Read Nzema Aye 24 Bible Online

Aye 24 - Nzema bible

Aye 24

¹Bɛnlea, Ɛdɛnkɛma bazɛkye ewiade amuala yeayɛ ye mgbane yeado ye ɛkɛ. Ɔbadu azɛlɛ ne anye yeafonyia na yeakponde menli mɔɔ de zo la amuala.

²Mɔɔ ɔbava yeayɛ menli ne la, zɔhane ala yɛɛ ɔbava yeayɛ sɛlɛvolɛma ne mɔ a, yɛɛ mɔɔ ɔbava yeayɛ kanranli la, zɔhane ala yɛɛ ɔbava yeayɛ ɔ menle a. Mɔɔ ɔbava yeayɛ sonvolɛ raalɛ la, zɔhane ala a ɔbava yeayɛ ɔ menle raalɛ a. Mɔɔ ɔbava yeayɛ mɔɔ tɔ la, zɔhane ala yɛɛ ɔbava yeayɛ mɔɔ tɔne la a; mɔɔ ɔbava yeayɛ mɔɔ bɔ bosea la, zɔhane ala yɛɛ ɔbava yeayɛ mɔɔ biza bosea la a; yɛɛ mɔɔ ɔbava yeayɛ mɔɔ fa ninyɛne fili la, zɔhane ala yɛɛ ɔbava yeayɛ mɔɔ filivili ninyɛne la a.

³Azɛlɛ ye amuala badɔ mgbane na zolɛ ninyɛne kɔsɔɔti azɛkye, ɔluakɛ Ɛdɛnkɛma yɛɛ ɛha a.

⁴Azɛlɛ ye ɛwe, ɛhete, ewiade amuala ɛtuto, ninyɛne kɔsɔɔti ɛnwoso, anwuma nee aze amuala ɛdo toboloo.

⁵Menli mɔɔ wɔ ewiade la ɛzɛkye azɛlɛ ye, ɔluakɛ bɛbulu Nyamenle mɛla ne mɔ azo, bɛzɛkye ye ngyehyɛlɛ ne mɔ na bɛtulu ye damɛnlangoate ngyekyeleɛ ne.

⁶Ɛhye ati munzule ɛha azɛlɛ ye yɛɛ zolɛ menli ɛlɛnwu amaneɛ wɔ bɛ ɛtane ne ati. Yemɔti azɛlɛ ye azo amra ɛlɛyela, menli ekyi bie a ɛha a.

⁷Nwanye nwo ɛhyia, ɔluakɛ vanye mbaka ne mɔ ɛdwɔlɔdwɔlɔ; menli mɔɔ anrɛɛ anye die bɛ nwo la adwenle ɛzɛkye.

⁸Awie ɛnde getaa mgbole ne mɔ ane, sɔnwosɔnwo nee ahenle ne mɔ ane ɛgua, yɛɛ anyelielɛ alɛra ne ɛzi aze.

⁹Bɛndɛnla nza bo bɛndo edwɛne bieko yɛɛ nza ɛsesebɛ ɛyɛ ɛnwonle ɛmaa menli mɔɔ no la.

¹⁰Suakpole ne azo begyebegye ne akee ɛbo zo, awie biala ɛdo ɔ nwo anlenkɛ nu, amaa awie gyɛne ambanwolo ɛkɛ.

¹¹Awie biala ɛlɛsu kɛ nza ɛwie, anyelielɛ bo ɛdu, yɛɛ fɛlɛkolilɛ ɛnle ewiade ne anu bieko.

¹²Suakpole ne azo ɛyɛ kɛnlanana, nlenkɛ mgbole ne mɔ ɛgolo ɛgua.

¹³Zɛhae yɛɛ maanle maanle ne mɔ kɔsɔɔti anu bayɛ a. Maanle maanle ne mɔ amuala anu bayɛ hilihelee kɛ ɔlivi baka mɔɔ bɛwie zolɛ ma kpolo, anzɛɛ vanye baka mɔɔ bɛwie zolɛ ma tete la.

¹⁴Bɛmaa bɛ ne zo bɛto anyelielɛ edwɛne, yɛɛ adɔleɛ amra fa fɛlɛkolilɛ teɛdea nu wɔ Ɛdɛnkɛma kpoleyɛlɛ nwo.

¹⁵Yemɔti bɛdabɛ mɔɔ bɛwɔ aduduleɛ la, bɛwula Ɛdɛnkɛma anyunlunyia, na bɛdabɛ mɔɔ bɛde ɛnweanloa la ɛye Ɛdɛnkɛma, Yizilayɛ Nyamenle ne ayɛlɛ.

¹⁶Wɔ ewiade muleɛ kɔsɔɔti azo yɛte kɛ bɛlɛto ayɛlɛyelɛ nee anyunlunyia edwɛne bɛamaa Tenlenenli Ko ne. Na mame, mese, “Nyane ngome ɛwie me kyekye, nyane ngome ɛwie me kyekye. Abule ɛbu me! Ngunzima tɛyɛ bɛ ngunzi ninyɛne ne mɔ, yɛɛ akee bɛ ngunziyɛlɛ ne ɛyɛ kpole kpalɛ.”

¹⁷O ewiade amra, ɛzulolɛ, ɛhane, yɛɛ ewule kuma ɛva bɛ aze.

¹⁸Mɔɔ kɛde ɛzulolɛ nganeɛ na ɔkɛnriandi la bahɔdɔ ewule kuma nu, yɛɛ mɔɔ kɛbɔ mɔdenle kɛvo file zo kɛvi ewule kuma nu la badɔ ɛhane nu. Ɔluakɛ bɛbukebuke anwuma nvɛnzɛlɛ ne mɔ, na azɛlɛ ye adiabo ne mɔ ɛlɛkpusu.

¹⁹Azɛlɛ ye ɛkpuke kpole bie, nuhua ɛkpakye nwiɔ. Azɛlɛ ye ɛkpusu kpole kpalɛ.

²⁰Azɛlɛ ye ɛyɛ konikoni kɛ sonla mɔɔ ɛbo nza la, na yehyea kɛ kpɔda. Ye ɛtane ɛbo ɔ nwo zo, na ɔbagolo yeagua mɔɔ ɔnrɛdwazo bieko ɛlɛ a.

²¹Mekɛ zɔhane Ɛdɛnkɛma badea anwuma tumivolɛma wɔ anwuma lɔ na yeadea azɛlɛ ye azo arelemgbunli wɔ aze ɛke.

²²Bɛbaboɔboa bɛ muala bɛ nloa kɛ pilizama mɔɔ gua kuma nu la; bɛbagua bɛ efiade na mekɛ dɔɔnwo gua nu a bɛadea bɛ.

²³Akee siane ne balu kisii na sɛnzɛne ne ɛnrɛda bieko, ɔluakɛ Tumivolɛ Ɛdɛnkɛma bali belemgbunli wɔ Zayɔn Boka nee Gyɛlusalɛm na yeahile ye anyunlunyia ne wɔ ye mgbanyima ne mɔ anyunlu.