Read Nzema Mrɛ 31 Bible Online

Mrɛ 31 - Nzema bible

Mrɛ 31

¹Edwɛkɛ mɔɔ Masa Belemgbunli Lɛmuwɛle ɔ nli vale dule ye folɛ la ɛne:

²“Duzu ɔ, me ra nrenya? Me ko ɛzɛne, duzu ɔ? Duzu ɔ, me ra nrenya mɔɔ menluale ɛwɔkɛbɔlɛ zo a menwole ye a?

³Mmasɛkye wɔ anwosesebɛ wɔ mraalɛ nwo. Mmafa wɔ adwenle ɛmaa menli mɔɔ sɛkye arelemgbunli la.

⁴Ɔnle kpalɛ ɔmmaa arelemgbunli, O Lɛmuwɛle. Ɔnle kpalɛ ɔmmaa arelemgbunli kɛ bɛkɛnlo nwanye anzɛɛ maanlebuvolɛma kɛ bɛ ti akunlu kɛra nza ɛsesebɛ zo,

⁵anrɛɛ bɛkɛbo na bɛ rɛle kɛvi mɛla ne mɔɔ bɛli bɛdo ɛkɛ la, na bɛkɛzɛkye menli mɔɔ ɛlɛnwu amaneɛ la edwɛkɛ.

⁶Fa nza ɛsesebɛ maa sonla mɔɔ anye gyi ewule nu la, na fa nwanye maa menli mɔɔ arɛle ɛbɔ kpole la.

⁷Maa bɛnlo na bɛ rɛle ɛvi bɛ ehyia, na bɛangakye bɛ anwubɛnyunlu ne bieko.

⁸“Ka maa menli mɔɔ le mumule la, na di menli mɔɔ ɛnlɛ bie la edwɛkɛ maa bɛ.

⁹Buke ɛ nloa, bua ndɛne tenlene nu, na gyinla maa ehyianvolɛma nee menli mɔɔ ɛhyia la.”

¹⁰Yelɛ kpalɛ, nwane a kɛnyia ye a? Ɔsonle bolɛ ɔtɛla anwoneɛ.

¹¹Ɔ hu fa ɔ rɛle wula ye nu, yɛɛ ɔnrɛhyia ɛhwee.

¹²Yelɛ ne yɛ ɔ hu boɛ, ɔngyegye ye wɔ mekɛ tendenle muala mɔɔ ɔde ngoane nu la.

¹³Ɔkpondɛ mboane enrinli nee bolɔfodɔ dwɛsɛ na ɔfa ɔnwo ninyɛne.

¹⁴Ɔle kɛ gualilɛ meli, ɔfa aleɛ ɔfi moa moa ɔba.

¹⁵Ɔdwazo ndɛ mɔɔ aleɛ ɛtɛwiele kye la ɔkpondɛ aleɛ ɔmaa ye sua nu amra, na ɔkile ye sonvolɛ mraalɛ ne mɔ gyima ɔmaa bɛyɛ.

¹⁶Ɔkpondɛ azɛlɛ ɔtɔ, na ɔfa ɔdaye ye ezukoa ɔtɔ ma ɔyɛ vanye egyinli.

¹⁷Dahuu ɔmaa ɔ nwo yɛ se na ɔyɛ gyima ɛsesebɛ.

¹⁸Ɔnea ɔnwu kɛ ye gualilɛ zo ɛra nvasoɛ. Ye kɛnlaneɛ ɛnnu nɔɔzo.

¹⁹Ɔdaye ɔbɛka ye nyɛma, ɔnwo ye ndanlɛ.

²⁰Ɔbuke ɔ sa nu ɔmaa ehyianvolɛma, na ɔmaa ɔ sa dwu menli mɔɔ ɛhyia la anwo zo.

²¹Saa ezukɔtweaba ɛlɛtɔ a ɔ kunlu ɛndu wɔ ye sua nu amra ati, ɔluakɛ ye sua nu amra amuala wula mboane enrinli kɔkɔlɛ adɛladeɛ.

²²Ɔnwo ɔdaye ye ɛkpa zo ndanlɛ, na ɔwula lenen adɛladeɛ nee adɛladeɛ ngɛnlɛma anye buluwu nee kɔkɔlɛ afonla.

²³Ɔ hu kɔtɛnla bagua ne anu wɔ anlenkɛ kpole ne anloa a, awie biala nwu ye wɔ mgbanyima ne mɔ avinli.

²⁴Ɔnwo lenen adɛladeɛ ɔtɔne bɛ; ɔnwo ndabule ɔtɔne bɛ ɔmaa gualilɛma.

²⁵Ɔ nwo yɛ se, yɛɛ bɛdi ye eni; ɔnzulo mekɛ mɔɔ bara la.

²⁶Ɔtendɛ nrɛlɛbɛ nu, yɛɛ ye ngilehilelɛ fane kpalɛyɛlɛ nwo.

²⁷Ɔnea ye sua nu amra boɛ wɔ bɛ ɛbɛlabɔlɛ nu, yɛɛ ɔnli ɔ sa anzi aleɛ.

²⁸Ɔ mra dwazo na bɛyileyila ye. Ɔ hu noko zɔhane ala, na ɔye ye ayɛlɛ.

²⁹Ɔ hu ka kɛ, “Mraalɛ dɔɔnwo ɛbɔ mɔdenle kpalɛ wɔ bɛ hu mɔ anwo, na wɔmɔ, ɛtɛla bɛ kɔsɔɔti.”

³⁰Sili le mɛlɛbɛla, yɛɛ anwofɛlɛko le debie mgbane, na raalɛ mɔɔ sulo Ɛdɛnkɛma la, ɔwɔ kɛ bɛye ye ayɛlɛ.

³¹Kanvo yelɛ kpalɛ wɔ ye gyima mɔɔ ɔyɛ la anwo, na maa bɛye ye ayɛlɛ bagua nu wɔ ɔ sa anloa gyima nwo.