Read Nzema Aye 1 Bible Online

Aye 1 - Nzema bible

Aye 1

¹ Emɔzo ara nrenya Ayezaya ɛnyelɛzodeɛnwunlɛ ne mɔɔ Nyamenle yele hilele ye, mɔɔ fane Dwuda nee Gyɛlusalɛm anwo wɔ mekɛ mɔɔ ɛnee Dwuda Arelemgbunli Ɛzaya, Dwotam, Ehaze, yɛɛ Hɛzikaya di ebia la ɛne.

²Ɛdɛnkɛma zele kɛ, “Anwuma amra, bɛdie, aze amra, bɛyɛ ɛnzonlɛ bɛdie, ɔluakɛ medame Ɛdɛnkɛma, mese: Metete ngakula mrenya memaa bɛnyi, na bɛde me nwo atua.

³Ɛnlankɛ ze ɔ menle, asoaso ze ɛleka mɔɔ ɔ menle maa ye aleɛ la; na Yizilayɛma, mɔɔ le medame me menli la ɛnze me, yɛɛ bɛnlɛ ndelebɛbo.”

⁴Aa, maanle mɔɔ ɛtane ɛyi ye tɛkɛɛ a, menli mɔɔ ninyɛndane ɛyɛlɛ ɛli bɛ ti a, esiayɛɛ mralɛ, menli mɔɔ nzisi ala a bɛdi a, bɛbɔ munzule! Bɛkpo Ɛdɛnkɛma, bɛhyi Yizilayɛ Nwuanzanwuanza Ko ne, na bɛhakyi bɛ nzi bɛzi ye bɔkɔɔ.

⁵Fane nyɛ yɛɛ bɛkpondɛ kɛ bɛtea bɛ kolaa na bɛagyakyi atuadelɛ a? Bɛ ti kanrɛlɛ mumua ne ɛnde kpɔkɛ, yɛɛ bɛ ahonle ɛwu.

⁶Ɔvi bɛ gyakɛ akunlu toonwo mɔɔ kɔdwu bɛ ti zo la ɛkpɔdekpɔde ɛyɛ nganlɛ ngome na bɛtwihwi mogya; ɛhye ati bɛnde kpɔkɛ. Bɛmɛ a, bɛmmia, yɛɛ bɛnkyekye zo, yɛɛ bɛnva nwole bɛntoto nu.

⁷Bɛ maanle ne ɛdɔ mgbane, bɛyela bɛ azuamgbole ne mɔ; bɛdabɛ bɛ nye zo, nyɛvolɛ ɛva bɛ azɛlɛ ne, bɛzɛkye debie biala mɔɔ wɔ zolɛ la.

⁸Gyɛlusalɛm ala a ɛha kɛ vanye egyinli nu kpɔda anzɛɛ ndɔlɔra avule nu kpɔda, na yeyɛ kɛ suakpole mɔɔ ɛlɔnema ɛbɛnra ɛyia ye la.

⁹ Saa Tumivolɛ Ɛdɛnkɛma anvavi, angyakyi yɛ menli ekyi a anrɛɛ yɛyɛle kɛ Sodɔm nee Gomɔla la.

¹⁰Bɛmɛ Gyɛlusalɛmma, mɔɔ bɛyɛ kɛ Sodɔm nee Gomɔla amra la, bɛyɛ ɛnzonlɛ bɛdie Ɛdɛnkɛma edwɛkɛ ne nee ye ngilehilelɛ ne.

¹¹ Ɔse, “Bɛ azubɔlɛ bebelebe ne ɛnzɔ me nye. Bɛ mboane ɛyelalɛ azubɔdeɛ ne mɔ nee bɛ nane mɔɔ ɛlɔ la anu ɛnlome azubɔdeɛ ne mɔɔ bɛfa bɛmaa me la ɛyɛ boɛ. Me nye ɛnlie nlankɛ, mboane mralɛ anzɛɛ mbɔnkye nyinli mogya nwo bieko.

¹²Nwane a hanle hilele bɛ kɛ saa bɛba me nyunlu a bɛsisi bɛ gyakɛ aze wɔ me Ɛzonlenlɛ Sua ne anu a?

¹³Bɛmmafa azubɔdeɛ mgbane biala bɛfinde me nyunlu; mekyi bɛ ɛyɛlɛ evuanlɛ ne. Memkpondɛ kɛ menwu Siane Fofolɛ Ɛvoyialilɛ ne nee bɛ Ɛnwomenlelielɛ Kenle ɛzonlenlɛ ne mɔ. Memkpondɛ kɛ menwu ɛtanema ayia biala.

¹⁴Mekyi bɛ Siane Fofolɛ Ɛvoyialilɛ ne nee bɛ ɛvoyia mɔɔ ɛha la kɔsɔɔti. Bɛbu me kɔme, mengola bɛ soa bieko.

