Read Nzema Sɔl 7 Bible Online

Sɔl 7 - Nzema bible

Sɔl 7

¹Duzu nwanwane bɛlɛra a le wɔ, mɔɔ ɛ gyakɛ nee mgbɔlaboa di zɛhae a? Wɔ ɛzɔlɛ bolomolo ne mɔ le kɛ mgbɔba, bɛ ngɛnlɛma le kɛ dwinvolɛ kpalɛ sa anloa gyima.

²Ɛ kotoa le kɛ kyɛnze bonkuma kutukpunli mɔɔ nwanye evuanlɛ ɛmkpa nuhua ɛlɛ. Ɛ ko ɛzɛne le hwiiti edukue mɔɔ aloa ɛbɔ ɛyia ye.

³Wɔ mgbokua nwiɔ ne le kɛ weɛlɛ ngakula nwiɔ, bɛle kɛ ahɛtɛboɛ ndalɛ.

⁴Ɛ kɔme le kɛ ɛzɛlɛ tawa. Ɛ nye le kɛ suakpole Hɛhyebɔn nzubula ne mɔ mɔɔ zua suakpole ne anlenkɛ kpole ne la. Ɛ bonyi le hwɛɛnye kɛ Lɛbanɔn tawa mɔɔ ɛ gyi zo a ɛnwu Dɛmasekɛse la.

⁵Ɛ ti kɛnlɛma le kɛ Kamɛle Boka. Ɛ ti mɔɔ bɛnwa la ta kɛ selekye; ye kɛnlɛma maa debie tɔ belemgbunli nwo zo.

⁶Ɛle kɛnlɛma, ɛ nwo yɛ anyelielɛ, O kulovokpa, anyelielɛ bɛlɛra.

⁷Ɛgyi zo sengɔɔnwo kɛ arɛlɛ eluba, wɔ mgbokua le kɛ ye betike ne mɔ.

⁸Mebavo arɛlɛ ne na meazɔ ye mrɛlakɛ ne mɔ anu. O, anrɛɛ wɔ mgbokua ayɛ kɛ vanye aziakɛ, na wɔ ɛnwomenle evuanlɛ ɛyɛ kɛ ampolo,

⁹na ɛ nloa anwo ayɛ fɛ kɛ nwanye kpalɛ fɛlɛko mɔɔ kpula ɛnloanlɛ nee egyele, na ɔdwu ɛkolɛ nu bɛtɛɛ. Akee maa nwanye ne ɛdwu me kulovolɛ ne ɛkɛ, ɔze ɔ nloa anwo nee ɔ gye zo.

¹⁰Mele me kulovolɛ ne ɛdeɛ, yɛɛ ɔkulo me ɛsesebɛ.

¹¹Me kulovokpa, bɛla maa yɛhɔ ɛya ne anu lɔ, na yɛhɔli aledwolɛ ne wɔ namunamu ne mɔ anu.

¹²Yɛbadwazo ndɛ yɛahɔ vanye egyinli ne mɔ anu yɛahɔnlea saa vanye mbaka ne mɔ ɛyeye nya, saa bɛ ndotolo ne mɔ ɛkpukekpuke, na mbaka mɔɔ le kɛ akutue la ɛbɔ ndotolo a. Na ɛkɛ ne yɛɛ mebava me ahonle kɔsɔɔti meamaa wɔ a.

¹³Mandileki ne mɔ evuanlɛ ba, ma fɛlɛko, dɛba nee fofolɛ kɔsɔɔti wɔ yɛ sua nu ɛke. O me kulovokpa, meva ɛhye mɔ kɔsɔɔti mezie wɔ.