Read Nzema Aye 27 Bible Online

Aye 27 - Nzema bible

Aye 27

¹ Mekɛ ne anu Ɛdɛnkɛma bava ye dadeɛ ɛsesebɛ, kpole, nlane ne adua ɛwɔlɛ ne mɔɔ ɛlɛnriandi la, Lɛveatan mɔɔ wuluwulu kakyihakyi ɔ nwo la kakɛ. Ɔbahu Lɛveatan na yeahu nane anwo ɛzulolɛ ne mɔɔ le kɛ ɛlɛnrɛne mɔɔ la nyevile ne anu la.

²Mekɛ ne anu Ɛdɛnkɛma baha kɛ, “Bɛdo vanye egyinli kɛnlɛma ne anwo edwɛne!

³Medame Ɛdɛnkɛma a menea zolɛ a. Mekɛ biala megugua nzule zolɛ. Amaa awie anzɛkye ye la, mesinza ye nɔɔzo nee ewiazo.

⁴Menva ɛya. Anrɛɛ ɛnee mbowule nee mbowunzaka wɔ nu mɔɔ me nee bɛ ko a, anrɛɛ menwɔteta bɛ na menwɔbɔ bɛ nu menwɔyela bɛ.

⁵Anzɛɛ saa bɛto bɛ nloa aze kɛ bɛkpondɛ kɛ mefa bɛ mewula me kunlu a, ɛnee bɛ nee me ɛdɛnla anzonudwolɛ nu. Ɛhɛe, bɛ nee me ɛdɛnla anzonudwolɛ nu.”

⁶Mekɛ mɔɔ bara la anu Gyekɔbo abo zo amra abo bazɔ ndinli, Yizilayɛma bakpazi na bɛ nwo azo dɔɔnwo, na bɛ bo zo amra ava ewiade amuala.

⁷Ɛdɛnkɛma ɛtɛteanle Yizilayɛma, kɛmɔ ɔdeanle bɛdabɛ mɔɔ bɛkpɔ bɛ la, yɛɛ ɔtɛkunle bɛ, kɛmɔ bɛhunle bɛ kpɔvolɛma ne la.

⁸Ngyikyi ngyikyi, ɛ nee bɛ lile na ɛmanle bɛhyele bɛ bɛhɔle nlɔnu, ɛvale wɔ aduduleɛ anwoma anloa ɛsesebɛ ne ɛvoanle bɛ.

⁹Yemɔti debie mɔɔ Yizilayɛma yɛ a bɛkɛva bɛ ɛtane bɛkɛhyɛ bɛ la a le ɛhye: saa bɛbubu awozonle azukponle ne mɔ, bɛti bɛ motomoto kɛ munlutu, bɛbubu bɛ bozonle raalɛ Ahyela ne sɛkɛlɛneɛ anzɛɛ ɛyɛlɛ ɛkpunlɛ azukponle ne mɔ mɔɔ biala ɛnle ɛkɛ ne bieko la a, bɛkɛva bɛ ɛtane ne mɔ kɔsɔɔti bɛkɛhyɛ bɛ.

¹⁰Suakpole ne mɔɔ bɛbɔ nwolɛ bane la ɛyɛ suadu; yeyɛ ɛleka mɔɔ bɛkpo ye na bɛ rɛle ɛvi ye kɛ ɛsɛlɛ la. Ɛkɛ ne yɛɛ nlankɛ mralɛ didi na bɛda bɛdie bɛ ɛnwomenle a.

¹¹Saa suakpole ne azo mbaka ne bie mɔ ngane wu a bɛbubu bɛ bɛgua; mraalɛ basesa na bɛfa bɛyɛ ɛyɛne. Ɔluakɛ menli ɛhye mɔ ɛnlɛ ndelebɛbo; yemɔti mