Read Nzema Sɔl 6 Bible Online

Sɔl 6 - Nzema bible

Sɔl 6

¹Anwofɛlɛko nu anwofɛlɛko, nienwu a wɔ kulovolɛ ne ɛhɔ a? Kile yɛ ɛleka mɔɔ ɔvale la, amaa yɛ nee wɔ ahɔkpondɛ ye.

²Me kulovolɛ ne ɛhɔ ye tola nu lɔ, kofie ne mɔ mɔɔ mbaka evuanlɛ ne mɔ wɔ zo la, kɛ ɔkamaa ye nyɛmoa adidi tola ne anu, na yeatete aloa.

³Me kulovolɛ ne le me ɛdeɛ, yɛɛ mele ye ɛdeɛ; ɔmaa ye nyɛmoa didi aloa ne mɔ avinli.

⁴Me kulovolɛ, ɛ nwo yɛ fɛ kɛ Gyɛlusalɛm la, ɛ nwo yɛ anyelielɛ kɛ suakpole Tɛza la, ɛ nwo ka ɛzulolɛ kɛ ɛlɔnema mɔɔ dedɛ avɛlɛnra la.

⁵Ye ɛ nye wɔ me nwo, ɔluakɛ bɛmaa debie tɔ me nwo zo. Wɔ enrinli dwazo senreleenyi kɛ mbɔnkye ekpunli mɔɔ vi Geleade awoka zo ɛlɛtolo la enrinli.

⁶Ɛ gye le nwohyee kɛ mboane mbelɛ mɔɔ bɛhɔbia bɛ bɛra la. Ko bɔbɔ ɛtɛtule; bɛ muala bɛsɛ sɛsɛ.

⁷Ɛ nvoka le kɛ akutue ma mɔɔ bɛkpuke nuhua, wɔ ɛ ti aguzo ne abo,

⁸Belemgbunli gya mraalɛ abulasia, ye mgbɔnla abulatwɛ, yɛɛ sonvolɛ mraalɛ dɔɔnwo mɔɔ bɛnze bɛ nloa.

⁹Me abubule ne mɔɔ di munli la le kokye. Yemɔ a ɔ nli kulo ye kpalɛ a, mɔɔ wole ye la anye zo a ɔ nwo ɛnlɛ dɛne. Sonvolɛ mraalɛ ne nea ye na bɛkanvo ye; arelemgbunli mraalɛ nee mgbɔnla ne mɔ noko nea ye na bɛye ye ayɛlɛ.

¹⁰Nwane ɔ, mɔɔ ɔ nye pɛ kɛ aleɛbahye la? Ɔle kɛnlɛma kɛ siane, na ɔta kɛ sɛnzɛne, ɔ nwo ka ɛzulolɛ kɛ ɛlɔnema mɔɔ dedɛ avɛlɛnra la.

¹¹Mengɔle mbakama egyinli ne anu, kɛ mekanlea mbaka mɔɔ wɔ bɔnza ne anu la, saa vanye mbaka ne mɔ ɛyeye nya, na mbaka ne mɔ mɔɔ so ma kɛ akutue la ɛbɔ ndotolo a.

¹²Me nye zo katete me la ɛnee ɛhulolɛ ngome ɛmaa meyɛ kɛ mede belemgbunli ehwili nu wɔ ɔ nwo ɛkɛ.

¹³Sia ɛ nzi, sia ɛ nzi, wɔmɔ bɛlɛra mɔɔ ɛvi Hyulam, sia ɛ nzi, sia ɛ nzi maa yɛnlea wɔ bie. Duzu ati a bɛkulo kɛ bɛnea me kɛ bɛnea agolezilɛ wɔ ɛlɔnema nwiɔ avinli ɛ?