Read Nzema Aye 2 Bible Online

Aye 2 - Nzema bible

Aye 2

¹Emɔzo ara nrenya Ayezaya edwɛkɛ mɔɔ hanle, mɔɔ fane Dwuda nee Gyɛlusalɛm anwo la ɛne:

²Ɔbara kɛ mekɛ ne mɔɔ li awieleɛ la, boka ne mɔɔ Ɛdɛnkɛma Ɛzonlenlɛ Sua ne gyi zolɛ la bayɛ boka mɔɔ wale tɛla boka biala; bɛbamaa ye zo wɔ awoka kɔsɔɔti avinli, na maanle maanle kɔsɔɔti banriandi ahɔ zo.

³Menli dɔɔnwo bara ɛkɛ na bɛaha kɛ, “Bɛrɛla, bɛmaa yɛhɔ Ɛdɛnkɛma Boka ne azo, yɛhɔ Gyekɔbo Nyamenle ne Sua nu, amaa yeahilehile yɛ ye ndenle ne mɔ, na yɛalua ye ndenle ne mɔ anu. Ɔluakɛ mɛla ne vi Zayɔn a bara a, yɛɛ Nyamenle edwɛkɛ ne vi Gyɛlusalɛm a bara a.”

⁴ Ɔbabua maanle maanle ne mɔ ndɛne, yeali menli dɔɔnwo edwɛkɛ; na bɛbabolo bɛ konle dadeɛ ne mɔ bɛayɛ ɛyazonlɛ mbulalɛ, na bɛabolo bɛ atwɛ ne mɔ bɛayɛ ɛdedadeɛ. Maanle ko nee maanle ko ɛnrɛho bieko, yɛɛ bɛnrɛzukoa konle ɛhonlɛ bieko.

⁵O Gyekɔbo abo zo amra, bɛrɛla bɛmaa yɛlua Ɛdɛnkɛma wienyi ne anu.

⁶O Nyamenle, wɔkpo wɔ menli ne, Gyekɔbo abo zo amra ne! Ɔboalekɛ ngonyiama mɔɔ vi aduduleɛ la ɛva azɛlɛ ne yɛɛ bɛnea menli nyunlu bɛbɔ bɛ munzule, kɛmɔ Filisitiama yɛ ye la. Bɛ sa ɛkpula nyɛvolɛ asa anzi na bɛyɛ mɔɔ nyɛvolɛ ne mɔ yɛ la bie.

⁷Dwɛtɛ fufule nee ezukoa nvutuke ɛyi bɛ azɛlɛ ne tɔ, awie ɛnze bɛ anwonyia nloa. Bɛ mgbɔnwɔ zonle kpalɛ yɛɛ awie ɛngola ɛndia bɛ konle ehwili ne mɔ.

⁸Mmonle ɛva azɛlɛ ne, yɛɛ bɛsonle bɛdabɛ bɛ sa anloa gyima mɔɔ bɛyɛ la.

⁹Ɛhye ati sonla ɛdo ɔ nwo aze, yebɔ ɔ nwo anyiemgba. Mmafa ɛkyɛ bɛ ɛlɛ!

¹⁰ Bɛnriandi Ɛdɛnkɛma ɛya ɛzulolɛ ne nee ye belemgbunlililɛ anyunlunyia ne, na bɛhɔvea awolɛ nu nee azɛlɛ bo.

¹¹Bɛ adubɛnwo ne kɔsɔɔti bawie na bɛ mgbolede ne abo agua. Ɛdɛnkɛma angomekye ala yɛɛ bɛbayeyɛ ye mekɛ zɔhane anu a.

¹²Ɔluakɛ Tumivolɛ Ɛdɛnkɛma lɛ ye mekɛ mɔɔ ɔbava ɔ nee bɛdabɛ mɔɔ bɛmemaa bɛ nwo zo bɛyɛ mgbolede, yɛɛ bɛdabɛ mɔɔ bɛlɛ tumi la bali yeaha bɛ aze fɛɛnye a.

¹³Mekɛ zɔhane, ɔbazɛkye Lɛbanɔn sida mbaka mɔɔ ɛnyi ɛhɔ anwuma, Beehyan oku mbaka;

¹⁴awoka mgbole mɔɔ anwo zo wɔ anwuma nee awoka ngyikyi;

¹⁵tawa tendenle biala nee nwolɛ bane biala;

¹⁶Tahyehye meli ngɛnlɛma ne mɔ, yɛɛ adwinli kɛnlɛma biala.

¹⁷Sonla adubɛnwo muala bara awieleɛ, yɛɛ mgbolede mɔɔ menli yɛ la amuala abo bagua; Ɛdɛnkɛma angomekye ala yɛɛ bɛbayeyɛ ye mekɛ zɔhane anu a.

¹⁸Na bɛbazɛkye mmonle kɔsɔɔti.

¹⁹Mekɛ mɔɔ Ɛdɛnkɛma kɛmaa ɔ nwo zo kɛ ɔ nee azɛlɛ ye azo amra di la, menli banriandi ahɔvea awolɛ mbɔne nu nee azɛlɛ bo ahuma nu, bɛavi ye ɛya kpole anu ɛzulolɛ ne nee ye belemgbunlililɛ anyunlunyia ne anwo.

²⁰Mekɛ ne anu menli bavuandi bɛ dwɛtɛ fufule nee ezukoa nvutuke mmonle ne mɔ mɔɔ bɛyɛ bɛmaa bɛ nwo na bɛsonle bɛ la agua. Bɛbagyakyi bɛ bɛamaa abotokila nee akpanlɛ ne mɔ.

²¹Mekɛ mɔɔ Ɛdɛnkɛma kɛmaa ɔ nwo zo kɛ ɔ nee azɛlɛ ye azo amra di la, menli banriandi ahɔvea awolɛ nee awoka adokule nu bɛavi ye ɛya kpole anu ɛzulolɛ ne nee ye belemgbunlililɛ anyunlunyia ne anwo.

²²Bɛhwe bɛ nwo bɛvi sonla mɔɔ ɛnwomenle ala a ɔdie la anwo. Duzu nvasoɛ a wɔ sonla nwo zo a?