Read Nzema Aye 20 Bible Online

Aye 20 - Nzema bible

Aye 20

¹Aselea maanle maanle Belemgbunli Sagɔn zoanle ye Safohyenlema Kpanyinli ne mɔɔ nea ye ɛlɔnema anwo zo la manle ɔvale ɛlɔnema ɔrale Ahyedɔdo ɔrahonle ɔvale suakpole ne.

²Mekɛ ne anu ɛnee Ɛdɛnkɛma ɛdendɛ ɛhile Emɔzo ara Ayezaya kɛ, “Kɔzianyi ɛrele ne mɔɔ hye ɛ nze zo la na yeye ɛ gyakɛ mgbɔlaboa ne mɔ,” na yeyɛ ye zɔ, ɔlɛ ɔ nwo zɔ, ɔ gyakɛ gua aze na ɔzo ɔlua.

³Ɛdɛnkɛma zele ye kɛ, “Me sonvolɛ Ayezaya ɛlɛ ɔ nwo zɔ, ɛgua ɔ gyakɛ aze yeluolua toonwo ɛvolɛ nsa. Ɛhye le sɛkɛlɛneɛ mɔɔ kile mɔɔ bazi Yigyibitima nee Sudanema anwo zo la.

⁴Yemɔti Aselea maanle maanle belemgbunli ne bahye Yigyibitima nuokɛ na yeazoa Sudanema yeahɔ nlɔnu. Ɔbahye ngakula nee mgbanyinli mɔɔ lɛ bɛ nwo zɔ, bɛ gyakɛ gua aze, na bɛ butua gua zo la yeahɔ, yeava yeagua Yigyibitima anyunlu aze.

⁵Akee bɛdabɛ mɔɔ bɛva bɛ rɛle bɛdo Sudanema anwo zo na bɛfa Yigyibiti bɛtu bɛ nloa anu la arɛle babɔ na bɛ adwenle aha abɔ nu.

⁶Mekɛ ne anu bɛdabɛ mɔɔ bɛde ɛnweanloa nehae la baha kɛ, ‘Bɛnlea mɔɔ ɛzi bɛdabɛ mɔɔ yɛvale yɛ rɛle yɛwulale bɛ nu, na yɛnriandile yɛhɔdanenle bɛ kɛ bɛboa yɛ na bɛlie yɛ bɛvi Aselea belemgbunli ne asa anu la anwo zo a! Na yɛmɛ, kɛ ɔkɛyɛ na yɛavi ɛsalɛ ɛ?’ ”