Read Nzema Mrɛ 28 Bible Online

Mrɛ 28 - Nzema bible

Mrɛ 28

¹Amumuyɛma nriandi mekɛ mɔɔ awie ɛndoa bɛ la, na tenlenema akɛnra yɛ se kɛ awenade.

²Saa maanle yɛ ɛtane a, ye arelemgbunli so dɔɔnwo; maanle mɔɔ lɛ menli mɔɔ lɛ ndelebɛbo nee adwenle la gyinla kyɛ.

³Ehyianli mɔɔ sisi ehyianli la le kɛ ezule mɔɔ tɔ bilididi sɛkye aleɛ la.

⁴Bɛdabɛ mɔɔ bɛkpo mɛla la yeyɛ amumuyɛma, na bɛdabɛ mɔɔ bɛdi mɛla zo la ko tia amumuyɛma.

⁵Menli mɔɔ di ɛtane la ɛnde pɛlepɛlelilɛ bo, na bɛdabɛ mɔɔ bɛsonle Ɛdɛnkɛma la te ɔ bo kpalɛ.

⁶Ehyianli mɔɔ fa adwenle to ye ɛbɛlabɔlɛ nwo la le kpalɛ tɛla sukoavolɛ mɔɔ ɛnlɛ subane la.

⁷Ralɛ nrenya mɔɔ di mɛla zo la ze nrɛlɛbɛ, na ralɛ nrenya mɔɔ nee adidikpokuma a tu la gua ɔ ze anyunlu aze.

⁸Sonla mɔɔ dua awie mɔ ngyianlɛ zo fa nzinwo nyia ɔ nwo la ezukoa pɛ di menli mɔɔ se ehyianvolɛma anwunvɔne la ɛkɛ.

⁹Saa sonla tuodua ɔ nzo kɛ ɔnrɛdie mɛla ne a, ye nzɛlɛlɛ bɔbɔ le kyibadeɛ.

¹⁰Sonla mɔɔ kɛbɛlɛbɛla sonlakpalɛ kɛmaa ɔkɛbɔ ɛbɛla ɛtane la badɔ ɔdaye ye kuma mɔɔ yevu la anu. Sonla mɔɔ ɛnli ɛzonle la banyia agyadeɛ kpalɛ.

¹¹Sukoavolɛ dwenle kɛ ɔze nrɛlɛbɛ, na ehyianli mɔɔ lɛ ndelebɛbo la maa ɔ nwo da zolɛ.

¹²Saa tenlenenli di konim a, menli di fɛlɛko kpole, na saa amumuyɛnli dwazo a, menli nriandi fea.

¹³Sonla mɔɔ fea ye mɛladonlɛ zo la ɛnrɛkpazi, na sonla mɔɔ ka ye ɛtane na ɔgyakyi ye ɛyɛlɛ la, bɛse ye anwunvɔne.

¹⁴Nyilalɛ ɛha sonla ne mɔɔ sulo Ɛdɛnkɛma dahuu la, na sonla mɔɔ le anzosesebɛ la badɔ munzule nu.

¹⁵Maanlebuvolɛ mɔɔ le amumuyɛ na ɔsie ehyianvolɛma la le kɛ awenade mɔɔ ɛlɛkpo anzɛɛ bedi mɔɔ ɛnwu nane na ɔlɛkye ye la.

¹⁶Maanlebuvolɛ mɔɔ ɛnlɛ ndelebɛbo la ati yɛ se yɛɛ ɔdi nzisi, na sonla mɔɔ kyi nzisi la nyi kyɛ.

¹⁷Bɛmaa sonla mɔɔ di fɔlɛ kɛ yehu sonla la ɛyɛ nriandivolɛ toonwo ɛhɔ ewule nu; awie biala mmaboa ye.

¹⁸Sonla mɔɔ fa nɔhalɛ dua la, bɛbalie ye ngoane, na mɔɔ ye adenle nu kyeɛhyea la badɔ kuma nu.

¹⁹Sonla mɔɔ so ɛya la banyia aleɛ dɔɔnwo, na mɔɔ di ninyɛne mgbane mgbane nzi la, ehyia bahu ye kpole kpalɛ.

²⁰Nyilalɛ dɔɔnwo baha sonla mɔɔ di nɔhalɛ la, na mɔɔ pele nyia ɔ nwo ndɛndɛ la ɛnrɛva ɔ nwo dwɔɔ.

²¹Mɔguazolilɛ ɛnle kpalɛ, noko aleɛ duma nu ti, sonla ne bie bali mɔguazo ayɛ ɛtane.

²²Sonla mɔɔ le akyɛbɛ la pele anwonyia nwo, ɔndwenle nwolɛ kɛ kenle bie ɔbahyia.

²³Sonla mɔɔ twi mɔɔ kɛyɛ ɛtane la anyunlu la nzinlii sɔ ɛnyelɛ tɛla mɔɔ kanvo ye bɛ gye zo la.

²⁴Sonla mɔɔ wua ɔ ze anzɛɛ ɔ nli na ɔka kɛ “Ɔnle mɛladonlɛ” la, le sonla mɔɔ sɛkye ninyɛne la agɔnwo.

²⁵Sonla mɔɔ le angomedi la twehwe konle, na mɔɔ fa ɔ rɛle wula Ɛdɛnkɛma anu la banyia ɔ nwo.

²⁶Sonla mɔɔ fa ɔ rɛle to ɔ ngome ɔ nwo zo la le koasea, na mɔɔ fa nrɛlɛbɛ dua la, bɛbalie ye ngoane.

²⁷Sonla mɔɔ nyia ye a ɔmaa ehyianvolɛma bie la ɛnrɛli ehyia, na mɔɔ ɔnyia ye a ɔfa ɔ nye ɔfea la, menli dɔɔnwo bawa ye amonle.

²⁸Saa amumuyɛma dwazo a, menli nriandi fea, na saa bɛ bo zo minli a, tenlenema kpazi.