Read Nzema Aye 13 Bible Online

Aye 13 - Nzema bible

Aye 13

¹Nrɛlaleɛ mɔɔ fane Babelɔn anwo, mɔɔ Nyamenle luale Emɔzo ara Ayezaya anwo zo vale dole gua la ɛne:

²“Fa sɛkɛlɛneɛ sie boka bie mɔɔ ɛhwee ɛnle zo la azo, na tea nu ka kile bɛ; nwɔha ɛ sa kile bɛ kɛ bɛwolo titilema nlenkɛ mgbole ne mɔ anu.

³Medame mumua ne yɛɛ meze me menli mɔɔ medu bɛ memaa me nwo, me katakyiema ne kɛ bɛlua me ɛyavalɛ ne azo bɛli gyima a. Bɛle konimlilɛma mɔɔ mefa bɛ metu me nwo a.”

⁴Bɛdie, alɛra bie wɔ awoka ne mɔ azo lɔ kɛ menli apenle apenle ɛlɛteɛdea nu! Bɛdie, arelemgbunli nee maanle maanle ɛdu ɛfonyia na bɛlɛboɔboa bɛ nloa! Tumivolɛ Ɛdɛnkɛma ɛlɛboɔboa ye ɛlɔnema anloa ahɔ konle.

⁵Bɛvi moa moa maanle bie anu wɔ ewiade abo lɔ a bɛlɛba a. Ɛdɛnkɛma ɛva ye ɛya konle ninyɛne ne mɔ ɛlɛba arazɛkye ewiade ye amuala.

⁶ Bɛzu bɛye awolɛ, ɔluakɛ Ɛdɛnkɛma kenle ne ɛbikye; ɔle kenle mɔɔ Tumivolɛ ne bava azɛkye ninyɛne a.

⁷Ɛsalɛ biala anu bado, awie biala ahonle badu,

⁸na bɛ rɛle abɔ. Bɛ nwo bafofo bɛ, bɛ mbowule nu babubu bɛ na bɛade nyane kɛ raalɛ mɔɔ ɛvo awolɛ zo la. Bɛbava ɛzulolɛ bɛanleɛnlea bɛ nyunlu ngoko ngoko; bɛ nyunlu baza.

⁹Bɛnlea, Ɛdɛnkɛma kenle ne ɛlɛba; ɔle ɛya kenle anu ɛzulolɛ kpole kpalɛ mɔɔ Ɛdɛnkɛma bava ahakyi azɛlɛ ye ɛsɛlɛ, na yeazɛkye ɛtanema amuala yeavi zolɛ a.

¹⁰ Anwomanyunlu nwɔlɔra nee bɛ sɔsɔkɛ ne amuala, biala ɛnrɛda; sɛnzɛne ne balu wɔ ye ɛdudulɛ nu, yɛɛ siane ne ɛnrɛda.

¹¹Ɛdɛnkɛma se, “Mebadea ewiade amra amuala wɔ bɛ ɛtane ne mɔ ati, yɛɛ mebadea amumuyɛma wɔ bɛ ninyɛndane ne mɔ ati. Mebamaa mɔɔ tu ɔ nloa anu la agyakyi ye adubɛnwo ne, na meamaa mɔɔ ati yɛ se na ɔnze anwunvɔne la agyakyi ɔ nwo zo ɛmemanlɛ.

¹²Mebamaa nrenya nwo ahyia adɛla ezukoa nvutuke, yɛɛ sonla dasanli nwo bahyia adɛla Ofɛ ezukoa nvutuke.

¹³Yemɔti mebamaa anwomanyunlu awozo, na azɛlɛ akpusu adudu avi ɛleka mɔɔ ɔgyi la, wɔ medame Tumivolɛ Ɛdɛnkɛma me ɛya kenle anu ɛzulolɛ ne anu.

¹⁴“Menli kɔsɔɔti bayɛ kɛ ahɛtɛboɛ mɔɔ bɛdoa bɛ bɛlɛkye bɛ, anzɛɛ mboane mɔɔ ɛbɔ asande na awie ɛnle ɛkɛ mɔɔ boɔboa bɛ nloa la. Awie biala banriandi ahɔ ye menli avinli wɔ ɔdaye ye maanle nu.

¹⁵Bɛ nuhua biala mɔɔ bɛkɛnwu ye la bɛbawɔ ye atwɛ, yɛɛ mɔɔ bɛkɛhye ye la bawu dadeɛ nloa.

¹⁶Bɛbava bɛ mra ne mɔ bɛafifi debie bɛatete bɛ wɔ bɛdabɛ bɛ nye zo, bɛbave bɛ sua nu ninyɛne kɔsɔɔti na bɛamia bɛ ye mɔ bɛ nee bɛ adeda.”

¹⁷Ɛdɛnkɛma se, “Bɛnlea, melɛmaa Mideama ara Babelɔnoma anwo zo. Bɛmɛ, bɛmbu dwɛtɛ fufule yɛɛ bɛ nye ɛnlie ezukoa nvutuke nwo.

¹⁸Bɛbava bɛ ɛda ne mɔ bɛahu mgbavolɛ ne mɔ, bɛnrɛze nlɔma bɔbɔ anwunvɔne na yeayɛ ngakula.

¹⁹ Na Nyamenle bazɛkye Babelonia, maanle kɛnlɛma ne mɔɔ tɛla maanle maanle kɔsɔɔti, maanle ne mɔɔ nuhua menli fa ye tu bɛ nwo la, kɛ ɔzɛkyele Sodɔm nee Gomɔla la.

²⁰Awie ɛnrɛdɛnla nuhua ɛlɛ wɔ awolɛndoazo muala anu. Arelabenli biala ɛnrɛzi ye ndanlɛ sua wɔ ɛkɛ ne afoa nu, yɛɛ mboaneneavolɛma ɛnrɛva bɛ mboane ɛnrɛhɔ ɛkɛ ne adidi.

²¹ Nanemgbole bava ɛkɛ ne ayɛ bɛ alaleɛ, yɛɛ bɛ azua ne mɔ bayɛ nyɛmoa mɔɔ kpo la dabelɛ; soholo bahɔdɛnla ɛkɛ ne bie, yɛɛ ɛkɛ ne a mɛnlamenlakɛ barazi bɛ agole a.

²²Ɛrane[3] bakpo ye tawa ne mɔ azo, yɛɛ ɛzonlɛ bava bɛ suakunlu kɛnlɛma ne mɔ. Ye mekɛ ne ɛbikye. Babelɔn mekɛ ɛwie.”