Read Nzema Aye 19 Bible Online

Aye 19 - Nzema bible

Aye 19

¹ Ɛdɛnkɛma nrɛlaleɛ mɔɔ fane Yigyibiti anwo la ɛne. Bɛnlea, Ɛdɛnkɛma de amungu zo ɛlɛba waa zɛhae, ɔlɛba Yigyibiti. Awozonle mɔɔ wɔ Yigyibiti la nwu ye a bɛ nwo bawozo bɛ, na Yigyibitima ahonle badu.

²Ɛdɛnkɛma se, “Mebamaa Yigyibitima angome adwazo atia bɛ nwo, adiema nee adiema baho, agɔnwolɛ badwazo agɔnwolɛ nwo zo, suakpole nee suakpole baho, na arelemgbunli adwazo arelemgbunli nwo zo.

³Bɛ ɛnwomenle mɔɔ wɔ bɛ nu la bawie, na mebazɛkye bɛ adwenle ngyehyɛleɛ biala. Bɛbahɔ bɛ awozonle ne mɔ, bɛ ngonyiama, menli mɔɔ tendɛ nwomenle nloa azo, yɛɛ bayivolɛma ne mɔ ɛkɛ ne abisa,

⁴noko mebaye Yigyibitima ne meamaa menlenlɛ bie mɔɔ ati yɛ se la, na belemgbunli anwo ɛzulolɛ bie bazie bɛ. Medame Awulae, Tumivolɛ Ɛdɛnkɛma, kɛ mese la ɛne.”

⁵Azule Naele ne basesa ayɛ resee, azɛlɛ ne akpakyekpakye;

⁶ye ngane ne mɔ basesa na ye ɛleka mɔɔ bɛdukue ye bɛva la abɔ nvoanvoa, na nuhua ndɔ nee ndile akpɔlɔ.

⁷Naele ne anloa azɛlɛ ne mɔ badɔ mgbane; aleɛ mɔɔ bɛlua bɛ ɛkɛ ne la amuala banwoso awu, na anwoma apia bɛ ahɔ.

⁸Fɛlɛhyelɛma mɔɔ to koba nee bɛdabɛ mɔɔ bɛto avonle wɔ Naele ne anu la anwo bavɔ, na bɛbazu bɛaye awolɛ.

⁹Gyimayɛvoma mɔɔ yɛ dwɛsɛ nwo gyima nee bɛdabɛ mɔɔ bɛnwo ndanlɛ la arɛle babɔ.

¹⁰Bɛdabɛ mɔɔ bɛle mandimase wɔ maanle ne anu la, bɛbaha bɛ senle dwɛɛ, na alɔbɔlɛ bahu gyimayɛvoma mɔɔ di ɛkpa la.

¹¹Zowan mgbanyima le ahoasea kpole kpalɛ, yɛɛ Yigyibiti belemgbunli ne folɛtuvoma tu folɛ ɛtane. Duzu ati a ɔwɔ kɛ bɛka bɛkile Yigyibiti belemgbunli ne kɛ, “Mele nrɛlɛbɛvolɛ ra, mele mɔmoane arelemgbunli ne mɔ bie ara nrenya” ɛ?

¹²Bɛ nrɛlɛbɛvolɛma ne wɔ nienwu? Bɛmaa bɛha na bɛye debie ko mɔɔ Tumivolɛ Ɛdɛnkɛma ɛhyehyɛ mɔɔ ɔbava yeayɛ Yigyibitima la bɛhile bɛ.

¹³Zowan mgbanyima ɛyɛ ahoasea, yɛɛ bɛbɛlɛbɛla Mɛmefese mgbanyima. Yigyibiti titilema mɔɔ lɛ maanle ne la ɛmaa Yigyibitima anye zo ɛda bɛ.

¹⁴Ɛdɛnkɛma ɛye anyezota ɛdo Yigyibitima anwo, yemaa bɛbɔ atondo wɔ bɛ debie biala ɛyɛlɛ nu kɛ nzanli mɔɔ ɛbo ɛfefe ɛla nu la.

¹⁵Debie biala ɛnle Yigyibiti mɔɔ tile o, dualɛ o, ɛrɛlakɛ anzɛɛ ndɔ kɛhola kɛyɛ a.

¹⁶Mekɛ ne anu Yigyibitima bayɛ kɛ mralɛ. Sulosulo bamaa bɛ nwo awozo bɛ wɔ tumi ne mɔɔ Tumivolɛ Ɛdɛnkɛma bamaa yeara bɛ nwo zo la abo.

¹⁷Dwuda maanle ne anwo baha Yigyibitima ɛzulolɛ. Mekɛ biala mɔɔ bɛkɛbɔ duma ne bɛkɛhile Yigyibitima la, ɛzulolɛ baha bɛ wɔ mɔɔ Tumivolɛ Ɛdɛnkɛma ɛhyehyɛ kɛ ɔfa yeayɛ bɛ la ati.

¹⁸Mekɛ ne anu azuamgbole nnu mɔɔ wɔ Yigyibiti la baha Keena anzɛɛ Hibulu aneɛ ne bie na bɛazonle Tumivolɛ Ɛdɛnkɛma. Bɛbavɛlɛ azuamgbole ɛhye mɔ anu ko “Sɛnzɛne Suakpole.”

¹⁹Mekɛ ne anu bɛbazi Ɛdɛnkɛma azukponle wɔ Yigyibiti azɛlɛ zo na bɛakpɔnla Ɛdɛnkɛma mpila wɔ maanle ne ɛweɛne zo.

²⁰Ɛhye bayɛ Tumivolɛ Ɛdɛnkɛma sɛkɛlɛneɛ nee daselɛ wɔ maanle ne anu, amaa mekɛ biala mɔɔ sisiravolɛma kɛdwazo bɛ nwo zo la, saa bɛsu bɛfɛlɛ ye a yearɛlɛ bɛ dievolɛ yeamaa yearaho yealie bɛ.

²¹Ɛdɛnkɛma bamaa Yigyibitima anwu ye, na Yigyibitima banwu Ɛdɛnkɛma wɔ mekɛ ne anu na bɛava azubɔlɛ nee ɛyelalɛ azubɔdeɛ bɛazonle ye; bɛbabɔ Ɛdɛnkɛma ɛwɔkɛ na bɛaye.

²²Ɛdɛnkɛma badea Yigyibitima na eza yeayɛ bɛ ayile; bɛbazia bɛara Ɛdɛnkɛma ɛkɛ, na ɔbadie bɛ modolɛ nzɛlɛlɛ na yeayɛ bɛ ayile.

²³Mekɛ ne anu ademgbole bala Yigyibiti nee Aselea avinli. Aseleama bahɔ Yigyibiti, yɛɛ Yigyibitima bahɔ Aselea maanle nu, na Yigyibitima nee Aseleama babɔ nu azonle.

²⁴Mekɛ ne anu Yizilayɛ badɔ Aselea nee Yigyibiti anwo zo bɛayɛ maanle nsa, na bɛayɛ nyilalɛ bɛamaa ewiade amra amuala.

²⁵Bɛmɛ yɛɛ Tumivolɛ Ɛdɛnkɛma ɛha bɛ nwo edwɛkɛ kɛ, “Nyilalɛ ɛha me menli Yigyibitima, Aselea mɔɔ le me sa anloa gyima, yɛɛ Yizilayɛ, me agyadeɛ.”