Read Nzema Mrɛ 7 Bible Online

Mrɛ 7 - Nzema bible

Mrɛ 7

¹Me ra nrenya, di me edwɛkɛ zo na fa me mɛla ne mɔ sie boɛ.

²Di me mɛla zo na nyia ngoane. Sie me ngilehilelɛ ne kɛ ɛ nye kuduarizi.

³Fa kyekye ɛ sa mrɛlɛsɛka ne mɔ, kɛlɛ bɛ wɔ wɔ ahonle zo.

⁴Ka kile nrɛlɛbɛ kɛ, “Ɛle me diema raalɛ,” na fɛlɛ adwenlenunwunlɛ kɛ ɔle ɛ gɔnwo kpalɛ kpalɛ;

⁵amaa bɛalie wɔ bɛavi raalɛ mgbane ne asa anu, raalɛ wɔlɔkavolɛ anloa anu menlemenle ne asa anu.

⁶Kenle ko, ɛnee megyi me nvɛnzɛlɛ ne anu me nye dua alie nwo lɔ,

⁷na menwunle kpavolɛ bie wɔ mgbavolɛ bie mɔɔ ɛnze nwolɛ bie la avinli kɛ yemɔ ɔnze nrɛlɛbɛ fee.

⁸Menwunle kɛ ɛnee ɔlua kpalɛ ne azo na yeva kodoka bie mɔɔ raalɛ bie de nu la adenle zo.

⁹Mekɛ ne anu ɛnee aleɛ ɛlɛdwo na maanle nu ɛyɛ yɛɛnye, asɛɛ awozinli ɛra bɔbɔ.

¹⁰Na nea, raalɛ bie mɔɔ ɛheda ye ɛdanlɛ kɛ tuutuu, na yeyɛ ye adwenle kɛ ɔbɛlɛbɛla ye yeahwe ye yeahɔ la yiale ye.

¹¹Raalɛ ne le sonla mɔɔ ɛndɛnla ye sua nu yɛɛ ɔtendɛ kpukpakpukpa.

¹²Ɛkanwu ye la ɛnee ɔlua guabile ne azo, ɛnwu ye bieko la ɛnee ɔlua gua nu lɔ, yɛɛ kodoka biala anu ɔkɔ atɛ.

¹³Ɔzɔle kpavolɛ ne, ɔvole ɔ nloa anwo, na ɔyɛle ɔ nyunlu monvoo ɔzele ye kɛ,

¹⁴“Ɛnee ɔwɔ kɛ mebɔ azu, na ɛnɛ meye me ɛwɔkɛ ne mɔ amuala;

¹⁵yemɔti kɛkala mera kɛ akee mebayia wɔ. Meyɛ kɛ mebakpondɛ wɔ yɛɛ meranwu wɔ a.

¹⁶Metoto me ɛkpa ne mewie, meva Yigyibiti lenen ɛdanlɛ kpalɛ mezɛ zolɛ.

¹⁷Meva alufuanlɛ, kolɔbo, yɛɛ baka evuanlɛ senamɔn meyɛ sua ne anu mukumuku zɛhae.

¹⁸Bɛla maa yɛlie yɛ nye, yɛhulo yɛ nwo toonwo alehyenlɛ.

¹⁹Me hu ɛnle sua nu; yedu adenle yehɔ moa.

²⁰Ɔkɔ la ɔvale ezukoa dɔɔnwo, yɛɛ siane ye bahɔ awozinli na yeara.”

²¹Ɔvale anloa anu menlemenle nee ɛdendɛlɛ kɛnlɛma ɔlile ye adwenle.

²²Ɛkɛ ne ala ɔlile ɔ nzi ɔ nee ye hɔle kɛ asɛɛ ɛnlankɛ mɔɔ bɛ nee ye ɛlɛkɔ ahunleɛ, anzɛɛ kɛtɛboɛ mɔɔ bɛhye ye ɛhane nu

²³toonwo na ɛda kɛwɔ ye kɛtulu ye anyalɛ la. Kɛ anloma si tu faa kɔtɔ ɛhane nu la, zɔhane ala yɛɛ ɔyɛle a; yeandwenle nwolɛ kɛ mɔɔ ɔlɛyɛ la kɛwie ye ewule.

²⁴Akee kɛkala, me mra mrenya, bɛdie me, na bɛyɛ ɛnzonlɛ bɛdie me nloa edwɛkɛ.

²⁵Bɛmmamaa bɛ adwenle kɔ ye adwenle ngyehyɛlɛ zo, yɛɛ bɛmmaminli bɛfa ye adenle zo ɛlɛ,

²⁶ɔluakɛ bɛdabɛ dɔɔnwo mɔɔ bɛgua ye ɛhane nu la ɛyɛ mgbane; menli mɔɔ yehu bɛ la zonle kpalɛ.

²⁷Ɛbolɔ Adenle la ye sua nu ɛkɛ, ɔla nu kpolomgbolo ɔdwu ewule suakunlu.