɛ ne.

²¹Me ra nrenya, sulo Ɛdɛnkɛma na di belemgbunli eni, yɛɛ mmatu biala anloa ɛto,

²²ɔluakɛ munzule kola fi bɛ ɛkɛ ne ba arɛlevilɛ nu, na nwane a ze ɛzɛkyelɛ mɔɔ bɛ mu nwiɔ bɛkɛva bɛkɛzɛkye wɔ a?

²³Ɛhye mɔ noko le nrɛlɛbɛvolɛma anloa edwɛkɛ. Ɔnle kpalɛ kɛ sonla kɛli mɔguazo.

²⁴Sonla mɔɔ ka kile amumuyɛnli kɛ, “Ɛdi benle” la, menli kɔsɔɔti babɔ ye sasa, maanle maanle kɔsɔɔti bahyi ye.

²⁵Na bɛdabɛ mɔɔ bɛtwi amumuyɛma anyunlu la anye balie, na bɛbanyia nyilalɛ dɔɔnwo.

²⁶Sonla mɔɔ maa nyelebɛnloa kpalɛ la, bɛfo ɔ nvoka anwo.

²⁷Boɔboa ɛ nwo sie; duolua ɛbɔ nu kpondɛ nwolɛ ninyɛne ne amuala sie kolaa na wɔarazi wɔ sua ne.

²⁸Mmadi daselɛ ɛtia ɛ gɔnwo mgbane gyɛne ne ala, yɛɛ mmabɔ adalɛ.

²⁹Mmaka kɛ, “Mɔɔ yeyɛ me la, medame meyɛ ye bie; metua ye kakɛ wɔ mɔɔ yeyɛ la anwo.”

³⁰Menzenle mgbovonle sonla bie ɛya avule nu, sonla ne mɔɔ yɛle vanye egyinli ne la ɛnlɛ adwenle.

³¹Na nea, mbowule ngome ɛva ɛya ne; nuhua ndile ɛyɛ tesuu zɛhae, yɛɛ awolɛ mɔɔ bɛvale bɛliele ye bane ne la ɛgologolo ɛgua.

³²Menwunle ye la mendwenlenle nwolɛ. Meneanle ye kpalɛ na menyianle ezukoalɛdeɛ wɔ nu.

³³ Nafelɛ ekyi, ngɔsɔkɛbɔlɛ ekyi, ɛsalɛ mɔɔ bɛto bɛbɛka nu bɛdie ɛnwomenle ekyi,

³⁴ehyia bara ɛ nwo zo arɛlevilɛ nu kɛ awule, yɛɛ ɛ nwo bahyele wɔ kɛ ɛlɔnenli lɛ etu gyi ɛ kɔme zo la.