Read Nzema Mrɛ 25 Bible Online

Mrɛ 25 - Nzema bible

Mrɛ 25

¹Ɛhye mɔ noko le Belemgbunli Sɔlɔmɔn mrɛlɛ mɔɔ ɔbule, mɔɔ Dwuda Belemgbunli Hɛzikaya mbɔlɔba ne mɔ hɛlɛle bɛ wɔ kɛlata zo la.

²Ɔle anyunlunyia ɔmaa Nyamenle kɛ ɔkɛva ninyɛne ɔkɛvea, yɛɛ ɔle anyunlunyia ɔmaa arelemgbunli kɛ bɛkɛkpondɛ ninyɛne zɔhane mɔ.

³Kɛmɔ anwomanyunlu wɔ anwuma, na azɛlɛ ye le buma la, zɔhane ala yɛɛ arelemgbunli adwenle ɛnlɛ nvedenvedenu a.

⁴Saa ɛtu dwɛtɛ fufule nu evinli ne a, dwinvolɛ nyia debie fa di adwinli kpalɛ.

⁵Saa ɛtu amumuyɛma ɛfi belemgbunli anwo a, tenleneyɛlɛ bamaa ye belemgbunlililɛ ne ali munli.

⁶ Mmamemaa ɛ nwo zo wɔ belemgbunli anyunlu anzɛɛ mmapele ɛkɔtɛnla mgbanyinli ɛleka.

⁷Ɔle kpalɛ kɛ bɛkɛze wɔ kɛ, “Badɛnla ɛke,” tɛla kɛ bɛkɛye wɔ bɛkɛvi belemgbunli anyunlu bɛkɛhɔ menli mɔɔ anwo ɛngyia la ɛleka.

⁸Mmapele ndɛndɛ ɛfa mɔɔ wɔnwu ye la ɛkɔ kɔɔto, ɔluakɛ saa akee ɛ gɔnwo ne gua ɛ nyunlu aze a, duzu a ɛkɛyɛ a?

⁹Saa ɛ nee ɛ gɔnwo nyia edwɛkɛ a, bɛ mu nwiɔ bɛziezie; mmasa ɛ gɔnwo anwo edwɛkɛ ɛgua zolɛ,

¹⁰anrɛɛ mɔɔ kɛde la kɛgua ɛ nyunlu aze, yɛɛ wɔ duma mɔɔ kɛzɛkye la ɛnlɛ awieleɛ.

¹¹Edwɛkɛ mɔɔ bɛkɛha ye wɔ ye adenle zo la le kɛ ezukoa nvutuke ampolo mɔɔ la dwɛtɛ fufule pɛlɛte nu la.

¹²Saa sonla mɔɔ ze nrɛlɛbɛ la twi sonla mɔɔ le tieyɛ la anyunlu a ɔle kɛnlɛma kɛ ezukoa nvutuke kpɔdelera anzɛɛ kpɔba.

¹³Soanvolɛ mɔɔ di nɔhalɛ la le kɛ ɛbuhenle nu nzule yɔlɔkɔkɔ; ɔnua ɔ menle ne mɔɔ soa ye la ahonle.

¹⁴Sonla mɔɔ tu ɔ nloa anu kɛ ɔfa debie yeahyɛ a ɔnyɛ la le kɛ amungu nee anwoma mɔɔ ɛndɔ ezule la.

¹⁵Sonla mɔɔ lɛ abotane la kola ka edwɛkɛ toonwo maa belemgbunli fa; ɛdendɛlɛ bɛtɛɛ bubu mbowule nu.

¹⁶Saa ɛnyia wolɛ a, no mɔɔ ɛkɛhola ye no la ala, anrɛɛ ɔkɛbɔ wɔ kutuku ɔkɛmaa ɛkɛfefe.

¹⁷Mmayɛ twolatwola wɔ ɛ gɔnwo sua nu, anrɛɛ ɛ nwo kɛvonle ye na ɔkɛkpo wɔ.

¹⁸Sonla mɔɔ di dasewia tia ɔ gɔnwo la le kɛ konle kokolobaka anzɛɛ konle dadeɛ, anzɛɛ ɛda baka ati nlane.

¹⁹Saa edwɛkɛ to wɔ na ɛfa ɛ rɛle ɛwula sonlamgbane nu a ɔle kɛ egyele mɔɔ ɛkpɔlɔ anzɛɛ egyakɛ mɔɔ tele la.

²⁰Saa ɛto edwɛne ɛmaa sonla mɔɔ arɛle ɛbɔ la a ɔle kɛ ɛlɛkpa sonla nwo ɛdanlɛ wɔ ɛyɛlɛ mekɛ nu anzɛɛ ɛlɛfa nzanvinli wɔado hanlɛ nu la.

²¹ Saa ɛhɔne ɛlɛku wɔ kpɔvolɛ a, maa ye aleɛ ɔli, yɛɛ saa nzuhɔne ɛlɛku ye a, maa ye nzule ɔnlo,

²²ɔluakɛ saa ɛyɛ ye zɔhane a ɛnee ɛlɛkuohua samɛnlakɛ ɔ ti zo, na Ɛdɛnkɛma bayila wɔ.

²³Sɔlɔ anwoma ne maa ezule tɔ, yɛɛ sonla mɔɔ keha ɔ gɔnwo anzi edwɛkɛ ɛtane la ka ɛya.

²⁴Ɔle kpalɛ kɛ sonla kɛdɛnla sua zo anwuma ekpumgbunli ne kodoka bie anu tɛla kɛ ɔ nee raalɛ mɔɔ di butule la kɛdɛnla.

²⁵Amaneɛ fɛlɛko mɔɔ vi amaanvoa la le kɛ nzule yɔlɔkɔkɔ mɔɔ nua ahonle la.

²⁶Saa sonlakpalɛ maa adenle maa sonla mɔɔ le amumuyɛ la wolo ye a ɔle kɛ nzubula mɔɔ ɛbolo anzɛɛ nzufeanvea mɔɔ bɛzɛkye ye la.

²⁷Ɔnle kpalɛ kɛ sonla kɛnlo wolɛ dɔɔnwo, yemɔti nea kɛ menli si kanvo wɔ la boɛ.

²⁸Sonla mɔɔ ɛngola ɔ nwo zo komo la le kɛ suakpole mɔɔ bɛbubu nwolɛ bane ne amuala bɛgua la.