Read Nzema Mrɛ 9 Bible Online

Mrɛ 9 - Nzema bible

Mrɛ 9

¹Nrɛlɛbɛ ɛzi ye sua na yedwazo mpila nsuu yesosɔ ye.

²Yehu ye nane ne mɔ, yefonlɔfonla ye nwanye ne na yedo ye ɛkponle ne yewie.

³Akee yezoa ye sonvolɛ mraalɛ ne mɔ kɛ bɛhɔgyinlegyinla mgbata ne mɔ azo na bɛdea nuhua bɛvɛlɛ kɛ,

⁴“Menli mɔɔ ɛnze nwolɛ bie la, bɛrɛla ɛke!” Bɛdabɛ mɔɔ bɛnlɛ adwenle la, ɔse bɛ kɛ,

⁵“Bɛrɛla, bɛrali me aleɛ ne na bɛnlo me nwanye mɔɔ meli ye afonla la.

⁶Bɛ nee menli mɔɔ bɛ adwenle ɛtɛtinle la mmatu, na bɛanyia ngoane; bɛva adwenle bɛdo bɛ ɛbɛlabɔlɛ nwo.”

⁷Sonla mɔɔ twi sonlamgbane nyunlu la die aholoba, yɛɛ mɔɔ twi sonla mɔɔ le amumuyɛ la anyunlu la boda.

⁸Mmatwi sonla mɔɔ bu ɔ nwo bie la anyunlu, anrɛɛ ɔkɛhyi wɔ. Twi sonla mɔɔ ze nrɛlɛbɛ la anyunlu, na ɔbahulo wɔ edwɛkɛ.

⁹Tu sonla mɔɔ ze nrɛlɛbɛ la folɛ, na ye nrɛlɛbɛ bayɛ kpole; kilehile sonla mɔɔ le tenlene la, na ye adwenle badi kpalɛ.

¹⁰ Ɛdɛnkɛma ɛzulolɛ le nrɛlɛbɛ ɛzukoalɛ bo ɛbɔlɛ, yɛɛ ɛnwu Nwuanzanwuanza Ko ne a, ɛlɛ ndelebɛbo,

¹¹ɔluakɛ ɔlua nrɛlɛbɛ zo yɛɛ wɔ mekɛ bawa na wɔanyia ɛvolɛ dɔɔnwo wɔaboka wɔ ngoane mekɛ nwo a.

¹²Saa ɛze nrɛlɛbɛ a, ɛze nrɛlɛbɛ ɛmaa ɛ nwo; saa ɛtendɛ mgbane mgbane a, nwolɛ ɛzonle ne zo ɛdawɔ ɛ ngome.

¹³Raalɛ koasea tendɛ mgbane mgbane, ɔnli ɔ nwo eni, yɛɛ ɔnze nyiane.

¹⁴Ɔdwazo a ɔtɛnla ye sua ne anlenkɛ ne anloa, yɛɛ sua ne azo mgbata ne mɔ azo,

¹⁵ɔfɛlɛvɛlɛ menli mɔɔ ɛlɛse, mɔɔ bɛdabɛ bɛlɛdwenle bɛ nwo la kɛ,

¹⁶“Sonla mɔɔ ye adwenle ɛtɛtinle la ɛrɛla ɛke!” Na yeaha yeahile mɔɔ ɛnlɛ adwenle la kɛ,

¹⁷“Awule nzule yɛ fɛ, na aleɛ mɔɔ bɛkɛvea bɛkɛli la yɛ fɛ somaa.”

¹⁸Mrenya mɔɔ kɔ ye ɛkɛ ne la ɛnze kɛ bɛkɔ ye ɛkɛ ne a bɛnzia, yɛɛ menli mɔɔ ɛhɔ ye ɛkɛ ne la wɔ Ɛbolɔ sua zo.