Read Nzema Nolo 5 Bible Online

Nolo 5 - Nzema bible

Nolo 5

¹Saa ɛkɔ Nyamenle Ɛzonlenlɛ Sua ne anu a anrɛɛ nea boɛ. Ɔle kpalɛ kɛ ɛkɛhɔ ɛkɛ ɛkɛhɔdie tɛla kɛ ɛkɛbɔ azu, kɛmɔ ahoasea yɛ la, ɔluakɛ bɛnze kɛ bɛlɛyɛ ɛtane.

²Dwenle nwolɛ kolaa na wɔabuke ɛ nloa, yɛɛ mmabɔ Nyamenle ɛwɔkɛ wɔ mekɛ mɔɔ ɛtɛdwenlenle nwolɛ la. Ɔluakɛ Nyamenle wɔ anwuma yɛɛ wɔmɔ ɛwɔ azɛlɛ ye azo, yemɔti maa wɔ edwɛkɛ ɛyɛ nzinrenzinra.

³Gyimayɛlɛ dɔɔnwo maa bɛka ɛlalɛ, yɛɛ koasea tendɛ dɔɔnwo.

⁴ Saa ɛbɔ Nyamenle ɛwɔkɛ a mmakyɛ na wɔaye, ɔluakɛ ɔ nye ɛnlie ahoasea nwo. Ye wɔ ɛwɔkɛ ne mɔɔ ɛkɛbɔ la.

⁵Ɔle kpalɛ kɛ ɛnrɛbɔ ɛwɔkɛ fee tɛla kɛ ɛkɛbɔ na ɛnrɛye.

⁶Mmamaa ɛ nloa fa wɔ kɔ ɛtane nu na akee wɔaha wɔahile Nyamenle soanvolɛ ne kɛ tɛ ɛ nye fuu ɔ. Duzu ati a ɛkɛyɛ ɛkɛmaa Nyamenle kɛva ɛ nwo ɛya, na ɔkɛzɛkye ɛ sa anloa gyima mɔɔ wɔyɛ la ɛ?

⁷Ɔluakɛ mɔɔ wɔ ɛlalɛhanlɛ ɛlɛso la, ɛnee wɔ ɛdendɛlɛ mgbane mgbane ne mɔ ɛlɛso;[2] wɔmɔ sulo Nyamenle.

⁸Saa ɛnwu kɛ maanzinli bie anu bɛlɛsisi ehyianvolɛma, bɛnli pɛlepɛle bɛmmaa bɛ, yɛɛ bɛmmaa bɛ nwo ɛndɔ bɛ a, mmamaa ɔyɛ wɔ azibɛnwo, ɔluakɛ kpanyinli biala lɛ kpanyinli mɔɔ sie ɔdaye, yɛɛ bɛ mu nwiɔ bɛlɛ mgbanyinli mɔɔ sie bɛ a.

⁹Noko ɛhye mɔ amuala bɔbɔ, belemgbunli ati zɔ egyinli ne mɔ anu bɛyɔba ne mɔ.

¹⁰Sonla mɔɔ anye bolo ezukoa la akunlu ɛndwo ye ezukoa nwo ɛlɛ; yɛɛ mɔɔ anye bolo anwonyia la akunlu ɛndwo mɔɔ yenyia ye la anwo. Ɛhye noko le debie mgbane.

¹¹Saa aleɛ bu a, menli dɔɔnwo nyia bie di. Nvasoɛ mɔɔ aleɛ menle ne nyia ye la a le kɛ ɔnwu kɛ bɛlɛdi.

¹²Saa gyimayɛvo nyia aleɛ dɔɔnwo di anzɛɛ yeannyia ye dɔɔnwo yeanli bɔbɔ a, ɔdafe botoo; na sukoavolɛ, kanza aleɛ bu ɔ nwo zo bɔbɔ a, adwenleadwenle ɛmmaa ɔnla.

¹³Menwu munzule kpole bie wɔ aleɛabo: sonla fa ye ezukoa sie toonwo maa ezukoa ne kakyi ɔ kɔme nu munzule.

¹⁴Ɔyɛ ezukoa ne mgbane mgbane ɔmaa ɔ muala fi ɔ sa; ɔle selɛ, ɔlɛ ɔ ra nrenya, noko ɔ sa nu fuenyi.

¹⁵ Kɛ sonla zile vi ɔ nli akunlu rale la yɛɛ ɔbazia yeahɔ a. Ɔlɛ ɔ nwo zɔhane a ɔrale a, yɛɛ ɔnrɛva ye gyima mɔɔ yeyɛ la anu debie ɔnrɛlɛ ɔ sa nu ɔnrɛhɔ.

¹⁶Ɛhye noko le munzule kpole. Kɛ sonla zile rale la, zɔhane ala yɛɛ ɔbahɔ a. Na duzu nvasoɛ yɛɛ ɔnyia ye kɛ ɔkye anwoma a?

¹⁷Sonla bɔ ye ɛbɛla ne kɔsɔɔti wɔ awozinli nee nyane, akpule, ɛya nee anwonyane nu.

¹⁸Nea, debie mɔɔ menwu ye la a le kɛ: mekɛ ezinraa ɛhye mɔɔ Nyamenle ɛva ɛmaa sonla la, ɔle kpalɛ kɛ ɔkɛli, ɔkɛnlo na ɔkɛlielie ɔ nye wɔ ɔdaye ɔ sa anloa gyima mɔɔ yeyɛ la anwo, ɔluakɛ ɛhye a le sonla afoa nu ɛdeɛ a.

¹⁹Saa Nyamenle maa sonla anwonyia nee agyadeɛ nee tumi kɛ ɔva ɔlie ɔ nye, na ɔzɔ ye kyɛfoa nu, ɔnyia anyelielɛ wɔ ye gyima nwo a, ɛnee nwu ye kɛ ɔle Nyamenle ahyɛlɛdeɛ.

²⁰Ɔluakɛ sonla zɛhae ɛnrɛdwenle ye ngoane mekɛ nwo dɔɔnwo, ɔboalekɛ Nyamenle bamaa yeahɔ zolɛ yealie ɔ nye.