Read Nzema Aye 22 Bible Online

Aye 22 - Nzema bible

Aye 22

¹Nyamenle nrɛlaleɛ mɔɔ fane Ɛnyelɛzodeɛnwunlɛ Bɔnza ne anwo la ɛne: Duzu a bɛlɛyɛ a, mɔɔ bɛ kɔsɔɔti bɛvo bɛhɔ bɛ azua ne mɔ ati zo,

²na bɛlɛteɛdea nu, na suakpole ye azo ɛyɛ begyebegye, na bɛ nye ɛlie zɛhae ɛ? Bɛ menli mɔɔ bɛhu bɛ la andɔ dadeɛ nloa yɛɛ bɛanwu konle nu.

³Bɛ mgbanyima ne mɔ ɛnriandi, noko bɛhye bɛ muala wɔ mekɛ mɔɔ awie ando ɛda ko bɔbɔ la. Bɛdabɛ mɔɔ bɛnriandile bɛhɔle moa moa bɔbɔ la, bɛnwu bɛ bɛhye bɛ.

⁴Yemɔti menganle kɛ, “Awie biala mmanea me; bɛmaa menzu mendwi monle kpalɛ; bɛmmapele kɛ bɛkyekye me rɛle wɔ me menli ne mɔ mɔɔ bɛhu bɛ la ati!”

⁵Ɔluakɛ Tumivolɛ Awulae Nyamenle ne anyezota, ye konle nee ye menli ɛhunlɛ mekɛ wɔ Ɛnyelɛzodeɛnwunlɛ Bɔnza ɛdwu, na bɛbabubu suakpole ne bane ne mɔ bɛagua, na ɛdeɛdeanlɛ bara awoka ne mɔ azo lɔ.

⁶Yilam ɛlɔnema lɛ ɛda dede konle ehwili nu nee mgbɔnwɔ zo, yɛɛ Kɛɛ ɛlɔnema ɛye bɛ enyinlike ne mɔ ɛlɛ.

⁷Bɛ mbɔnza kpalɛ ne mɔ anu ɛyɛ konle ehwili ngome, yɛɛ ɛlɔnema mɔɔ dede mgbɔnwɔ zo la ɛva nlenkɛ mgbole ne mɔ.

⁸Ɛdɛnkɛma ɛkpa Dwuda anwo ɛdanlɛ. Mekɛ ne anu bɛvale bɛ adwenle bɛzɔle konle ninyɛne mɔɔ wɔ Kpɔkɛmile Sua ne anu la,

⁹na bɛnwunle kɛ Devidi suakpole ne bane ne mɔ ɛgyigya dɔɔnwo. Bɛhɔsesale nzule wɔ nyiakɛ azule ne anu,

¹⁰bɛdianle Gyɛlusalɛm azua ne mɔ mɔɔ wɔ bane ne mɔ anwo la na bɛbubule bie mɔ bɛvale bɛsosɔle bane ne mɔ.

¹¹Bɛzile pike wɔ bane nwiɔ ne avinli bɛmanle azule dɛba ne zenzenle ragyinlanle nu. Noko bɛandwenle ahenle mɔɔ yɛle la anwo, yɛɛ bɛambu ahenle mɔɔ dwenlenle nwolɛ hyehyɛle dole ɛkɛ ne dɛba dɛba la bie.

¹²Mekɛ ne anu Tumivolɛ Awulae Nyamenle ne zele bɛ kɛ bɛzu na bɛli nyane, bɛkpa bɛ ti na bɛheda ɛrele;

¹³ na nea, bɛmanle bɛ nye liele, bɛlile fɛlɛko, bɛhunle nlankɛ nee mboane, bɛlile nane na bɛnlonle nwanye, na bɛhanle kɛ, “Bɛmaa yɛli na yɛnlo, na ɛhyema ɛnee yɛwu.”

¹⁴Tumivolɛ Ɛdɛnkɛma ɛha ɛmaa mede ye me nzo nu kɛ, “Nɔhalɛ, bɛnrɛva ɛtane ɛhye bɛnrɛhyɛ bɛ toonwo bɛkɛwu. Medame Tumivolɛ Awulae Nyamenle a mese a.”

¹⁵Tumivolɛ Awulae Nyamenle se, “Bɛla, kɔ Hyɛbena mɔɔ nea belemgbunli awuke ne azo la ɛkɛ na biza ye kɛ,

¹⁶‘Duzu debie a ɛyɛ ye ɛke a, yɛɛ ɛ nee nwane a wɔ ɛke, mɔɔ yemɔti wɔbɔ nla wɔmaa ɛ nwo wɔ ɛke a? Wɔmɔ, ɛbɔ nla awoka zo na ɛtu bɔne wɔ bodane nu ɛyɛ wɔ tɛnlabelɛ.

¹⁷Nea, Ɛdɛnkɛma bavuandi wɔ ado kpole kpalɛ; ɛdawɔ ɛse ɛ nwo yɛ se! Ɔbazɔ wɔ mrɛlakɛ bo yeabili wɔ,

¹⁸na yeavuandi wɔ kɛ bɔlo la yeade azɛlɛ tɛtɛlɛ bie azo; ɛkɛ ne yɛɛ ɛbawu na wɔ konle ehwili kɛnlɛma ne aha a. Anyiemgbanli, ɛ nwo yɛ nyiane wɔ ɛ menle sua nu bɔbɔ.

¹⁹Ɛdɛnkɛma bamaa bɛaye wɔ gyima nu, na bɛaza wɔ bɛalie wɔ gyinlabelɛ ne.’ ”

²⁰Ɛdɛnkɛma zele Hyɛbena kɛ, “Mekɛ ne anu mebavɛlɛ me sonvolɛ Yilayakem, Helekaya ara nrenya ne,

²¹na meava wɔ tɛladeɛ ne meawula ye, meava wɔ akyeso ne meahye ye, na meava wɔ tumi ne mɔɔ ɛlɛ la meamaa ye. Na ɔbayɛ bɛdabɛ mɔɔ bɛwɔ Gyɛlusalɛm ɛkɛ nee Dwuda amuala la bɛ ze.

²² Mebava Devidi awuke nu sanvɛ ne meamaa ye; ɔbabuke, na awie biala ɛnrɛhola nuhua to; ɔbado nu, na awie biala ɛnrɛhola ye buke.

²³Mebakpɔnla ye kɛ sika wɔ ɛleka kpalɛ, na ɔbayɛ anyunlunyia kpole yeamaa ɔ ze awuke nu amra.

²⁴“Bɛbava debie biala mɔɔ wɔ ɔ ze awuke nu ɛkɛ ne la bɛawula ɔ sa nu: mralɛ nee nlɔnra, ahɔpo mralɛ nee mgbole, nee debie biala bakpolo ɔ kɔme.

²⁵Na mekɛ ne anu medame Tumivolɛ Ɛdɛnkɛma mese: Sika ne mɔɔ memkpɔnlanle la bakpɔlɔ na yeabu yeadɔ, na kpomgbolo ne mɔɔ kpolo ye la aye, ɔluakɛ medame Ɛdɛnkɛma a mese a.”