Read Nzema Mrɛ 26 Bible Online

Mrɛ 26 - Nzema bible

Mrɛ 26

¹Enililɛ ɛnfɛta koasea; ɔle kɛ ezukɔtweaba mɔɔ tɔ wawaa nu anzɛɛ ezule mɔɔ tɔ ɛbuhenle nu la.

²Amowa mɔɔ ɛnlɛ ɔ bo la ɛndila. Ɔle kɛ ngɛsanoma mɔɔ di tutɛnla anzɛɛ nyamenleakatiba mɔɔ di ahyimango la.

³Ɛkpɔnwɔ fɛta empele, asoaso fɛta nyɛma, yɛɛ koasea fɛta feaba wɔ ɔ nzi kuma nu.

⁴Koasea biza koasea edwɛkɛ a mmaye ɔ nloa, anrɛɛ ɛkɛyɛ kɛ ɔdaye la.

⁵Bua koasea edwɛkɛ nwo maa ɔde ye koasea bo, anrɛɛ ɔkɛdwenle kɛ ɔze nrɛlɛbɛ.

⁶Kɛ ɛkɛva nrɛlaleɛ ɛkɛzoa koasea la, pɛ ɛ ngome ɛ gyakɛ, ɔluakɛ ɛnee ɛlɛtwehwe konle.

⁷Ahoasea avane mrɛlɛbulɛ le kɛ abubura gyakɛ, bɛle kpokpɔdwɔɔ, nvasoɛ biala ɛnle zolɛ.

⁸Ɛdi koasea eni a ɔle kɛ wɔva bolɛ wɔwula totoabɔ nu wɔbɔ ye kpɔkɛ la.

⁹Ahoasea bu mrɛlɛ a ɔle kɛ nzanli ɛlɛtu bowule mɔɔ ɛwɔ ɔ sa akunlu la.

¹⁰Sonla mɔɔ bɔ koasea anzɛɛ nzanli ɛkpa la le kɛ sonla mɔɔ to ɛda mgbane mgbane la, ɔboda awie biala mɔɔ ɛlɛpɛ nu aze la.

¹¹Koasea kile ye koaseayɛlɛ kɛ twea la, ɔfe a ɔsia ɔdi.

¹²Wɔnwu sonla mɔɔ ɔ nye zo a ɔze nrɛlɛbɛ la ɔ? Koasea bɔbɔ tɛla ye ɛkpɔyɛ.

¹³Mgbovonle edwɛkɛ a le kɛ, “Awenade la adenle nu! Awenade luolua guabile ne mɔ azo!”

¹⁴Mgbovonle kakyihakyi ɔ nwo wɔ ye ɛkpa zo kɛmɔ ndɛla maa anlenkɛ pɛnepɛne ɔ nwo la.

¹⁵Mgbovonle fa ɔ sa to ɛyɛba nu a, ɔyɛ ye ɛvɛlɛ bɔbɔ kɛ ɔkɛye ɔkɛwula ɔ nloa anu.

¹⁶Mgbovonle anye zo a ɔze nrɛlɛbɛ ɔtɛla menli nsuu mɔɔ kola dwenle bua edwɛkɛ nwo kpalɛ la.

¹⁷Sonla mɔɔ fa ɔ nwo dielie butule mɔɔ ɛnle ye ɛdeɛ la anu la le kɛ sonla mɔɔ sɔ twea mɔɔ lua ye aze la anzo la.

¹⁸Sonla mɔɔ bɛlɛbɛla ɔ gɔnwo na ɔka kɛ, “Melɛbɔ nzɛmedɛ ala!” la le kɛ ɛzɛlɛ mɔɔ fuandivuandi ɛyɛzinli, ɛda mbaka, yɛɛ ninyɛne mɔɔ kola ku sonla la.

²⁰Ɛyɛne ɛnle senle nu a ɔnu, yɛɛ ɛleka mɔɔ azukuedulɛ ɛnle la, butule ɛnle ɛkɛ.

²¹Kɛmɔ ɛfa emunlike ɛgua samɛnlakɛ zo a ɔsɔ, ɛfa ɛyɛne ɛwula senle nu a ɔsɔ la, zɔhane ala yɛɛ sonla mɔɔ kulo butule la twehwe konle ba a.

²²Sonla mɔɔ tu azukue la anloa edwɛkɛ yɛ fɛ kɛ aleɛ fɛlɛko; ɔdwu bɛ kunlu ɛleka biala.

²³Ɛdendɛlɛ bɛtɛɛ mɔɔ munzule adwenle li ɔ nzi la le kɛ ɛyɛba mɔɔ bɛyɛ nuhua nee nwolɛ tonlotonlo la.

²⁴Kpɔvolɛ biala ka menlemenle, na ye ahonle nu, ɔle adalɛ;

²⁵saa ɔtendɛ kɛnlɛma bɔbɔ a, mmadie ye ɛdi, ɔluakɛ bɛkyi ninyɛne dɔɔnwo wɔ ye ahonle nu.

²⁶Ɔfa adalɛ ɔkeda ye ɛkpɔlɛ zo bɔbɔ ɛdeɛ, noko ye amumuyɛ ninyɛne ne mɔ bala ali wɔ bagua nu.

²⁷Sonla mɔɔ pɛ ɔ gɔnwo mɔ anwo kuma la badɔ nu, yɛɛ sonla mɔɔ kundo bolɛ la, bolɛ tɔ ɔ nwo zo.

²⁸Adalɛ biala kyi menli mɔɔ yebɛlɛbɛla bɛ la, yɛɛ adalɛ nganvolɛ sɛkye sonla.