Read Nzema Mrɛ 30 Bible Online

Mrɛ 30 - Nzema bible

Mrɛ 30

¹Gyeki mɔɔ vi Masa la ara Egɛ anloa edwɛkɛ ɛne. Nrenya ne hanle hilele Ayeteɛle, ɛhɛe, ɔhanle ɔhilele Ayeteɛle nee Yukale kɛ:

²“Medame, nɔhalɛ, meyɛ mgbane. Menlɛ ndelebɛbo mɔɔ sonla ɔwɔ kɛ nyia la.

³Metɛsukoale nrɛlɛbɛ, yɛɛ menlɛ Nwuanzanwuanza Ko ne anwo adwenle.

⁴Nwane a ɛvo ɛhɔ anwuma ɛzia ɛra a? Nwane a ɛhola ɛhye anwoma ɔ sa nu a? Nwane a ɛva ye tɛladeɛ ɛkyekye nzule a? Nwane a ɛhyehyɛ azɛlɛ ye muleɛ ne mɔ a? Kɛ bɛfɛlɛ ye ɛ, yɛɛ kɛ bɛfɛlɛ ɔ ra ne ɛ? Nɔhalɛ, ɛze!

⁵“Nyamenle anloa edwɛkɛ biala yɛ nɔhalɛ; ɔle enyinlike ɔkeda bɛdabɛ mɔɔ bɛnriandi bɛba ye ɛkɛ ne la anwo zo.

⁶Mmafa edwɛkɛ ɛboka ye edwɛkɛ nwo, anrɛɛ ɔkɛdea wɔ ɔkɛmaa bɛkɛnwu kɛ ɛle adalɛ.”

⁷Ninyɛne nwiɔ yɛɛ mebiza ye wɔ wɔ ɛkɛ ne a, Nyamenle, yɛ maa me kolaa na meawu:

⁸Ye adalɛbɔlɛ nee adalɛ ɛbɛla biala fi me nu bɔkɔɔ; mmamaa medi ehyia anzɛɛ menyia me nwo. Maa menyia aleɛ mɔɔ menwɔhyia nwolɛ la ala,

⁹anrɛɛ me ko yi a, menwɔkpo wɔ na menwɔbiza kɛ, “Ɛdɛnkɛma a le nwane?” Anzɛɛ anrɛɛ menwɔli ehyia, menwɔwua, na menwɔgua me Nyamenle ne duma ne anwo evinli.

¹⁰Mmatoɔdoa sonvolɛ ɛkile ɔ menle, anrɛɛ ɔkɛwa wɔ amonle ɔkɛmaa ɛkɛli fɔlɛ.

¹¹Menli bie wɔ ɛkɛ mɔɔ bɛwa bɛ ze mɔ amonle yɛɛ bɛmbu mɔɔ bɛ nli mɔ yɛ maa bɛ la.

¹²Menli bie wɔ ɛkɛ mɔɔ bɛnea a bɛ nwo te, noko bɛ nwo le evinli ngome.

¹³Menli bie wɔ ɛkɛ, bɛ nwo yɛ fɛ, bɛ nye ma le nzenzɛɛnye, bɛtwehwe bɛ nye anzi.

¹⁴Menli bie wɔ ɛkɛ, bɛ gye le konle dadeɛ; bɛ gye nlane le kɛ dadeɛ, bɛfa bɛsɛkye menli mɔɔ yɛ anwunvɔne wɔ azɛlɛ ye azo, na bɛsɛkye menli mɔɔ ehyia na bɛwɔ menli avinli la.

¹⁵Nrenya bie mɔɔ ɛyɛ ɔ nwo mimike la lɛ ɔ mra mraalɛ nwiɔ, bɛ ɛzunlɛ a le, “Fa maa me, fa maa me!” Ninyɛne nsa wɔ ɛkɛ mɔɔ bɛ kunlu ɛndwo bɛ nwo; mɔɔ tɔ zolɛ nna la bɔbɔ ɛnga kɛ, “Yeyɛ boɛ!”

