Read Nzema Nolo 12 Bible Online

Nolo 12 - Nzema bible

Nolo 12

¹Eza mekɛ mɔɔ bɛle mgbavolɛ nee mbɛlɛra la, bɛhakye bɛ Bɔvolɛ ne kolaa na munzule mekɛ ne mɔɔ ɛnee bɛbikye mgbanyifoa la adwu, na bɛaha kɛ, “Me nye ɛnlie ɛbɛla nu.”

²Bɛhakye ye kolaa na sɛnzɛne ne, anzɛɛ wienyi ne, siane ne, yɛɛ nwɔlɔra ne mɔ ayɛ bɛ nye zo monzomonzo, mɔɔ ezule pe bɔbɔ a amungu ne mɔ ɛmpɛ nuhua ɛnze ɛlɛ la.

³Mekɛ zɔhane, ɛsalɛ ne mɔɔ sɔ awuke ne la bawozowozo, mrenya mɔɔ anwo yɛ se la bakpo. Egyele mɔɔ bɛfa bɛkposa aleɛ la badudu aha ekyi bie, yɛɛ bɛ nye bayɛ monzomonzo.

⁴Bɛ nzo badi mɔɔ bɛnrɛde gua ne azo alɛra biala a. Saa bɛlɛti ma bɔbɔ a bɛnrɛde melahyinli ne ane, noko anloma ɛzunlɛ badunwue bɛ avi nafelɛ nu, na menli mɔɔ kulo edwɛne la ɛnrɛde edwɛndolɛ bieko.

⁵Eza bɛbazulo ɛleka mɔɔ wɔ anwuma la, yɛɛ ɛzulolɛ bara bɛ adenle nu, bɛ ti enrinli bayɛ egyɛne; ɛdialɛ bɔbɔ bayɛ se amaa bɛ na bɛ atiakunluwɔzo aye, ɔboalekɛ sonla ɛlɛkɔ ye ɛkɛla nzi, na nyanelilɛma bazu akpɔsa gua bile ne mɔ azo.

⁶Bɛhakye Bɔvolɛ ne kolaa na bɛ dwɛtɛ fufule ndweabane ne ade, anzɛɛ bɛ ezukoa nvutuke bonkuma ne abɔ; anzɛɛ bɛ dwora abɔ nzufeanvea bula ne azo anzɛɛ nyɛma ne mɔɔ bɛfa bɛto bula ne la ade.

⁷Munlutu bazia ahɔ ndɛtɛlɛ nu kɛ ye dɛba ne ala la, na sunsum ne azia ahɔ Nyamenle mɔɔ vale manle la ɛkɛ.

⁸Nolobɔvo ne se, mgbane nu mgbane ɔ. Ɔ muala le mgbane.

⁹Ɛye kɛ Nolobɔvo ne si ze nrɛlɛbɛ la ɛsie ahane a, eza ɔhilehilele menli ne adwenle nu ɛbukelɛ, debie ɛzuzulɛ nee debie ɛzukoalɛ na ɔdɔle alagye kpalɛ ɔzieziele mrɛlɛ mɔɔ ɔbule la.

¹⁰Nolobɔvo ne bɔle mɔdenle kɛ ɔkpondɛ edwɛkɛ agbɔkɛ mɔɔ yɛ fɛ la na edwɛkɛ ne mɔɔ ɔhɛlɛle la le nɔhalɛ.

¹¹Nrɛlɛbɛvoma edwɛkɛ le kɛ mboaneneavolɛma agbɔma ati ndwondwɔɔnwo ne mɔ mɔɔ bɛfa bɛka mboane la, yɛɛ mrɛlɛ mɔɔ bɛboɔboa bɛ nloa la kyɛ kɛ agbɛlɛko mɔɔ bɛva bɛbobɔ debie nu la. Nyamenle ne mɔɔ le kɛ mboaneneavolɛ mɔɔ nea yɛ kɔsɔɔti yɛ nwo zo la a ɛva ɛmaa yɛ a.

¹²Me ra nrenya, nea boɛ wɔ debie bieko mɔɔ li ɛhye mɔ anzi la anwo. Mbuluku ɛhɛlɛlɛ ɛnlɛ ye awieleɛ, yɛɛ ɛzukoalɛ dɔɔnwo maa ɛvɛlɛ.

¹³Bɛmaa yɛdie edwɛkɛ ne adwulaleɛ: Bɛzulo Nyamenle, na bɛli ye mɛla ne mɔ azo, ɔboalekɛ sonla gyima mɔɔ la ɔ nwo zo la ala ɛne.

¹⁴Ɔluakɛ Nyamenle babua debie biala mɔɔ yɛyɛ, nee awozinli nu nyɛleɛ biala anwo ndɛne, kpalɛ o, ɛtane o.