Read Nzema Aye 14 Bible Online

Aye 14 - Nzema bible

Aye 14

¹Ɛdɛnkɛma banwu Yizilayɛma anwunvɔne na eza yeava bɛ bieko kɛ ye menli. Ɔbamaa bɛadɛnla bɛ azɛlɛ ne azo, nyɛvolɛ baraboka bɛ na bɛava bɛ nwo bɛabeta Yizilayɛma.

²Maanle maanle mɔɔ bɛwɔ nu la anu amra baboa Yizilayɛma bɛamaa bɛazia bɛara. Na Yizilayɛma bava nyɛvolɛ ne mɔ ayɛ bɛ ahanra mraalɛ nee mrenya wɔ Ɛdɛnkɛma azɛlɛ ne azo. Bɛbahye menli mɔɔ hyele bɛ hɔle nlɔnu la nuokɛ na bɛazie menli ne mɔɔ sisile bɛ la.

³Saa Ɛdɛnkɛma maa bɛ nyane nee abodelɛ nee gyima ɛsesebɛ mɔɔ bɛmanle bɛyɛle la ka aze a,

⁴bɛbado edwɛne bɛagolo Babelonia belemgbunli ne anwo bɛaha kɛ, “Sisiravolɛ ne asa ɛhondo aze, nzisi ɛwie!

⁵Ɛdɛnkɛma ɛbubu amumuyɛma kpɔma ne anu, yezɛkye arelemgbunli amumuyɛma tumi ne,

⁶mɔɔ bɛfa ɛya a bɛfa bɛyɛ menli amumuyɛ, na bɛwulowula bɛ ahutuku la. Bɛfa ɛya a bɛsie maanle maanle ne mɔ a na bɛyɛ menli ne kpɔdekpɔde.

⁷Azɛlɛ ye azo amuala ɛyɛ diinyi, anzonudwolɛ ɛra, na bɛkpakye bɛ ne nu bɛto edwɛne.

⁸Sepelɛse nee Lɛbanɔn sida mbaka si ɛ ti zo agole bɛka kɛ, ‘Sumunli kɛ bɛbɛlɛle wɔ aze la, awie ɛtɛbale kɛ ɔbabu yɛ yeagua.’

⁹“Ɛbolɔ ɛboɔboa ɔ nwo kɛ saa ɛba a ɔbarayia wɔ adenle. Azɛlɛ ye azo mgbanyima nwomenle badwazo arayɛ wɔ akoaba, yɛɛ bɛdabɛ mɔɔ anrɛɛ bɛle arelemgbunli wɔ maanle maanle ne mɔ anu la badwazo bɛ arelemgbunli mbia zo ayia wɔ.

¹⁰Bɛ muala bɛbadendɛ na bɛaze wɔ kɛ, ‘Ɛdawɔ noko wɔyɛ bɛtɛɛ kɛ yɛdayɛ la. Ɛ nee yɛ ɛyɛ pɛ!

¹¹Getaa ɛbɔlɛ mgbole mɔɔ bɛvale bɛlile ɛ nzi, nee enililɛ kpole ne ɛrawie Ɛbolɔ; azonlɛ ɛyɛ wɔ ɛkpa ɛla zo, yɛɛ azone a le wɔ kundu mɔɔ gua ɛ nwo a.’

¹² “O Alehyenlɛ Ɛwɔlɔra, Aleɛbahye Ralɛ Nrenya, ɛvi anwuma wɔdɔ aze kpole o! Wɔmɔ mɔɔ anrɛɛ ɛka maanle maanle aze fɛɛnye la, nea aze ko mɔɔ bɛvuandi wɔ bɛdo a!

¹³ Ɛvale ɛlile afua kɛ, ‘Mefo meahɔ anwuma lɔ, meadɛla Nyamenle nwɔlɔra ne mɔ. Mebava me belemgbunli ebia ne meazie anwuma lɔ; mebahɔdɛnla sɔlɔ moa moa nehane ayiama boka ne azo;

¹⁴mebavo meahɔ anwuma meadɛla amungu ne mɔ na meayɛ me nwo kɛ Anwuma Anwumanli ne.’

¹⁵Na wɔmɔ a bɛ nee wɔ ɛra ɛbolɔ sua zo ɛke wɔ ewule kuma ye abo la.

¹⁶“Bɛdabɛ mɔɔ bɛbanwu wɔ la banlea wɔ kpoonwu na bɛadwenledwenle ɛ nwo bɛabiza kɛ, ‘Asoo nrenya ne mɔɔ manle ewiade kpusule na ɔbutubutule arelemgbunlililɛ nye aze la ɛne?

