Read Nzema Mrɛ 27 Bible Online

Mrɛ 27 - Nzema bible

Mrɛ 27

¹ Mmafa ɛhyema ɛtu ɛ nwo, ɔluakɛ ɛnze mɔɔ alehyenlɛ nee ye lua a.

²Maa awie gyɛne ɛhanvo wɔ, ɛdawɔ ɛ ngome mmakanvo ɛ nwo; maa ɛyɛvolɛ ɛhanvo wɔ, mmafa ɛ nloa ɛbɔ ɛ nwo ɛhanvolɛ zo.

³Bolɛ yɛ ɛnlomboɛ yɛɛ ɛnwea yɛ ɛnlomboɛ, na koasea ahyihanlɛ yɛ ɛnlomboɛ tɛla bɛ mu nwiɔ.

⁴Ɛya ati yɛ se, yɛɛ ahyi yɛ ahyi, na nwane a kɛhola kɛgyinla nungule anyunlu a?

⁵Ɛtwi sonla nyunlu wɔ wienyi nu a ɔle kpalɛ ɔtɛla ɛhulolɛ mɔɔ vea la.

⁶Agɔnwolɛ bɔ wɔ hanlɛ a ɔle kpalɛ, na saa kpɔvolɛ yɛ wɔ atuu dɔɔnwo dɔɔnwo a, nea ye boɛ.

⁷Sonla mɔɔ ako ɛyi la, wolɛ ɛnyɛ ye fɛ, na mɔɔ ɛhɔne ɛlɛku ye la, debie ɛnwonle biala yɛ ye fɛ.

⁸Sonla mɔɔ kɛdu kɛvi ye sua nu la le kɛ anloma mɔɔ ɛdu ɛvi ye sane nu la.

⁹Nwole evuanlɛ nee anatele maa sonla nye die, na amaneɛnwunlɛ maa sonla di nyane.

¹⁰Mmamaa ɛ rɛle fi ɛ gɔnwo nee ɛ ze agɔnwo, yɛɛ saa edwɛkɛ to wɔ a, mmakɔ ɛ diema nrenya sua nu. Agɔnwolɛ mɔɔ bikye wɔ la le kpalɛ tɛla adiema nrenya mɔɔ nee wɔ bɛ avinli twe la.

¹¹Me ra nrenya, nwu nrɛlɛbɛ na maa me nye ɛlie, amaa saa awie ka me nwo edwɛkɛ a meahola ye bua.

¹²Sonla mɔɔ anye gyi ɔ ti anwo la nwu munzule na ɔtwe ɔ nwo, na mɔɔ ɛnlɛ adwenle la kɔtɔ nu na ɔnwu amaneɛ.

¹³Saa sonla di ɛyɛvolɛ agyinlanu a, kpa ɔ nwo ɛdanlɛ sie nu; saa awie di ɛyɛvolɛ mɔɔ ɛnvi maanle ne anu la agyinlanu a, fa ɔdaye mumua ne wula awoba.

¹⁴Sonla mɔɔ kɛdwazo nwonlomɔ mangyee ne ala kɛdea nu kɛyɛ ɔ gɔnwo bie mo la, ye moyɛlɛ ne le kɛ ɔlɛwa ye amonle ala la.

¹⁵Raalɛ mɔɔ kulo butule la le kɛ alehyenlɛ nu ezule mɔɔ tɔ na ɔmpe ɛlɛ la;

¹⁶saa ɛse ɛtua ye a ɔle kɛ sonla mɔɔ ɛlɛkye anwoma, anzɛɛ sonla mɔɔ ɛlɛfa ɔ sa fema azɔ nwole nu la.

¹⁷Bulalɛ si bulalɛ maa ɔyɛ nla, yɛɛ sonla yɛ sonla maa ɔyɛ sonla.

¹⁸Sonla mɔɔ nea ye feege egyinli boɛ la di nu aleɛ, yɛɛ mɔɔ sinza ɔ menle la nyia ɔ nyunlu.

¹⁹Sonla nea nzule nu a kɛ ɔsi ɔnwu ɔ nyunlu la, zɔhane ala yɛɛ sonla adwenle kile ye sonlazule a.

²⁰Ɛbolɔ nee Abadɔn ako ɛnyi ɛlɛ, zɔhane ala yɛɛ sonla nye de a, ɔnea ɔnea a ɔnvɛ ɛlɛ.

²¹Bɛfa senle bɛtu dwɛtɛ fufule nee ezukoa nvutuke nu evinli, yɛɛ bɛnea sonla subane na bɛaye ye ayɛlɛ.

²²Fa koasea nee abɛlɛ gua dubua nu so nwolɛ, ye koasea ne vi ɔ nwo ɛnrɛdu.

²³Ɔwɔ kɛ ɛnwu kɛ wɔ nyɛmoa ne mɔ si de la, na ɛnea wɔ nlankɛ ne mɔ boɛ,

²⁴ɔluakɛ anyiabɛnwo ɛndɛnla ɛkɛ ne dahuu. Asoo belemgbunlililɛ tɛnla ɛkɛ ne awolɛndoazo muala anu?

²⁵Saa ndile yela, na fofolɛ fifi, mɔɔ ɛkɛpɛ awoka ne mɔ azo ndile nee nya ne mɔ amuala la,

²⁶mboane ne mɔ bamaa wɔ ɛdanlɛ wɔaheda, yɛɛ mbɔnkye ne mɔ bamaa wɔ ezukoa.

²⁷Ɛbanyia mbɔnkye nyɛfonzule mɔɔ sa wɔ nee wɔ sua nu amra no la wɔ wɔ ɛkponle zo, yɛɛ ɛbanyia bie wɔanlea wɔ sonvolɛ mraalɛ.