Read Nzema Aye 12 Bible Online

Aye 12 - Nzema bible

Aye 12

¹Mekɛ ne anu ɛbaha kɛ, “O Ɛdɛnkɛma, mebayɛ wɔ mo, ɔluakɛ ɛvale me nwo ɛya bɔbɔ ɛdeɛ, noko ɛgyakyile ɛmanle ɔhale, na ɛkyekyele me rɛle.

² Bɛnlea, Nyamenle le me ngoanedievolɛ; menrɛzulo, mebava me rɛle meawula ye nu, ɔluakɛ Ɛdɛnkɛma Nyamenle ne le me anwosesebɛ nee me edwɛne, na yeyɛ me ngoanedievolɛ.”

³Ɛbava fɛlɛkolilɛ wɔado nzule wɔavi ngoanelielɛ bula ne mɔ anu.

⁴Mekɛ ne anu ɛbaha kɛ, “Bɛyɛ Ɛdɛnkɛma mo, bɛbɔ ye duma bɛlie moalɛ; bɛmaa ye nyɛleɛ ne mɔ ɛla ali wɔ maanle maanle avinli, bɛbɔ ye kpoleyɛlɛ ne nolo bɛhile bɛ.

⁵Bɛdo ayɛlɛyelɛ edwɛne bɛmaa Ɛdɛnkɛma, ɔluakɛ yeyɛ ninyɛne mgbole; bɛmaa awie biala ɛde ɛhye wɔ ewiade amuala anu.

⁶Bɛdeɛdea nu, bɛva anyelielɛ bɛdo edwɛne, O Zayɔnoma, ɔluakɛ Yizilayɛ Nwuanzanwuanza Ko ne mɔɔ de bɛ avinli la le kpole.”