Read Nzema Aye 25 Bible Online

Aye 25 - Nzema bible

Aye 25

¹O Ɛdɛnkɛma, ɛle me Nyamenle; mebali wɔ eni kpole, mebaye wɔ duma ayɛlɛ, ɔluakɛ wɔyɛ nwanwane ninyɛne, tete yɛɛ ɛhyehyɛle bɛ a, yɛɛ nɔhalɛ nu wɔyɛ.

²Wɔyɛ suakpole ne ewula edukue, wɔyɛ suakpole ne mɔɔ bɛhye nwolɛ la suadu; nyɛvolɛ ne mɔ suakunlu ne mɔ mɔɔ bɛsisile la ɛnle ɛkɛ bieko, awie ɛnrɛkyekye ye bieko ɛlɛ.

³Yemɔti maanle maanle mɔɔ anwo yɛ se la baye wɔ ayɛlɛ; bɛbazulo wɔ wɔ maanle maanle mɔɔ ati yɛ se la azuamgbole zo.

⁴Ɔluakɛ wɔyɛ ɛvealeka kpundii wɔmaa ehyianvolɛma, ɛvealeka kpundii wɔmaa bɛdabɛ mɔɔ bɛhyia la wɔ bɛ amaneɛnwunlɛ mekɛ nu; wɔyɛ enyinlike wɔwowa bɛ wɔ ahumu nee ewia samɛnlankɛ nu; ɔluakɛ atisesebɛma ɛtetalɛ ne le kɛ ahumu mɔɔ ɛlɛtia bane la;

⁵ɔle kɛ anwoma wuluwulu mɔɔ ɛlɛbɔ ɛsɛlɛ zo la. Ɛmaa nyɛvolɛ ne mɔ alɛrayɛlɛ gua; kɛ amungu si fa alubo wa ewia samɛnlankɛ nye la, zɔhane ala yɛɛ wɔmaa atisesebɛma ɛgyakyi edwɛndolɛ a.

⁶Zayɔn Boka ye azo yɛɛ Tumivolɛ Ɛdɛnkɛma bava nane mɔɔ ɛlɔ nee nwanye mɔɔ ɛbe kpalɛ la ado ɛkponle amaa maanle maanle ne mɔ a.

⁷Ɔbazɛkye debie biala mɔɔ bɛva bɛyɛ aguzo bɛheda maanle maanle ne mɔ azo la wɔ boka ɛhye azo.

⁸ Ɔbame ewule bɔkɔɔ, na Awulae Nyamenle ne bakyikyi awie biala anye anwo monle, na yeakpa bɛ nwo nyiane kɔsɔɔti yeavi azɛlɛ ye azo. Ɛdɛnkɛma ɔdaye a ɔse a.

⁹Mekɛ ne anu bɛbaha kɛ, “Bɛnlea, yɛ Nyamenle ne ɛne, yɛhendɛ ye, amaa yealie yɛ ngoane. Ɛdɛnkɛma ɛne, yɛhendɛ ye; bɛmaa yɛ nye ɛlie na yɛli fɛlɛko wɔ ye ngoanelielɛ ne ati.”

¹⁰ Ɛdɛnkɛma tumi ne baheda Boka Zayɔn azo, na bɛbatietia Mowabe anwo zo kɛ bɛtietia ndɔ wulera zo wɔ ewula kuma nu la.

¹¹Ɔbatoto ɔ sa kɛ sonla mɔɔ ɛlɛweɛ azule la. Noko Ɛdɛnkɛma babɛlɛ ye mgbanyizonle ne nee ye azuleweɛlɛ kɛnlɛma ne aze.

¹²Ɔbabubu ye bane ndendenle ne mɔ mɔɔ yelie yebɔ ɔ nwo bane la yeagua aze fɛɛnye.