Read Nzema Aye 21 Bible Online

Aye 21 - Nzema bible

Aye 21

¹Nyamenle nrɛlaleɛ mɔɔ fane Babelonia anwo la ɛne: Ɔle kɛ ahumuakyima mɔɔ vi nyiakɛ ɛlɛtu la, ɔvi ɛsɛlɛ zo a ɔlɛba a, ɔvi maanle anwo ɛzulolɛ bie anu a ɔlɛba a.

²Ɛnyelɛzodeɛnwunlɛ ɛsesebɛ kpalɛ a menwu ye la; ninyɛnevenlɛma mɔɔ fe ninyɛne nee ninyɛnezɛkyelɛma mɔɔ sɛkye ninyɛne. Yilam ɛlɔnema, bɛhɔho! Midea ɛlɔnema, bɛhɔbɛnra azuamgbole bɛyia! Nyamenle se, “Mebazi nyanehilelɛ ne mɔɔ Babelɔn ɛhile menli la kɔsɔɔti aze.”

³Yemɔti nyane ɛwolowolo me na me nwo fofo me kɛ raalɛ mɔɔ ɛvo awolɛ zo la. Me ti ɛzi aze, yemɔti mende ɛhwee, yɛɛ me adwenle ɛha ɛbɔ nu, yemɔti mennwu ɛhwee.

⁴Me ti kpakye me, ɛzulolɛ ɛheda me nwo zo. Akee aledwolɛ ne mɔɔ me nwo lɔle ye la anu ɛyɛ ɛzulolɛ kpole bie ɛmaa me.

⁵Ɛnyelɛzodeɛnwunlɛ ne anu, menwunle kɛ bɛdo ɛkponle ne, bɛziezie mbia nwolɛ na bɛlɛdi bɛno. Arɛlevilɛ nu bɛdeanle nu, “Safohyenlema, bɛdwazo bɛvɔ bɛ sa nu enyinlike ne mɔ nwole!”

⁶Ɔluakɛ Awulae zele me kɛ, “Kɔ, kɔva awie maa ɔgyinla ɔzinza, na mɔɔ ɔkɛnwu ye la yeava yeado gua.

⁷Saa ɔnwu kɛ menli dede mgbɔnwɔ zo na bɛlua ye nwiɔ nwiɔ, bie mɔ dede asoaso nee afunlumu zo a, maa ɔdie bɛ kpalɛ kpalɛ.”

⁸Na mɔɔ ɛlɛsinza la nwunle bɛ na ɔdeanle nuhua kɛ, “O Awulae, megyi tawa ye azo mesinza dahuu. Aledwolɛ nu amuala megyi me gyakɛ anu.

⁹ Na kɛkala nea, bɛmɛ a bɛlɛba la! Menli ne dede mgbɔnwɔ zo na bɛlua ye nwiɔ nwiɔ!” Na ɔbuale bɛ kɛ, “Yebɔ! Babelɔn ɛbɔ; bɛbubu ye awozonle ananze ne mɔ kɔsɔɔti bɛgua.”

¹⁰O me menli mɔɔ bɛtietia bɛ nwo zo bɛwozo bɛ na bɛhegye bɛ kɛ ma a, mɔɔ mede mevi Tumivolɛ Ɛdɛnkɛma, Yizilayɛ Nyamenle ne ɛkɛ ne la a mebɔ ye nolo mehile bɛ la.

¹¹Nyamenle nrɛlaleɛ mɔɔ fane Yidɔm anwo la ɛne: Awie wɔ Yidɔm (Siyɛ) ɛlɛfɛlɛ me. Ɔse, “Sinzavolɛ, aledwolɛ ne anu ɛ? Sinzavolɛ, aledwolɛ ne anu ɛ?”

¹²Sinzavolɛ ne bua ye kɛ, “Aleɛ ɛlɛkye, na eza aledwolɛ bara. Saa ɛse ɛbiza a, biza; anrɛɛ sia bɛla bieko.”

¹³Nyamenle nrɛlaleɛ mɔɔ fane Areleebea anwo la ɛne: Bɛmɛ Didanema mɔɔ bɛ ehwili a le bɛ azua mɔɔ bɛda nu la, Areleebea kpɔkɛ bo ala a bɛbadɛnla a.

¹⁴O bɛmɛ Timama, bɛva nzule bɛrɛlɛ menli mɔɔ nzuhɔne ɛlɛku bɛ la, bɛva aleɛ bɛyia menli mɔɔ ɛlɛnriandi munzule la.

¹⁵Ɔluakɛ bɛnriandi bɛvi konle nu, bɛnriandi bɛvi dadeɛ nee ɛda nloa.

¹⁶Ɔluakɛ Awulae zele me kɛ, “Ɛvolɛ ko pɛpɛ, kɛmɔ ɛkpabɔlɛ mekɛ ne kile la, Kida anyunlunyia badɔ aze,

¹⁷na katakyiema mɔɔ ze ɛda to kpalɛ wɔ Kida la baha ekyi bie, ɔluakɛ medame Ɛdɛnkɛma, Yizilayɛ Nyamenle ne a mese a.”