¹⁶Bɛmɛ a le: Ɛbolɔ sua zo, raalɛ mɔɔ le mota, azɛlɛ ye mɔɔ nzule ɛnyi ye ɛlɛ, yɛɛ senle mɔɔ ɛlɛsɔ mɔɔ bɛnnua ye ɛlɛ.

¹⁷Awie biala mɔɔ si ɔ ze amgbu na ɔmbu ɔ nli bie la, mbɔnza nu ahɔhɔsɛlɛ badudu ɔ nye na mgbɔtɛ arali.

¹⁸Ninyɛne nsa a wɔ ɛkɛ ne mɔɔ yɛ me nwanwane a; mɔɔ tɔ zolɛ nna la, mende ɔ bo.

¹⁹Bɛmɛ a le: Kɛ kɔleɛ si tu dua anwomanyunlu, kɛ ɛwɔlɛ si dua bodane zo, Kɛ meli si dua nyevile kunlu, yɛɛ kɛ nrenya nee raalɛ adwenle si yia ɛhulolɛ nu la.

²⁰Awuvolɛ raalɛ mɔɔ to awuvolɛvalɛ mɛla ne la subane ɛne: ɔdi, ɔkyikyi ɔ nloa anwo na yeaha kɛ, “Medame, metɛyɛle nyɛleɛ ɛtane biala!”

²¹Ninyɛne nsa yɛɛ azɛlɛ ye zo mɔɔ ɔngola bɛ a, mɔɔ tɔ zolɛ nna la maa ɔgyinla a ɔnyɛ boɛ.

²²Bɛmɛ a le: Kanranli mɔɔ kɛli ebia, Koasea mɔɔ kɛli ɔ ko kɛyi,

²³raalɛ mɔɔ awie ɛngulo ye na ɔkɛnyia ɔ hu, yɛɛ sonvolɛ raalɛ mɔɔ kɛli ɔ menle raalɛ agya la.

²⁴Ninyɛne nna wɔ aleɛabo mɔɔ le ngyikyi kpalɛ, na bɛze nrɛlɛbɛ kpole kpalɛ a. Bɛmɛ ɛne:

²⁵Ngyigyilira: Bɛ nwo ɛnyɛ se, noko wawaa nu bɛkpondɛ bɛ aleɛ biala mɔɔ bɛbahyia nwolɛ la.

²⁶Azulenupema: Bɛnle katakyiema, noko bɛ alaleɛ wɔ bodane ne mɔ anu.

²⁷Abɛbɛ: Bɛnlɛ belemgbunli, noko bɛse kɛ bɛkɔ a, bɛkɔ ye ɛhonlone ɛhonlone.

²⁸Kekelebetile: Sonla kola kye bɛ ɔ sa nu, noko bɛwɔ arelemgbunli azua nu.

²⁹Ninyɛne nsa a bɛ ɛdialɛ le kɛnlɛma a, mɔɔ tɔ zolɛ nna la agyakɛ ɛdudulɛ bɔbɔ le kɛnlɛma bo zolɛ.

³⁰Bɛmɛ a le: Awenade, ɔle nane kɔsɔɔti bɛ katakyie. Ɔnzulo ɛhwee.

³¹Abɔnkye nyinli nee akɔlɛ nyinli mɔɔ ɛlɛtudu bɛ gyakɛ, yɛɛ belemgbunli mɔɔ ɛlɛtudu ɔ gyakɛ wɔ ye maanlema anyunlu la.

³²Saa wɔyɛ koasea, wɔmemaa ɛ nwo zo, anzɛɛ wɔbɔ adwenle ɛtane a, ɛnee kakyi wɔ adwenle.

³³Ɔluakɛ saa ɛka ɛnlankɛ nyɛfonzule nu somasoma a, ɔpɛ mgbokɛ, ɛmia ebonyile somasoma a, mogya vi nu finde, yɛɛ ɛka sonla ɛya somasoma a, ɔwie konle.