Read Nzema Aye 16 Bible Online

Aye 16 - Nzema bible

Aye 16

¹Mowabema ɛzoa menli vi Sila ɛmaa bɛva ɛsɛlɛ zo adenle ne anu bɛva mboane bɛhɔmaa Gyɛlusalɛm belemgbunli ne.

²Bɛdwu Azule Anɔn ne anloa a bɛdi tutɛnla kɛ nloma mɔɔ bɛvoa bɛ wɔ bɛ sane nu la.

³Bɛ edwɛkɛ a le kɛ, “Bɛhile yɛ mɔɔ ɔwɔ kɛ yɛyɛ la, bɛ nee yɛ ɛli ye pɛlepɛle zo. Bɛheda yɛ nwo zo kɛ nɔɔzo awozinli wɔ ewiazo sɛnzɛngyinla; bɛva menli ne mɔɔ awie ɛmbu bɛ bie la bɛvea, na bɛmmaye menli mɔɔ ɛlɛnriandi konle nu la bɛmaa.

⁴Bɛmaa yɛdayɛ Mowabema mɔɔ awie ɛmbu yɛ bie la ɛradɛnla bɛ avinli, na bɛlie yɛ kɛ nriandivolɛma wɔ sɛkyevolɛ ne asa anu.” (Saa nzisi wie na bɛgyakyi azɛlɛ ne ɛzɛkyelɛ, na sɛkyeravolɛ ne vi azɛlɛ ne azo tu a,

⁵akee bɛbava ɛhulolɛ kpundii bɛazie ebia; ahenle mɔɔ badɛnla zolɛ la vi Belemgbunli Devidi abusua nu. Ɔbava nɔhalɛlilɛ yeazie menli ne, ɔbayɛ sonla mɔɔ kulo tenleneyɛlɛ, yɛɛ ɔbava pɛlepɛlelilɛ yeabua ndɛne.)

⁶Na Dwudama baha kɛ, “Yɛde Mowabema adubɛnwo ne nee kɛ bɛzile bɛmemanle bɛ nwo zo la; bɛ nloa anu ɛyelɛ, bɛ mgbanyizonle nee bɛ mgbole ɛhehanlɛ ne amuala. Bɛ adubɛnwo ne amuala le mgbane.

⁷Zɔhane ati bɛmaa Mowabema ɛzu bie. Awie biala ɛzu Mowabe. Bɛnwu amaneɛ yɛɛ nyane ɛha bɛ, ɔluakɛ bɛ Kɛɛ Hɛlɛse vanye ma welera ndɛlamoa ne mɔ ɛbɔ bɛ.”

⁸Hɛhyebɔn ɛya avule ne mɔ nee Sebema vanye egyinli ne mɔ ɛzɛkye. Ɛbɔ ye Sebema ɛkɛ ne mɔɔ kɔkpula Gyeezɛ, toonwo mɔɔ kɔdwu ɛsɛlɛ ne anloa lɔ, ɔpɛ nu ɛkɛ ɔkɔ toonwo ɔkɔgua ye Nyevile Wulera ne anloa la vanye egyinli ne mɔ mɔɔ manle maanle maanle arelemgbunli zile ngosi la ngane ne mɔ kɔsɔɔti ɛdwɔlɔdwɔlɔ.

⁹Yemɔti mefa ɛzunlɛ mɔɔ mefa mesu Gyeezɛ la meazu Sebema vanye egyinli ne mɔ. Mesu meagua Hɛhyebɔn nee Ɛlɛyali ati zo, ɔluakɛ bɛ ma nee bɛ bɛyɔba ne mɔ anwo zo a konle nu alɛrayɛlɛ ne ɛragua a.

¹⁰Fɛlɛko nee anyelielɛ ɛvi bɛ ma egyinli ne mɔ anu, awie ɛndeɛdea nu wɔ ɛkɛ. Awie ɛndwihwi nwanye ɛnvi vanye ma nu; vanye ma ɛtetelɛ nu anyelielɛ ɛdeɛdeanlɛ ne ɛwie.

¹¹Yemɔti me ɛkɛla kulu ɔ kunlu kɛ getaa kpole la wɔ Mowabe ati, yɛɛ medi Kɛɛ Hɛlɛse anwo nyane.

¹²Saa Mowabema ye bɛ nyunlu, bɛfa bɛ nyane bɛkɔ ɛleka mɔɔ bɛsonle la kɛ bɛkaye ɛdɛne a, ɔnrɛyɛ boɛ ɔnrɛmaa bɛ.

¹³Edwɛkɛ mɔɔ Ɛdɛnkɛma hanle wɔ Mowabe anwo wɔ mekɛ mɔɔ ɛze ɛhɔ la ɛne.

¹⁴Kɛkala Ɛdɛnkɛma se, “Ɛvolɛ nsa pɛpɛ, mɔɔ le kɛ ɛkpabɔlɛ mekɛ la pɛpɛ, Mowabe maanle ne anyunlunyia badɔ aze. Menli bebelebe ne mɔɔ wɔ maanle ne anu la, ekyi bie a baha a, yɛɛ eza bɛ nwo ɛnrɛyɛ se.”