¹⁵“Saa bɛtɛlɛ bɛ sa nu kɛ bɛyɛ nzɛlɛlɛ a, mebaye me nye meado ɛbɔ nu. Bɛyɛ nzɛlɛlɛ dɔɔnwo kɛyɛ nyɛ bɔbɔ a, menrɛdie. Bɛ sa anwo le mogya ngome.

¹⁶Bɛbia bɛyɛ bɛ nwo bɔkɔbɔkɔ, bɛye ɛtane biala mɔɔ wɔ bɛ ɛbɛla nu la bɛvi me nye zo. Bɛgyakyi ɛtaneyɛlɛ,

¹⁷bɛzukoa boɛlilɛ, bɛkpondɛ pɛlepɛlelilɛ bo zo, bɛgyakyi nzisililɛ, bɛlie mɔɔ ɛnlɛ ɔ ze la ati, na bɛkpa ahunlanvolɛ ti kyɛlɛ bɛmaa bɛ.”

¹⁸Ɛdɛnkɛma se, “Bɛrɛla bɛmaa yɛbɔ yɛ avinli, bɛ ɛtane ne mɔ ɛla zo kɛ ɛbenle bɔbɔ ɛdeɛ, noko bɛbayɛ fufule kɛ ezukɔtweaba. Bɛ ɛtane ne mɔ ɛbolo kɛ ebo bɔbɔ ɛdeɛ, noko bɛbayɛ nwohyee kɛ boane enrinli.

¹⁹Saa bɛkponle zo, bɛyɛ tieyɛ a, bɛbali debie kpalɛ biala mɔɔ wɔ azɛlɛ ne azo la bie.

²⁰Na saa bɛkpo na bɛte atua a bɛbawu dadeɛ nloa. Medame Ɛdɛnkɛma a meha a.”

²¹Nea kɛ nɔhavoma suakpole ne ɛnɛ ɛhakyi tuutuuma suakpole a. Anrɛɛ bɛdi pɛlepɛle wɔ zolɛ! Anrɛɛ tenleneyɛlɛ ɛyi ye tɛkɛɛ, na ɛnɛ, ahɔdiawu ɛyi ye tɔ.

²²Bɛ dwɛtɛ fufule nwo ɛnlɛ nvasoɛ, bɛ nwanye ɛyɛ nzule nzule.

²³Bɛ arelemgbunli le atuadelɛma yɛɛ bɛva nwule agɔnwolɛ. Awie biala kulo ndoloboa yɛɛ bɛpele bɛkpondɛ ahyɛlɛ ninyɛne. Bɛnlie mɔɔ ɛnlɛ ɔ ze la ati, yɛɛ bɛndwenle ahunlanvolɛ mraalɛ ne mɔ anwo.

²⁴Yemɔti Ɛdɛnkɛma, Tumivolɛ Ɛdɛnkɛma, Yizilayɛ Katakyie Ko ne se, “Aa, akee mebawola me ɛya ne meagua me kpɔvolɛma ne anwo zo, na meali menli mɔɔ kyi me la nzenralɛ.

²⁵Mebava me sa meazie ɛ nwo. Mebaye evinli nee debie mgbane biala mɔɔ wɔ wɔ nuhua la.

²⁶Mebava wɔ ndɛnebuavolɛma ne meamaa wɔ kɛ alumua ne la, na meamaa wɔ folɛdulɛma, kɛmɔ alumua ne ɔde la. Na nzinlii bɛbavɛlɛ wɔ suakpole mɔɔ tenleneyɛlɛ nee nɔhalɛlilɛ ɛyi ye tɛkɛɛ a.”

²⁷Bɛbava pɛlepɛlelilɛ bɛalie Gyɛlusalɛm na bɛava tenleneyɛlɛ bɛalie bɛdabɛ mɔɔ bɛkɛnlu bɛ nwo la.

²⁸Bɛbazɛkye ɛtanema nee atuadelɛma, na bɛahu menli mɔɔ kpo Ɛdɛnkɛma la amuala.

²⁹Ɔbayɛ bɛ nyiane kɛ bɛ nye liele oku mbaka nu a, yɛɛ bɛ nye banwoso wɔ tola ne mɔ mɔɔ bɛhyele la anwo.

³⁰Ɔluakɛ bɛdabɛ mumua ne bɛbayɛ kɛ oku baka mɔɔ ye nya ɛnwoso la anzɛɛ tola azɛlɛ mɔɔ nzule ɛnle nu la.

³¹Bɛdabɛ mɔɔ bɛ nwo yɛ se la, bɛbahwenle bɛ aze, na bɛ nyɛleɛ bayɛ senle mgbomgbɔ ayela bɛ nee bɛ gyima, na awie ɛnrɛhola ye nua.