Read Nzema Aye 11 Bible Online

Aye 11 - Nzema bible

Aye 11

¹ Gyɛsi dosinli ne (Belemgbunli Devidi), bakpuke ɛnyelɛ wɔ ye ndinli ne mɔ anu anyi ayɛ Baka Ɛhane.

²Ɛdɛnkɛma Sunsum ne bara ɔ nwo zo, ɔbanwu nrɛlɛbɛ, yeanyia ndelebɛbo, ɔbanyia anwosesebɛ, yeayɛ folɛtuvolɛ, ɔbanyia adwenle na yeazulo Ɛdɛnkɛma.

³Ɔbava anyelielɛ yeayɛ tieyɛ yeamaa Ɛdɛnkɛma, ɔnrɛbua ndɛne ɛnyelɛzo, yɛɛ ɔnrɛhyea ɔ nzo ɔnrɛbua ndɛne.

⁴ Ɔbabua ehyianvolɛma ndɛne pɛlepɛle nu, na yeabua awienvolɛma ndɛne pɛpɛ; ɔbava ɔ nloa yeayɛ baka yeadea azɛlɛ ye azo ɛtanema, yeava ɔ nloa edwɛkɛ yeahu amumuyɛma.

⁵ Ɔbava pɛlepɛlelilɛ yeayɛ akyeso yeahye ɔ nze zo, na yeava nɔhalɛlilɛ yeayɛ tabule mɔɔ hye ye avinli.

⁶ Bedi nee boane ralɛ badɛnla, yɛɛ boboduma nee abɔnkye ralɛ bala ɛleka ko. Ɛnlankɛ ralɛ nee awenade babɔ nu adidi, na kakula yɛɛ banlea bɛ nwo zo a.

⁷Ɛnlankɛ nee ezizile babɔ nu adidi, bɛ mra babɔ nu ala ɛleka ko, na awenade bali ndile kɛ ɛnlankɛ ralɛ la.

⁸Kakula mɔɔ la nyɛfonlɛ nloa la nee ɛwɔlɛ bali nwɔhoa, yɛɛ kakula mɔɔ ɛdudu agyakɛ la bava ɔ sa awula bɔna bɔne nu.

⁹ Bɛnrɛboda anzɛɛ bɛnrɛhu awie wɔ me boka nwuanzanwuanza ne azo, ɔluakɛ Ɛdɛnkɛma anwo adwenle bayi azɛlɛ ye tɛkɛɛ kɛ nzule mɔɔ wɔ nyevile nu la.

¹⁰ Mekɛ ne anu Belemgbunli Devidi abo zo sonla ne bagyinla kɛ sɛkɛlɛneɛ la yeamaa maanle maanle. Maanle maanle bakpondɛ ye, na ɛleka mɔɔ ɔde la bayɛ anyelielɛ.

¹¹Mekɛ ne anu Awulae badenrɛ ɔ sa bieko yealie Yizilayɛma mɔɔ ɛha la yeavi Aselea, Yigyibiti, Patelɔso, Sudan, Yilam, Babelonia, Heemate, yɛɛ bɛdabɛ mɔɔ bɛwɔ ɛnweanloa la asa anu.

¹²Ɛdɛnkɛma bamaa maanle maanle ne mɔ sɛkɛlɛneɛ yeahile kɛ ɔlɛboɔboa Yizilayɛma mɔɔ bɛmbu bɛ bie, nee Dwudama mɔɔ ɛkponde la anloa yeavi azɛlɛ ye muleɛ nna ne mɔ azo yeara.

¹³Yifelaem anyebolo ne bavi ɛkɛ, bɛdabɛ mɔɔ bɛgyegye Dwuda la bɛbazɛkye bɛ; Yifelaem anye ɛnrɛbolo Dwuda, yɛɛ Dwuda ɛnrɛgyegye Yifelaem bieko.

¹⁴Bɛbabɔ nu bɛara Filisitiama anwo zo wɔ adɔleɛ, yɛɛ bɛbabɔ nu bɛarave menli mɔɔ wɔ aduduleɛ la ninyɛne. Bɛbaho bɛava Yidɔm nee Mowabe, yɛɛ Amɔnoma bayɛ tieyɛ amaa bɛ.

¹⁵ Ɛdɛnkɛma bazɛkye Suwɛze Ebolo ne bɔkɔɔ na yeanwɔha ɔ sa wɔ Azule Yufileti ne azo yeamaa anwoma wuluwulu arasesa ye. Ɔbahyɛ nu nsuu yeamaa menli alua azɛlɛ resee zo apɛ.

¹⁶Bɛbakpakye ademgbole bɛavi Aselea bɛahɔva Yizilayɛma mɔɔ ɛha la, kɛmɔ ɔyɛle ɔmanle bɛ nlenya mɔ Yizilayɛma wɔ mekɛ mɔɔ ɔyele bɛ ɔvile Yigyibiti azɛlɛ zo la.