Read Nzema Mrɛ 8 Bible Online

Mrɛ 8 - Nzema bible

Mrɛ 8

¹ Bɛdie, nrɛlɛbɛ ɛlɛfɛlɛ, ndelebɛbo ɛmaa ɔ ne zo ɛlɛfɛlɛ.

²Ɔgyi adehane awoka ne mɔ azo, ɔgyi ndenle ngyikyi ne mɔ anu ɔlɛfɛlɛ;

³ɔlɛfɛlɛ wɔ sua ne azo nlenkɛ mgbole ne mɔ anloa, ɔtea nu kpole kpalɛ wɔ anuhɔlɛ ne mɔ anloa kɛ,

⁴“O menli, melɛfɛlɛ bɛ, melɛfɛlɛ dasanli biala.

⁵O bɛmɛ mɔɔ bɛ adwenle ɛtɛtinle a, bɛzukoa nrɛlɛbɛ; O menli ahoasea, bɛyɛ ɛnzonlɛ bɛdie.

⁶Bɛdie, ɔluakɛ meka edwɛkɛ kɛnlɛma; mɔɔ vi me nloa anu bavinde la le kpalɛ,

⁷ɔluakɛ mebaha nɔhalɛ ne; me nloa kyi amumuyɛ edwɛkɛ ɛhehanlɛ.

⁸Edwɛkɛ biala mɔɔ vi me nloa anu la le tenlene edwɛkɛ; adalɛ ɛnle nu anzɛɛ abɛladolɛ ɛnle nu.

⁹Ɔle fɔɔnwo ɔmaa mɔɔ te ɔ bo la, yɛɛ ɔle kpalɛ ɔmaa mɔɔ kpondɛ adwenlenubukelɛ la.

¹⁰Fa me ngilehilelɛ ne na gyakyi dwɛtɛ fufule, fa adwenlenubukelɛ na gyakyi ezukoa nvutuke tagyee.

¹¹“Nrɛlɛbɛ le kpalɛ tɛla mgbɔba, debie biala mɔɔ ɛkulo kɛ ɛnyia ye la nee ye ɛnzɛ.

¹²Medame nrɛlɛbɛ, menwu adwenle biala anu, melɛ adwenlenubukelɛ yɛɛ adwenle la me ɛdendɛlɛ nwo.

¹³Ɛdɛnkɛma ɛzulolɛ le ɛtane ɛhyilɛ. Mekyi adubɛnwo, mekyi mgbanyizonle, mekyi ɛdendɛlɛ adalɛ.

¹⁴Metu folɛ, mekile nrɛlɛbɛ adenle kpalɛ, melɛ ndelebɛbo yɛɛ me nwo yɛ se.

¹⁵Me nwo zo yɛɛ arelemgbunli dua bu maanle, na bɛdi mɛla mɔɔ le tenlene la a.

¹⁶Me nwo zo yɛɛ maanle mgbanyinli dua bu maanle, na amɛnladoma dua sie ewiade ye a.

¹⁷Mekulo bɛdabɛ mɔɔ bɛkulo me la, yɛɛ bɛdabɛ mɔɔ bɛ nye bolo bɛkpondɛ me la nwu me.

¹⁸Anwonyia nee enililɛ le me ɛdeɛ, memaa ɛkpazilɛ nee bɛ nwo ɛnyianlɛ di munli.

¹⁹Meso ma a ɔsonle bolɛ ɔtɛla ezukoa nvutuke tagyee, me nzoleɛ sonle bolɛ tɛla dwɛtɛ fufule tagyee.

²⁰Medua tenleneyɛlɛ adenle nu, medua pɛlepɛlelilɛ adenle nu.

²¹Memaa menli mɔɔ kulo me la nyia bɛ nwo, na memaa bɛ gya nu yɛ ɛnlomboɛ.

²² “Medame a Ɛdɛnkɛma lumuale bɔle me a, medame a mɔmoane mɔmoane mele ɔ sa anloa gyima mɔɔ lumua a.

²³Ɔbɔle me dɛbadɛba wɔ ɛvolɛ dɔɔnwo mɔɔ ɛze ɛhɔ, kolaa na ewiade abɔ ɔ bo.

²⁴Mekɛ mɔɔ buma ɛnle ɛkɛ ne la yɛɛ bɛwole me a, mɔɔ nzubula ɛnle ɛkɛ la yɛɛ bɛwole me a.

²⁵Bɛwole me kolaa na bɛabɔ awoka mgbole ne mɔ, bɛwole me kolaa na awoka ngyikyi aragyinlegyinla bɛ bo zo ne mɔ.

²⁶Bɛwole me kolaa na Ɛdɛnkɛma abɔ ewiade nee kpɔkɛ, kolaa na yeabɔ azɛlɛ.

²⁷Mekɛ mɔɔ ɔbɔ anwumaneamra, mɔɔ ɔpɛ kondongolohwio wɔ azubuma nye la, mewɔ ɛkɛ.

²⁸Mekɛ mɔɔ ɔkabɔ anwomanyunlu amungu ne mɔ, mekɛ mɔɔ ɔkabɔ buma nu nzule mgbole ne mɔ,

²⁹mekɛ mɔɔ ɔgya nyevile ne ɛweɛne, amaa nuhua nzule ambulu ye mɛla zo, mekɛ mɔɔ ɔwula azɛlɛ ye adiabo aze la,

³⁰ɛnee me nee ye a lua a, kɛ mele dwinvolɛ mɔɔ medi me ti anwo; memaa ɔ nye die dahuu, yɛɛ dahuu biala me nye die wɔ ɔ nyunlu.

³¹Me nye die ye ewiade ye mɔɔ nuhua ɛyɛ gbudugbudu, yɛɛ me nye die menli nwo.

³²“Na kɛkala, me mra mrenya, bɛdie me; bɛdabɛ mɔɔ bɛfa me ndenle zo la di fɛlɛko.

³³Bɛdie folɛdulɛ na bɛnwu nrɛlɛbɛ, bɛmmakpo mɔɔ bɛkilehile bɛ la.

³⁴Sonla mɔɔ tie me ne, mɔɔ dahuu gyi me nlenkɛ mgbole nloa, na ɔkendɛ me wɔ me anuhɔlɛ la bali fɛlɛko.

³⁵Mɔɔ kpondɛ me la nyia ngoane, yɛɛ ɔsɔ Ɛdɛnkɛma anye;

³⁶na mɔɔ asa kɛhoati me la baboda; bɛdabɛ mɔɔ bɛkyi me la amuala kulo ewule.”