Read Nzema Nolo 11 Bible Online

Nolo 11 - Nzema bible

Nolo 11

¹Fuandi wɔ kpanwo ne to azule ne anye, na kenle bie ɛ sa baha ye.

²Bubu bie maa menli nsuu anzɛɛ mɔtwɛ bɔbɔ, ɔluakɛ ɛnze munzule mɔɔ kenle bie bazi azɛlɛ ye azo a.

³Saa ezule munla a, ɔtɔ ɔgua azɛlɛ ye azo, yɛɛ baka tudu tɔ nyiakɛ anzɛɛ sɔlɔ a, ɛleka mɔɔ ɔkɛdɔ la, ɛkɛ ne ala a ɔbala a.

⁴Sonla mɔɔ dahuu nea anwoma ne la ɛnrɛlua debie biala, yɛɛ mɔɔ nea kɛ anwomanyunlu si de la, ɛnrɛbu ye bɛyɔba.

⁵Kɛmɔ sonla ɛnze anwoma adenle na ɔnze kɛ ɔyɛ mɔɔ mogya kakyi sonla wɔ nrenzɛvolɛ kunlu la, zɔhane ala yɛɛ sonla ɛnze Nyamenle mɔɔ yɛ debie biala la gyima a.

⁶Dua wɔ ma ne nwonlomɔ, na eza dua bie nɔsolɛ nu. Ɔluakɛ ɛnze mɔɔ kɛyɛ kpalɛ a, saa bɛ mu nwiɔ bɛkɛyɛ kpalɛ anzɛɛ ko kɛyɛ kpalɛ kɛdɛla ko a, ɛnze.

⁷Wienyi le kɛnlɛma, yɛɛ ɔyɛ anyelielɛ kɛ sonla kɛnwu sɛnzɛne ne.

⁸Saa sonla tɛnla ngoane nu ali ɛvolɛ dɔɔnwo a, bɛmaa ɔlie ɔ nye wɔ ɔ muala anu; noko bɛmaa ɔhakye kɛ munzule kenle ne mɔ bazo. Mɔɔ ba la amuala le debie mgbane.

⁹Mgbavolɛ nee mbɛlɛra, bɛlie bɛ nye wɔ bɛ ngakula nu. Bɛli fɛlɛko wɔ mekɛ mɔɔ bɛtɛde mgbavolɛ nee mbɛlɛra la. Bɛli bɛ atiakunluwɔzo nzi, na bɛyɛ mɔɔ bɛkulo la. Noko bɛhakye kɛ Nyamenle babua bɛ debie biala mɔɔ bɛkɛyɛ la anwo ndɛne.

¹⁰Bɛye ɛyavalɛ bɛvi bɛ adwenle nu na bɛye anwofofolɛ biala bɛvi bɛ nwonane nu, ɔluakɛ mgbavosɛm nee mbɛlɛrasɛm nee ɛbɛlabɔlɛ nu fɛlɛkolilɛ le debie mgbane.