Read Nzema Aye 18 Bible Online

Aye 18 - Nzema bible

Aye 18

¹ Sudan azule ne mɔ anzi lɔ, azɛlɛ bie wɔ ɛkɛ mɔɔ bɛlɛbɔ ndɛbalɛ nu,

²na bɛsoa ɛbɔfoɔma wɔ ndɔ ɛlɛne nu bɛmaa bɛkɔ Azule Naele ne nyiakɛ. Bɛmɛ soanvolɛma mɔɔ anwo yɛ ndɛ a, bɛhɔ maanle bie mɔɔ nuhua menli ne le ndendenle, bɛ nwo yɛ fɛ na menli mɔɔ ewiade amra amuala sulo bɛ la anu; ɔle maanle mɔɔ anwo yɛ ɛzulolɛ na ɔdi konim wɔ konle nu a, yɛɛ ye azɛlɛ ne, azule dɔɔnwo ɛgyigya nuhua.

³Bɛdabɛ mɔɔ bɛwɔ ewiade la amuala, bɛdabɛ mɔɔ bɛde azɛlɛ ye azo la, saa bɛmaa sɛkɛlɛneɛ bie zo wɔ awoka ne mɔ azo lɔ a, bɛnlea. Saa bɛbɔ aweɛne tendenle nu a, bɛdie.

⁴Ɔluakɛ Ɛdɛnkɛma zele me kɛ, “Ɛleka mɔɔ mede la, mebado me nye meanlea bɛ koonwu kɛ ɛbuhenle nu wuluwulu ɛbɔlɛ mɔɔ tɔ nɔɔzo, meavede me nye meanlea azɛlɛ ye.

⁵Ɔluakɛ ɔkadwu mekɛ mɔɔ ndotolo kawie kpolo, na ndotolo ne ayɛ ma abolo, na ɛbuhenle ne adwu la, mebava dadeɛ meapepɛ nya ne mɔ mɔɔ ɛlɛfefɛ la anye, na meabubu ngane ne mɔ mɔɔ ɛdɛlɛdɛlɛ la meagua.

⁶Bɛbagyakyi bɛ bɛamaa awoka zo nloma nee azɛlɛ ye azo nane kɛ bɛli. Bɛbayɛ nloma aleɛ wɔ wawaa nu, na bɛayɛ azɛlɛ ye azo nane kɔsɔɔti aleɛ wɔ fɔsɛlɛ nu.”

⁷Mekɛ ne anu menli ndendenle anwo fɛlɛko mɔɔ ewiade amra sulo bɛ, na bɛle maanle anwo ɛzulolɛ mɔɔ di konim wɔ konle nu, mɔɔ azule dɔɔnwo ɛgyigya bɛ azɛlɛ ne anu la bava ahyɛlɛ ninyɛne arɛlɛ Tumivolɛ Ɛdɛnkɛma wɔ Zayɔn Boka, ɛleka mɔɔ bɛsonle Tumivolɛ Ɛdɛnkɛma la.