Read Nzema Mrɛ 29 Bible Online

Mrɛ 29 - Nzema bible

Mrɛ 29

¹Sonla mɔɔ bɛtwi ɔ nyunlu a ɛnee anzosesebɛ ala a ɔyɛ la banwu ɔ nyunlu arɛlevilɛ nu mɔɔ ɔnrɛhola ɔ nloa gyinla a.

²Saa tenlenema ɛlɛbu maanle a, menli ne anye die, na saa amumuyɛma ɛlɛbu maanle a, menli ne su bɛ kunlu.

³Sonla mɔɔ kulo nrɛlɛbɛ la maa ɔ ze di fɛlɛko, na sonla mɔɔ nee tuutuuma a tu la sɛkye ye debie biala.

⁴Belemgbunli mɔɔ di pɛlepɛle la fa anzonudwolɛ ba ye maanle ne anu, na mɔɔ dahuu kpondɛ ahyɛlɛdeɛ la sɛkye maanle ne.

⁵Sonla mɔɔ dahuu kanvo ɔ gɔnwo adalɛ nu la sua ɔ gɔnwo ne ɛhane.

⁶Sonla mɔɔ di ɛtane la mɛladonlɛ kakyi ɛhane kye ye, na sonla mɔɔ di boɛ la to edwɛne na ɔ nye die.

⁷Tenlenenli ze kpalɛ mɔɔ di wɔ ehyianvolɛma la, na mɔɔ ati yɛ se la ɛnde zɛhae adwenle ne abo.

⁸Agolobɛnwoma maa senle tɔ suakpole zo, na nrɛlɛbɛvolɛma maa ɛya dwo.

⁹Saa nrɛlɛbɛvolɛ nee koasea su kpolera a, koasea ne teɛdea nu sele mgbole mgbole; ɔmmaa bɛnnyia bɛ nzo fee.

¹⁰Menli mɔɔ ku menli mgbane mgbane la kyi sonla mɔɔ di pɛlepɛle la, na menli mɔɔ le tenlene la kpondɛ zɔhane sonla ne nee ngoane.

¹¹Koasea fa ɛya a, ɔye ɔkile, na nrɛlɛbɛvolɛ fa ɛya a, ɔkomo ɔ nwo zo.

¹²Saa maanlebuvolɛ di adalɛ ngehanleɛ nzi a, ye mgbanyima yɛ amumuyɛ.

¹³Ehyianli nee nzisinli sɛ debie ko anwo, Ɛdɛnkɛma maa bɛ mu nwiɔ ɛnyelɛ.

¹⁴Saa belemgbunli bua ehyianvolɛma ndɛne pɛpɛ a, ɔbali ye ebia ne yeahyɛ.

¹⁵Empele nee ndeanlɛ maa kakula nwu nrɛlɛbɛ, na kakula mɔɔ bɛkɛdu ɔ nwo bɛkɛhyɛ ye la gua ɔ nli anyunlu aze.

¹⁶Saa amumuyɛma bu maanle a, mɛladonlɛ so dɔɔnwo, na tenlenema banwu bɛ azedɔlɛ nu.

¹⁷Saa ɛ ra nrenya yɛ ɛtane a tea ye, ɔbamaa ɛ nzo nu adwo wɔ na ɛ nye alie.

¹⁸Ɛleka mɔɔ bɛnga Nyamenle nrɛlaleɛ la, menli yɛ debie biala mɔɔ bɛkulo la; nyilalɛ ɛha sonla ne mɔɔ di mɛla zo la.

¹⁹Bɛnva bɛ nloa mgbane bɛndea akɛlɛ, ɔluakɛ ɔbade ɔ bo bɔbɔ ɛdeɛ, noko ɔnrɛpili.

²⁰Wɔnwu sonla mɔɔ anloa yɛ ndɛ la ɛlɛ ɔ? Koasea lɛ anyelazo dɔɔnwo tɛla ye.

²¹Sonla mɔɔ kɛdɛfɛdɛfɛ ye sonvolɛ vi ye ngakula nu la, ɔ nye zo katete ye la ɛnee yeli ye agya.

²²Sonla mɔɔ ɛngyɛ na yeava ɛya la twehwe mgbonde nee konle, yɛɛ mɔɔ ɛya wɔ ye ahonle zo la fa mɛladonlɛ dɔɔnwo ba.

²³Sonla mɔɔ tu ɔ nwo la adubɛnwo ne gua ɔ nyunlu aze, na mɔɔ le bɛlɛvo la banyia ɔ nyunlu.

²⁴Sonla mɔɔ nee awule tu la kyi ɔdaye mumua ne ye ngoane; ɔte amowa ne, noko ɔngola ɔnga nɔhalɛ ne.

²⁵Sonla mɔɔ le sulosulo la sua ɔ nwo ɛhane, na mɔɔ arɛle wɔ Ɛdɛnkɛma anu la anwo le kɔlɔnwo.

²⁶Menli dɔɔnwo kulo kɛ bɛsɔ maanlebuvolɛ ne anye, noko Ɛdɛnkɛma ɛkɛ ne yɛɛ sonla nyia pɛlepɛlelilɛ a.

²⁷Sonla mɔɔ le tenlene la kyibadeɛ a le sonla mɔɔ ɛnli boɛ la, yɛɛ mɔɔ ye ɛbɛlabɔlɛ ne le fɔɔnwo la le kyibadeɛ maa amumuyɛnli.