Read Nzema Nolo 10 Bible Online

Nolo 10 - Nzema bible

Nolo 10

¹Nrɛzenra avunli maa mɔɔ yɛ sakyeɛ la nwole evuanlɛ bɔ nvoanle, yɛɛ koaseayɛlɛ ekyi sɛkye nrɛlɛbɛ kpole nee enililɛ.

²Nrɛlɛbɛvolɛ adwenle tɔ fema zo, na koasea adwenle tɔ bɛne zo.

³Koasea lua adenle zo bɔbɔ a, ɔkile ɔ nwo kɛ ɔnlɛ adwenle, yɛɛ ye nyɛleɛ ka kile awie biala kɛ ɔle koasea.

⁴Saa wɔ belemgbunli fa ɛ nwo ɛya a, mmagyakyi gyima ɛkɛ ne ala; saa ɛsie ɛ nwo diinyi a, wɔannea a wɔ ɛtane mgbole mɔɔ wɔyɛ bɔbɔ la, bɛbava bɛahyɛ wɔ.

⁵Menwu munzule bie wɔ aleɛabo, kɛ ɔle nvonleɛ mɔɔ vi belemgbunli ɛkɛ a ba a.

⁶Bɛmaa menli mɔɔ ɛnze nrɛlɛbɛ la tumi gyinlabelɛ na bɛkpo sukuavolɛma.

⁷Menwu kɛ ahanra dede mgbɔnwɔ zo na menli mɔɔ le arelemgbunli la lua aze kɛ ahanra.

⁸ Sonla mɔɔ fu awie mɔ anwo kuma la bahoati adɔ nuhua; sonla mɔɔ bɔ bane nu finde la, ɛwɔlɛ ka ye.

⁹Sonla mɔɔ kpukekpuke awolɛ la, bolɛ boda ye, yɛɛ sonla mɔɔ kpakyekpakye mbaka la, bie boda ye.

¹⁰Saa akuma tili na wɔanzi a, ɛfa ɛ nwonane ɛyɛ gyima; na nrɛlɛbɛ boa sonla maa ɔko ɔtɔ zolɛ

¹¹Saa sonla mɔɔ ze ɛwɔlɛ sili kye la maa ɛwɔlɛ dumua ka ye kolaa na yeahye ɛwɔlɛ ne sili a, ɛnee nvasoɛ biala ɛnle silikyevolɛ ne anwo zo.

¹²Nrɛlɛbɛvolɛ nloa edwɛkɛ maa menli di ye eni, na koasea ka edwɛkɛ a ɔsɛkye ɔdaye mumua ne ɔ nwo.

¹³Ɔfa ngoaseasɛm ɔbɔ ye edwɛkɛ bo na yeava amumuyɛ ɛzɛlɛsɛm yeadwula ye.

¹⁴Koasea tendɛ a ɔ nloa ɛmpe. Awie ɛnze mɔɔ bazi a, yɛɛ awie ɛngola ɛnga mɔɔ bazi ye ewule nzi la ɛngile ye.

¹⁵Koasea ɛvɛlɛ gyegye ye adwenle, yemɔti ɔngola ɔnnwu suakpole ne adenle.

¹⁶Maanle mɔɔ ye belemgbunli ne le kakula, na ye mgbanyima to ɛkponle nɔɔzo toonwo alehyenlɛ la, ye gyakɔ!

¹⁷Na maanle mɔɔ lɛ belemgbunli mɔɔ bɛtete ye na ɔdaye ɔkola ɔfa adwenle, na ye mgbanyima to ɛkponle wɔ mekɛ kpalɛ nu nyia anwosesebɛ, na bɛnno bɛmbo la anwo le moavolɛ.

¹⁸Saa sonla yɛ mgbovonle toonwo ye sua tete a, sua ne nwu, na ɔfolo ɔgua nu.

¹⁹Aleɛ maa sonla sele, nza maa sonla nye die, na ezukoa pɛ debie biala azo.

²⁰Mmaka ɛ ne aze ɛbɔ belemgbunli ne anwo tokule, yɛɛ mmafea wɔ suakunlu bɔbɔ ɛbɔ sukoavolɛ anwo tokule. Anloma anzɛɛ kɛkɛba biala mɔɔ lɛ ndɛbalɛ la bahola ahɔha mɔɔ wɔha la ahile bɛ.