Read Nzema Aye 23 Bible Online

Aye 23 - Nzema bible

Aye 23

¹ Nyamenle nrɛlaleɛ mɔɔ fane Taya anwo la ɛne: O Sepeen meli nu amra, bɛzu bɛye awolɛ, ɔluakɛ Taya ɛbɔ, sua ɛnle zolɛ na yeayɛ ahonle mɔɔ meli gyinla ɛkɛ a ɔyɛ boɛ a. Nrɛlaleɛ ne vi Saepolɔso a rale a. Luk 10.13-14

²Bɛzie bɛ nwo diinyi, Saedɛn gualilɛma mɔɔ gua ɛnweanloa la, bɛ soanvolɛma ne pɛle nyevile ne

³na bɛdwule tɛtɛlɛ nu lɔ. Bɛvale bɛ ezukoa ne bɛdɔle abɛlɛ wɔ Yigyibiti[5] mɔɔ wɔ Azule Naele ne anloa la, na bɛ nee maanle maanle lile gua.

⁴O Saedɛn, wɔbɔ anyiemgba! Ɔluakɛ nyevile tandane ne ɛye wɔ. Ɔse, “Me ko ɛtɛkanle me yɛɛ metɛwole ɛlɛ. Metɛtetele ngakula mrenya anzɛɛ ngakula mraalɛ ɛlɛ.”

⁵Saa edwɛkɛ ne dwu Yigyibiti a, ɛzulolɛ kpole baha bɛ wɔ mɔɔ ɛzi Taya la ati.

⁶O Fonehyeama mɔɔ de ɛnweanloa, bɛzu bɛye awolɛ! Bɛnriandi bɛhɔ Sepeen![6]

⁷Asoo bɛ anyelielɛ suakpole ne mɔɔ bɛkyekyele mɔmoane ne la, yemɔ ɛne? Asoo bɛ suakpole ne mɔɔ zolɛ menli kɔ moa moa kɔbɔ nzeseɛ kyekye maanle la, yemɔ ɛne?

⁸Nwane yɛɛ ɛhyehyɛ ɛhye ɛtia Taya a, arelemgbunli mgbole sua zo? Anrɛɛ ye gualilɛma le arelemgbunli; yɛɛ azɛlɛ ye azo amra amuala bu ye gualilɛma.

⁹Tumivolɛ Ɛdɛnkɛma a ɛhyehyɛ a, kɛ ɔfa yeazɛkye adubɛnwoma anyunlunyia, na yeagua bɛdabɛ mɔɔ ewiade amra di bɛ eni la anyunlu aze.

¹⁰O Sepeenema, bɛde bɛkponde bɛ azɛlɛ ne azo amuala kɛ Azule Naele bu aze la, na kɛkala awie bieko ɛnle ɛkɛ mɔɔ kola si bɛ aze a.

¹¹Ɛdɛnkɛma ɛdende ɔ sa nyevile ne azo, yekpusu maanle maanle ne mɔ, na yeze kɛ bɛzɛkye Keena nee ye aranemgbole ne mɔ.

¹²Ɔse, “Bɛmɛ Saedɛnema, bɛ anyelielɛ ɛwie. Bɛdwazo, bɛnriandi bɛhɔ Saepolɔso; ɛkɛ ne bɔbɔ, bɛ nzo nu ɛnrɛdwo bɛ.”

¹³(Bɛnlea Babeloniama! Bɛmɛ ɔ, na tɛ Aseleama ɔ. Babeloniama a ɛmaa ɛbɔ nu nanemgbole ɛrazɛkye Taya a. Bɛbɛnrale bɛyiale ye, bɛbubule ye azua ne mɔ na bɛbɔle sua ne tɔɔ bɛyɛle ye suadu.)

¹⁴O Sepeen meli nu amra, bɛzu bɛye awolɛ, ɔluakɛ bɛbubu bɛ aranemgbole ne mɔ bɛgua.

¹⁵Mekɛ ne anu menli arɛle bavi Taya ɛvolɛ abulasuu, ɔle belemgbunli ko ngoane mekɛ. Ɛvolɛ abulasuu ne dwu a, mɔɔ bazi Taya anwo zo la le kɛ edwɛne ne mɔɔ tuutuunli ne dole la.

¹⁶Ɔse, “Fa wɔ getaa kpole ne, duolua suakpole ne azo, O tuutuunli mɔɔ bɛ rɛle ɛvi wɔ a! To edwɛne fɛlɛko, to edwɛne dɔɔnwo, amaa bɛava bɛahakye wɔ.”

¹⁷Saa ɛvolɛ abulasuu ne dwu a, Ɛdɛnkɛma bahɔkpɔla Taya, na Taya bazia ahɔ ye tuutuu gualilɛ gyima ne azo, na ɔ nee maanle maanle kɔsɔɔti mɔɔ wɔ aleɛabo la ali gua.

¹⁸Ye gualilɛ ninyɛne nee mɔɔ ɔkɛnyia bɛ wɔ ɛkpa ɛbɔlɛ nu la, bɛbadu bɛamaa Ɛdɛnkɛma. Bɛnrɛva bɛnrɛzie yɛɛ bɛnrɛva bɛnrɛvea. Ye gualilɛ ninyɛne bamaa yeanyia aleɛ dɔɔnwo nee ndanlɛ ngɛnlɛma yeamaa bɛdabɛ mɔɔ bɛsonle Ɛdɛnkɛma la.