Read Nzema Mrɛ 6 Bible Online

Mrɛ 6 - Nzema bible

Mrɛ 6

¹Me ra nrenya, saa wɔli ɛ gɔnwo bie agyinlanu, wɔva debie wɔwula awoba wɔ ɛyɛvolɛ bie ati,

²saa ɛ nloa ɛvula edwɛkɛ bie na yehwe dwɛwɔlɛ yemaa wɔ a,

³ɛnee me ra nrenya, yɛ ɛhye die ɛ nwo, ɔluakɛ wɔva ɛ nwo wɔdo ɛ gɔnwo ne ɛhane nu: ka ɛ nwo kɔ na kɔbodo ɛ gɔnwo ne.

⁴Mmada ɛdafe anzɛɛ mmamuomua ɛ nye ɛbɔ ngɔsɔkɛ.

⁵Die ɛ nwo kɛ weɛlɛ die ɔ nwo fi bɔvolɛ sa nu la, anzɛɛ kɛ anloma die ɔ nwo fi mɔɔ sua nlomangane la asa anu la.

⁶O mgbovonle, kɔ ngyigyilira ɛkɛ ne, kɔnlea ye ndenle ne mɔ na sukoa nrɛlɛbɛ.

⁷Bɛnlɛ belemgbunli, bɛnlɛ maanle kpanyinli anzɛɛ maanlebuvolɛ biala,

⁸noko bɛkuohua bɛ aleɛ nloa wɔ wawaa nu, yɛɛ ɛbuhenle ne dwu a, bɛboɔboa debie biala mɔɔ kɛmaa bɛkɛnyia ngoane la anloa.

⁹Na wɔmɔ mgbovonle, ɛda wɔahɔdwu kenlenzu? Kenlenzu yɛɛ ɛvi nafelɛ nu ɛkɛdwazo a?

¹⁰ Nla ekyi, ngɔsɔkɛbɔlɛ ɛkyi, bɛ sa tobɛkanu ekyi kɛ ɛdie wɔ ɛnwomenle,

¹¹ɛkanwu ye la ɛnee ehyia ɛyɛ kɛ awule, ɛva wɔ aze, na ɛ nwo ɛhyele wɔ kɛ ɛgyi konle nloa.

¹²Sonla mgbane, amumuyɛnli, ɔlua a ɔtendɛ mgbane mgbane,

¹³ɔnwosonwoso ɔ nye, ɔsisi ɔ gyakɛ aze, ɔtende ɔ sa,

¹⁴ɔbɔ adwenle ɛtane, ɔsie munzule, na ɔtwehwe manzonle ɔto menli avinli.

¹⁵Yemɔti munzule bado ye arɛlevilɛ nu; ɔkanwu ye la ɛnee bɛbubu ye kɛ abua, ɛsisia ye zolɛ a ɔnyɛ boɛ.

¹⁶Ninyɛne nsia a wɔ ɛkɛ mɔɔ Ɛdɛnkɛma kyi a, ninyɛne nsuu a le ye kyibadeɛ a: Anyehoanlɛ ɛbulɛ, adalɛ ɛbɔlɛ, kɔdiawu ɛyɛlɛ, amumuyɛ adwenle ɛvalɛ kukukyɛngyɛ mɔɔ twe sonla kɔ munzule nu, sonla mɔɔ bɔ adalɛ, di dasewia, yɛɛ sonla nrenya mɔɔ twehwe manzonle to mediema avinli la.

²⁰Me ra nrenya, di ɛ ze mɛla zo, yɛɛ mmamaa ɛ rɛle fi ɛ nli ngilehilelɛ.

²¹Fa bɛ sie wɔ ahonle nu dahuu; kyekye bɛ kenda ɛ kɔme.

²²Bɛbali ɛ nyunlu wɔ wɔ ɛhɔlɛ nu, ɛda a bɛbazinza wɔ, yɛɛ ɛdwazo a bɛbadendɛ bɛahile wɔ,

²³ɔluakɛ mɛla ne le kɛnlaneɛ, ngilehilelɛ ne le wienyi, yɛɛ ahwibɛnyunlu ne kile ɛbɛlabɔlɛ adenle.

²⁴Bɛtwe wɔ bɛfi raalɛ munzule ne, raalɛ kpamgbanvolɛ anloa anu menlemenle ne anwo.

²⁵Mmanea ye anwofɛlɛko ne anwo ɛkulo ye, yɛɛ mmamaa ɔ nye anzi enrinli ne di wɔ adwenle,

²⁶ɔluakɛ tuutuu biala, bɛfa kpanwo kunguma ko ala a bɛbɔ ye ɛkpa a, na awuvolɛ raalɛ ɛvalɛ kpokpo nrenya ku ye.

²⁷Asoo sonla bahola avula samɛnlakɛ agua ɔ kɛnra azo, mɔɔ ye tɛladeɛ ne ɛnrɛyela a?

²⁸Anzɛɛ asoo sonla bahola atietia samɛnlakɛ zo, mɔɔ ɔ gyakɛ ɛnrɛyela a?

²⁹Zɔhane ala yɛɛ sonla mɔɔ fa ɔ gɔnwo aye la ɛnrɛva ɔ nwo dwɔɔ ɛnrɛhɔ a.

³⁰Asoo ɛhɔne ɛlɛku sonla, na ɔkɔwua debie ɔdi a, menli ɛmkpo ye ɔ?

³¹Na saa bɛkye ye a asoo bɛnrɛmaa ɔnrɛdua ye mɔnwo nsuu ɔ? Ɔbahwe ye sua nu ninyɛne kɔsɔɔti yeahɔdua.

³²Sonla mɔɔ fa awuvolɛ raalɛ la ɛnlɛ adwenle; sonla mɔɔ yɛ ɛhye la sɛkye ɔ nwo.

³³Ɔ nyunlu bagua aze, ɔ nwo ayɛ nganlɛ, na ye anyiemgba doa ye dahuu,

³⁴ɔluakɛ nungule maa sonla fa ɛya kpole, yɛɛ saa ɔlɛdi nzenralɛ noko a anwunvɔnezelɛ biala ɛnle nu.

³⁵Ɔnrɛlie mgbɔdalɛ biala, yɛɛ ɛkyɛ ye ninyɛne mɔnwo mɔnwo bɔbɔ a ɔ kunlu ɛnrɛdwo.