Read Nzema Sɔl 4 Bible Online

Sɔl 4 - Nzema bible

Sɔl 4

¹Nea, ɛ nwo yɛ fɛ, me kulovolɛ, nea, ɛ nwo yɛ fɛ! Ɛ nye ma le kɛ abubule ɛdeɛ ne wɔ ɛ ti aguzo ne abo. Wɔ enrinli dwazo senreleenyi kɛ mbɔnkye ekpunli mɔɔ vi Geleade awoka zo ɛlɛtolo la enrinli.

²Ɛ gye le nwohyee kɛ mboane mɔɔ bɛpepɛ bɛ enrinli, na bɛvi ɛleka mɔɔ bɛbiale bɛ la bɛra la. Ko bɔbɔ ɛtɛtule, bɛ muala bɛsɛ sɛsɛ.

³Ɛ nloa babonle ne bolo kɛ nyɛma kɔkɔlɛ, yɛɛ ɛ nloa mumua ne nee ɛdendɛlɛ le kɛnlɛma. Ɛ nvoka le kɛ akutue mɔɔ bɛkpuke nuhua wɔ ɛ ti aguzo ne abo.

⁴Ɛ kɔme tendenle le kɛ Devidi tawa ne mɔɔ bɛfa konle ninyɛne bɛsie nu, enyinlike apenle hendɛhenda nu, bɛ muala bɛle katakyiema enyinlike.

⁵Ɛ nyɛfo nwiɔ ne le kɛ weɛlɛ ngakula nwiɔ, ahɛtɛboɛ ndalɛ mɔɔ didi aloa avinli.

⁶Kyesɛ aleɛ kye na awozinli ne se, mebavo alufuanlɛ boka ye nee ɛyɛlɛ evuanlɛ boka ekyi ye azo.

⁷Ɛ nwo yɛ fɛ vi wɔ anwuma dwu aze, me kulovolɛ, ɛdi munli bɔkɔɔ.

⁸Fi Lɛbanɔn awoka ne mɔ azo maa yɛhɔ, me atɔfolɛ raalɛ; fi Lɛbanɔn maa yɛhɔ. Ɛvi Ameena Boka ne azo dwu aze, fi Sinɛ Boka nee Hɛmɔn Boka, ɛleka mɔɔ awenade nee boboduma ngome ɛva ɛyɛ bɛ ɛdeɛ la.

⁹Saa menea ɛ nye ma, me diema raalɛ, me atɔfolɛ raalɛ, nee ndweabane mɔɔ gua ɛ kɔme la a, me ahonle di pe pe pe,

¹⁰Wɔ ɛhulolɛ yɛ fɛ me diema raalɛ, me atɔfolɛ raalɛ. Wɔ ɛhulolɛ yɛ fɛ tɛla nwanye; wɔ nwole ne mɔ bɔ evuanlɛ tɛla aledonlɛ ninyɛne evuanlɛ biala.

¹¹Me atɔfolɛ raalɛ, ɛ nloa anwo fɛlɛko le kɛ ndotolo nu nzule fɛlɛko, wolɛ nee meleke wɔ ɛ tafinlima abo; wɔ adɛladeɛ nu evuanlɛ le kɛ evuanlɛ mɔɔ vi Lɛbanɔn.

¹²Me diema raalɛ, me atɔfolɛ ne le tola mɔɔ apipi la ɔ nloa, nzufeanvea mɔɔ bɛdo nuhua.

¹³Nuhua mbaka le kɛ akutue, bɛle ngɛnlɛma, bɛ ma yɛ fɛ, mbaka evuanlɛ hɛna nee naade,

¹⁴naade nee safolɔn, kalamɛse nee senamɔn, nee ɛyɛlɛ evuanlɛ mbaka kɔsɔɔti, alufuanlɛ nee kolɔbo, nee aledonlɛ ninyɛne kpalɛ,

¹⁵nzufeanvea, ngoane nzule bula, yɛɛ Lɛbanɔn azule se dua tola ne anu.

¹⁶Dwazo! O Sɔlɔ Anwoma, O Nyiakɛ Anwoma, bɔ bɛla! Bɔ me tola ye anu maa nuhua evuanlɛ ne ɛdwu moa. Maa me kulovolɛ ne ɛrɛla ye tola ye anu, ɛrali nuhua ma fɛlɛko ne mɔ.