Read Nzema Aye 10 Bible Online

Aye 10 - Nzema bible

Aye 10

¹Munzule ɛha bɛdabɛ mɔɔ bɛdi amumuyɛ mɛla bɛfa bɛsisi me menli ne la; nee bɛdabɛ mɔɔ bɛtɛnla aze bɛkɛlɛ nzisi mɛla la.

²Bɛyɛ ɛhye bɛfa bɛsisi menli mɔɔ ɛhyia la, yɛɛ bɛnli pɛlepɛle bɛmmaa me menli ne anu ehyianvolɛma. Bɛyɛ ɛhye amaa bɛakpokpo ahunlanvolɛ mraalɛ na bɛaza mɔɔ ɛnlɛ ɔ ze la bɛalie ye ninyɛne.

³Saa Nyamenle ndeanlɛ mekɛ ne dwu na ahumu ne mɔɔ vi moa nehane bara la dwazo a duzu a bɛkɛyɛ a? Nienwu yɛɛ bɛbabɔ bɛ ti a, yɛɛ nienwu a bɛbagyakyi bɛ anwonyia ne mɔ a?

⁴Bɛyɛ bɛ nwo ɛhwee a ɔnrɛyɛ boɛ, kyesɛ bɛboka menli mɔɔ bɛhye bɛ nuokɛ la anwo anzɛɛ bɛboka bɛdabɛ mɔɔ bɛhu bɛ la anwo. Ɛhye mɔ anzi, Ɛdɛnkɛma ɛya ne ɛnrɛdwo; ɔbahɔ zolɛ yeadenrɛ ɔ sa yeadea bɛ.

⁵Ɛdɛnkɛma se, “Aa, Aselea, ɔle me baka nee me kpɔma mɔɔ mefa ɛya a

⁶mefa metea maanle mɔɔ ɛnze Nyamenle la, yɛɛ eza mesoa ye wɔ menli mɔɔ menwɔva bɛ nwo ɛya la anwo zo, memaa ɔkɔbo bɛ ɔsa bɛ ɔdie bɛ nwo ninyɛne, na ɔtietia bɛ nwo zo kɛ guabile zo ndɛtɛlɛ la.”

⁷Noko Aselea Maanle Maanle belemgbunli ne ɛndwenle ye zɔhane, ɔdaye ɔlɛ ye adwenle ɛdeɛ. Ye adwenle a le kɛ ɔsɛkye maanle maanle ne mɔ amuala,

⁸ɔluakɛ ɔse, “Asoo me safohyenlema mgbanyinli ne mɔ amuala ɛnle arelemgbunli?

⁹Asoo metɛyɛle suakpole Kaleno kɛ menyɛle Kaakɛmehye la? Asoo metɛyɛle Heemate kɛ menyɛle Aapade la? Asoo metɛkonle metɛfale Samɛlea, kɛmɔ menvale Dɛmasekɛse la?

¹⁰Kɛ menyɛle mɔɔ me sa homonle maanle maanle mɔɔ lɛ awozonle mɔɔ bɛ ananze mɔɔ bɛgua la zonle tɛla Gyɛlusalɛm nee Samɛlea ɛdeɛ ne mɔ,

¹¹nee kɛ menzile menyɛle Samɛlea nee ye mmonle ananze ne mɔ la, asoo tɛ zɔhane ala yɛɛ mebava meayɛ Gyɛlusalɛm nee ye mmonle ne mɔ a?”

¹²Na Awulae zele me kɛ, “Saa mewie me gyima muala yɛ wɔ Zayɔn Boka nee Gyɛlusalɛm a, mebadea Aselea belemgbunli ne nee ye adubɛnwo funli ne mɔɔ ɔlɛfa yeadu ɔ nloa anu nee ɔ nwo zo mɔɔ ɔlɛmemaa la.”

¹³Aselea belemgbunli ne tu ɔ nloa anu kɛ, “Medame me anwosesebɛ nee me nrɛlɛbɛ yɛɛ meva meyɛ ɛhye a, ɔluakɛ melɛ ndelebɛbo. Medudu maanle maanle ɛweɛne ne mɔ megua, meza bɛ melie bɛ gya nu ninyɛne kɔsɔɔti; meyɛ me nwo ɛnlankɛ nyinli meha bɛdabɛ mɔɔ bɛdede arelemgbunli mbia zo la megua.

¹⁴Medo me sa maanle maanle mɔɔ wɔ ewiade la anwonyia nu, na ɔle kɛ me sa la anloma sane nu. Mefulovula bɛ anwonyia ne mɔ kɛ menli sesa anloma sane nu aholonvia mɔɔ anloma ne ɛdu ɛhɔ ɛgyakyi bɛ la. Meva me sa metoto maanle maanle kɔsɔɔti gya nu. Awie ɛmbuke ɔ nloa na yeayɛ ɔ nwo ɛhehanlɛ.”

¹⁵Ɛdɛnkɛma ɛlɛbiza kɛ, “Asoo akuma baha kɛ ɔ nwo yɛ se tɛla ahenle mɔɔ ɛlɛfa ye abu baka la? Asoo sɛlada bamemaa ɔ nwo zo ahile ahenle mɔɔ ɛlɛfa ye apɛ baka la? Asoo baka anzɛɛ kpɔma kola sonla zo maa? Sonla a maa baka anzɛɛ kpɔma zo a.”

