Read Nzema Mrɛ 5 Bible Online

Mrɛ 5 - Nzema bible

Mrɛ 5

¹Me ra nrenya, tie me nrɛlɛbɛ edwɛkɛ ne na wɔanwu kɛ me ndelebɛbo si kɔ la,

²amaa wɔanwu kɛ ɛsi wɔabɔ wɔ ɛbɛla ne kpalɛ la, na wɔ ɛdendɛlɛ ahile kɛ ɛlɛ adwenle.

³Ɔluakɛ raalɛ mgbane biala anloa anu yɛ fɛ kɛ wolɛ, yɛɛ ye ɛdendɛlɛ fie tɛla ɛdɔkɛ,

⁴noko awieleɛ ne ye ɛnwonle tɛla baka subo, yɛɛ ɔ nloa nlane le kɛ dadeɛ anye nwiɔ.

⁵Ɔ gyakɛ ɛdudulɛ twehwe sonla kɔ ewule nu; sonla fa ye adenle zo a, ɔ nee ye dwu Ɛbolɔ.

⁶Ɔndwenle ngoane adenle nwo; ye ndenle ɛngɔ fɔɔnwo, yɛɛ ɔlɛminli a ɔnnwu ye.

⁷O me mra mrenya, bɛdie me, bɛmmamaa bɛ rɛle fi me edwɛkɛ mɔɔ melɛka la.

⁸Bɛhwe bɛ nwo bɛvi raalɛ mɔɔ le zɛhae la anwo! Bɛmmabikye ye sua ne anuhɔlɛ bɔbɔ,

⁹anrɛɛ bɛkɛminli bɛ anyunlunyia bɛkɛmaa awie mɔ kɛva, na bɛ ngoane zo kɛde wɔ menli mɔɔ ɛnze anwunvɔne la asa anu;

¹⁰anrɛɛ nyɛvolɛ kɛva bɛ anwonyia, na bɛ gyima mɔɔ bɛvɛ bɛhyehyɛ la apɛ ali nyɛvolɛ asa anu.

¹¹Akee awieleɛ ne mɔɔ bɛ anwosesebɛ kɛwie, bɛ nwonane kɛwie, na bɛ ɛbɛlabɔlɛ ne ɛlɛba awieleɛ la, ɛnee yedo bɛ nee ɛkponlenlɛ.

¹²Akee biala baha kɛ, “Ɛnee mekyi sonla nyunlu ɛhwilɛ, yɛɛ meangulo kɛ awie kɛdendɛ me nyunlu.

¹³Meandie me kilehilevolɛma ane, yɛɛ meanyɛ ɛnzonlɛ meandie folɛdulɛ.

¹⁴Mɔɔ menwunle ye la a le kɛ, menli ne yiale la, ɔhale kyɛkyɛ na me nyunlu agua aze.”

¹⁵No ɛdawɔ wɔ buakɛ nu nzule. No ɛdawɔ wɔ bula nu nzule.

¹⁶Asoo ɛbakponle wɔamaa awie aza wɔ bula nu nzule ado agua mgbane wɔ gua zo?

¹⁷Maa ɔyɛ ɛ ngome wɔ ɛdeɛ, mmamaa ɔyɛ nyɛvolɛ mɔɔ ɛ nee bɛ de la ɛdeɛ.

¹⁸Maa wɔ nzubula ne ɛyɛ nyilalɛ ɛmaa wɔ, na maa ɛ nye ɛlie ɛ ye mɔɔ ɛkɛgya ye wɔ mgbavolɛ nu la anwo,

¹⁹kɛ ɔ nwo yɛ fɛ kɛ weɛlɛ belɛ. Maa ɛ nye ɛlie ye anwofɛlɛko ne anwo mekɛ biala, na maa ye ɛhulolɛ ne ɛli ɛ ti.

²⁰Me ra nrenya, duzu ati a ɛkɛmaa raalɛ mgbane biala ɛhulolɛ kɛli ɛ ti, na ɛkɛdɔ raalɛ wɔlɔkavolɛ akɛnra anu ɛ?

²¹Ɔluakɛ sonla nrenya biala ɛbɛlabɔlɛ la Ɛdɛnkɛma anyunlu, yɛɛ ɔneɛnlea sonla ndenle kɔsɔɔti anu.

²²Amumuyɛnli biala ninyɛndane kakyi ɛhane kye ye, yɛɛ ɔkye ye wɔ ye nyɛleɛ ɛtane ne mɔ ɛyɛlɛ nu.

²³Ye koasea ti, ɔminli, yɛɛ ɔnde folɛ la ati, ɔwu ndɛ.