¹⁷Asoo nrenya ne mɔɔ bɔle azuamgbole, na ɔmanle ewiade yɛle kɛ ɛsɛlɛ la ɛne? Asoo nrenya ne mɔɔ angyakyi menli mɔɔ ɔhyele bɛ nuokɛ ɛlɛ la ɛne?’

¹⁸Maanle maanle ne mɔ arelemgbunli deda ye anyunlunyia nu; biala nee ye nla,

¹⁹na wɔmɔ, bɛvuandi wɔ bɛdo moa moa bɛvi wɔ belemgbunli bane nu kɛ ralɛ mɔɔ ye mekɛ andwu na bɛkɛwo ye la. Mɔɔ bɛvale bɛguale ɛ nwo la a le ɛlɔnema mɔɔ dɔle dadeɛ nloa la avunli mɔɔ bɛvuandi bɛ bɛgua ewule kuma bo awolɛ nu kɛ asɛɛ ɛle funli mɔɔ ɔwɔ kɛ bɛtietia ɛ nwo zo a.

²⁰Bɛnrɛzie wɔ bɛnrɛboka arelemgbunli nwo, ɔboalekɛ wɔzɛkye wɔ azɛlɛ ne na wɔhu ɛdawɔ wɔ menli mɔɔ wɔ zolɛ la. Awie ɛnrɛbɔ munzule menli ne abo zo amra aluma bieko ɛlɛ.

²¹Bɛhu ɔ mra mrenya ne mɔ: Bɛ ze mɔ ɛtane ne mɔ ati ɔwɔ kɛ bɛwu, anrɛɛ bɛkɛdwazo bɛkɛva ewiade ne na bɛkɛkyekye azuamgbole.”

²²Tumivolɛ Ɛdɛnkɛma se, “Mebadwazo Babelɔn anwo zo na meazɛkye ye; menrɛvavi awie biala, ngakula nee debie biala, medame Ɛdɛnkɛma a mese a.

²³Mebamaa fuke ava azɛlɛ ne; mebamaa nzule apepɛ bula bula agyinlegyinla zolɛ, na meava ɛzɛkyelɛ sane ne meapia ye meahɔgua. Medame Tumivolɛ Ɛdɛnkɛma a mese a.”

²⁴ Tumivolɛ Ɛdɛnkɛma ɛha ndane kɛ, “Kɛmɔ mehyehyɛ la, zɔhane ala a ɔbayɛ a, yɛɛ kɛmɔ mezuzu la, zɔhane ala a ɔbagyinla a.

²⁵Mebazɛkye Aseleama mɔɔ wɔ me azɛlɛ ne azo, mebaye me menli ne akɔme kpomgbolo na meazokoɛ bɛ adesoa.

²⁶Ngyehyɛlɛ mɔɔ la ɛkɛ maa ewiade amuala la ɛne, yɛɛ tumi mɔɔ mebava meadea maanle maanle kɔsɔɔti la ɛne.”

²⁷Tumivolɛ Ɛdɛnkɛma a ɛhyehyɛ ɛdo ɛkɛ a, nwane a kɛhola kɛzɛkye ye a? Ɛdɛnkɛma ɛdenrɛ ɔ sa, nwane a kɛhola kɛkpɔla ɔ sa a?

²⁸ Ɛvolɛ ne mɔɔ Belemgbunli Ehaze hɔle ayile nu la yɛɛ bɛbɔle nrɛlaleɛ ɛhye nolo a.

²⁹ Nrɛlaleɛ ne se, “O Filisitiama amuala, bɛmmadi fɛlɛko kɛ baka ne mɔɔ bilale bɛ la ɛbubu, ɔluakɛ ɛwɔlɛ wu a, ɛwɔlɛ anwo ɛzulolɛ finde ɔ nzi, yɛɛ ɔto kolonvia a ɔbobɔ ɛwɔlɛ mɔɔ tu la.

³⁰Ehyianli belamunli ralɛ bali aleɛ, yɛɛ mɔɔ ɛhyia la anwo badɔ ye. Na bɛmɛ, mebava ɛhɔne meabɔ bɛ menli mɔɔ hale la abo zo na meahu bɛ muala.

³¹“O Filisitiama, bɛ muala bɛva ɛzulolɛ bɛzu bɛye awolɛ wɔ bɛ azuamgbole zo nee bɛ nlenkɛ mgbole ne mɔ anloa. Ɔluakɛ senle vi sɔlɔ ɛlɛba; bɛle ɛlɔnema mɔɔ bɛ nuhua biala ɛnle foanvoanle a.”

³²Duzu mualɛ yɛɛ sonla bava amaa maanle ne soanvolɛma a? “Ɛdɛnkɛma ɛkyekye Zayɔn, na ɛkɛ ne yɛɛ ye menli mɔɔ ɛlɛnwu amaneɛ la anwo badɔ bɛ a.”