¹⁶Zɔhane ati Awulae, Tumivolɛ Ɛdɛnkɛma bamaa ewule adɔ ye ɛlɔnema mɔɔ te kpɔkɛ la anwo yeamaa bɛanwa, na ye anyunlunyia ne bamaa bɛ nwo adwe bɛ kɛ bɛgua senle nu.

¹⁷Yizilayɛ wienyi ne bayɛ senle; Yizilayɛ Nwuanzanwuanza Ko ne bayɛ senle tafinlima ayela mbowule nee mbowunzaka kenle kokye yeamaa bɛadɔ nzonle.

¹⁸Ye azɛlɛ kɛnlɛma ne nee zolɛ mbaka ngɛnlɛma ne mɔ, Ɛdɛnkɛma bazɛkye bɛ, ɔbazɛkye ɛkɛla nee nwonane muala. Na ɔbayɛ kɛ sonla mɔɔ anwonyane ɛbɔ ye na yenwa la.

¹⁹Mbaka mɔɔ baha ye kpɔkɛ nu la bayɛ ekyi bie mɔɔ kakula kola bɛ tia a.

²⁰Mekɛ ne anu, Yizilayɛma mɔɔ ɛha, nee Gyekɔbo sua nu amra mɔɔ vile ɛsalɛ la ɛnrɛva bɛ rɛle ɛnrɛwula mɔɔ sisile bɛ la anu, na bɛbava bɛ rɛle bɛawula Ɛdɛnkɛma, Yizilayɛ Nwuanzanwuanza Ko ne anu nɔhalɛ nu.

²¹Bɛdabɛ mɔɔ bɛhale, mɔɔ le Gyekɔbo abo zo amra la anu bie mɔ bazia ara Nyamenle bedevinli ne ɛkɛ.

²² Ɔluakɛ saa wɔ menli Yizilayɛma anwo zonle kɛ ɛnweazo anwea bɔbɔ a, bɛdabɛ mɔɔ bɛhale la anu ekyi bie a bazia ara a. Ɛdɛnkɛma ɛbɔ kpɔkɛ kɛ ɔsɛkye bɛ, na bɛbalua pɛlepɛlelilɛ zo a bɛazɛkye bɛ a.

²³Ɔluakɛ Awulae Tumivolɛ Ɛdɛnkɛma bamaa ɔ muala ara awieleɛ, kɛmɔ yehyehyɛ yedo ewiade ye amuala la.

²⁴Awulae, Tumivolɛ Ɛdɛnkɛma se, “O me menli mɔɔ de Zayɔn, saa Aseleama fa bɛ mbaka ba bɛ nwo zo, bɛlɛsisi bɛ, kɛmɔ Yigyibitima yɛle la a, bɛmmasulo.

²⁵Ɔluakɛ ɔnrɛhyɛ biala na me ɛya ne mɔɔ meva ye bɛ nwo la adwo, na meava ɛya meadea Aseleama.

²⁶Na medame Tumivolɛ Ɛdɛnkɛma, mebaheha me nwo meatia Aseleama na meabila bɛ, kɛmɔ bɛdabɛ bɛbilale Medeanema wɔ Olɛbe Bodane ne anwo la. Me baka ne badende adwu nyevile nu na meanloma bɛ, kɛmɔ menyɛle Yigyibitima la.

²⁷Mekɛ ne anu, mebaye ye kpomgbolo ne bɛ kɔme na meabubu ye gyɛnvayile ne mɔɔ la bɛ kɔme zo la.”

²⁸Kpɔvolɛ ɛlɔnema vi Relemɔn ɛrava Eyae na bɛtele zolɛ bɛdwu Megelɔn. Ɛlɔnema ne ɛgyakyi bɛ ninyɛne wɔ Mekemahye;

²⁹bɛpɛ ademgbole ne bɛhɔla Giba. Menli mɔɔ wɔ Releema la ahonle ɛdu, yɛɛ Belemgbunli Sɔɔlo sua zo Gebɛyama ɛgua ɛbɔ nu.

³⁰O Galemma, bɛdea! Bɛdeɛdea nu! Bɛdie, O Leeyehyema! Anatoma, bɛbua ye!

³¹Mademinama ɛgua ndwɛlɛ aze, yɛɛ menli mɔɔ wɔ Gibem la ɛlɛnriandi alie bɛ nwo.

³²Ɛnɛ kenle ye, kpɔvolɛ ɛlɔnema ne baragyinla Nɔɔbo, bɛbazua bɛ ahɛlɛ ne wɔ Zayɔn Boka, suakpole Gyɛlusalɛm anwo zo.

³³Bɛnlea, Awulae, Tumivolɛ Ɛdɛnkɛma bava tumi kpole aha bɛ agua kɛ bɛdwɔlɔdwɔlɔ baka ngane la. Mɔɔ ɛnyi tendenle kpalɛ la, ɔbapɛ ye yeado na yeaha mɔɔ memaa ɔ nwo zo la aze.

³⁴Ɔbava akuma yeaha kpɔkɛmile ne yeagua, na bɛazɛkye Lɛbanɔn nee ye mbaka ngɛnlɛma ne mɔ.