Read Nzema Aye 17 Bible Online

Aye 17 - Nzema bible

Aye 17

¹ Ɛdɛnkɛma edwɛkɛ mɔɔ fane Dɛmasekɛse anwo la ɛne. Ɔse, “Bɛnlea, Dɛmasekɛse ɛnrɛyɛ suakpole bieko; ɔbayɛ ewula edukue.

²Alowɛ azuamgbole ne mɔ kɔsɔɔti badɔ mgbane mɔɔ awie ɛnrɛdɛnla zolɛ bieko ɛlɛ a. Bɛbayɛ nyɛmoa alaleɛ. Bɛbahɔla ɛkɛ na awie ɛnrɛha bɛ ɛzulolɛ.

³Aranemgbole ne mɔ baminliminli Yifelaem, yɛɛ belemgbunlililɛ bavi Dɛmasekɛse; Seleama mɔɔ ɛha la anyunlu bagua aze kɛ Yizilayɛma la. Medame Tumivolɛ Ɛdɛnkɛma a mese a.

⁴“Mekɛ ne anu, Gyekɔbo abo zo amra anyunlu bagua aze na bɛanwa bɛayɛ nrenzenrenze.

⁵Ɔbayɛ kɛ mekɛ mɔɔ ɛyazonlɛnli ɛlɛbu ye bɛyɔba na ɔlɛtete ye nzoleɛ kɔsɔɔti la; ɔbayɛ kɛ mekɛ mɔɔ ɛyazonlɛnli ɛlɛte ye ma kɔsɔɔti wɔ Relɛfeeyem Bɔnza la.

⁶Ma ngoko ngoko bie a baha zolɛ a, kɛ ɔlivi baka mɔɔ bɛtete zolɛ ma ne amuala na yeha kɛyɛ nwiɔ anzɛɛ nsa bie wɔ baka ne ati zo nehane, anzɛɛ nna anzɛɛ nnu wɔ baka ne ngane ne mɔɔ so kpalɛ la azo la. Medame Ɛdɛnkɛma, Yizilayɛ Nyamenle a mese a.”

⁷Mekɛ ne anu menli banwu bɛ Bɔvolɛ ne na bɛahakyi bɛ nye Yizilayɛ Nwuanzanwuanza Ko ne anwo.

⁸Bɛnrɛbu bɛ sa anloa gyima mɔɔ le bɛ azukponle ne mɔ, yɛɛ bɛnrɛnlea mɔɔ bɛdabɛ bɛva bɛ sa bɛyɛ bɔbɔ la, na yeayɛ bɛ bozonle raalɛ Ahyela ne ananze ne mɔ anzɛɛ bɛ ɛyɛlɛkpunlɛ azukponle ne mɔ.

⁹Mekɛ ne anu bɛ azuamgbole mɔɔ yɛ se la bayɛ kɛ Haevaema nee Amɔlema azuamgbole ne mɔ mɔɔ ɛyɛ azuadu la. Bɛvile azuamgbole ne mɔ azo bɛnriandile wɔ mekɛ mɔɔ ɛnee Yizilayɛma ɛlɛba la, na azua ne mɔ badɔ mgbane.

¹⁰Ɔluakɛ Yizilayɛ arɛle ɛvi ye ngoanelielɛ Nyamenle ne, yɛɛ ɔngakye ye Ɛvealeka Bodane ne, mɔɔ le ye ɛvealeka la. Zɔhane ati bɛdua mbaka ngɛnlɛma na bɛava nyɛvolɛ awozonle bɛaziezie nu bɛazonle bɛ.

¹¹Bɛbanlea bɛamaa bɛanyi kenle ko ne ala mɔɔ bɛkɛlua la, na bɛamaa bɛazo kenle ko ne ala nwonlomɔ ne mɔɔ bɛkɛlua la, noko bɛnrɛnyia bɛyɔba. Nyane nee amaneɛnwunlɛ mɔɔ ɛnlɛ awieleɛ la a bɛbanwu ye a.

¹²Aa, tie maanle maanle dɔɔnwo ane kɛ ɛlɛkulu bie a. Bɛlɛkulu kɛ nyevile mɔɔ ɛha ɔ nwo la. Aa, maanle maanle ne mɔ ɛlɛtea, bɛ ne le kɛ azule kpole bie mɔɔ lua awolɛ zo la.

¹³Maanle maanle ne mɔ tea, bɛ ne kulu kɛ azule mɔɔ lua awolɛ zo la. Noko ɔbahwi bɛ nyunlu, na bɛbagua ndwɛlɛ aze, bɛanriandi kɛ awoka zo abonle mɔɔ anwoma ɛlɛbɔ ye ahɔ, anzɛɛ munlutu mɔɔ ɛlɛdi akyima wɔ ahumuakyima nu la.

¹⁴Aleɛ dwo a, nea, ɛzulolɛ ngome! Mɔɔ aleɛ kahye la ɛnee biala ɛnle ɛkɛ! Menli mɔɔ sɛkye yɛ, wua yɛ nwo ninyɛne la kyɛfoa ɛ.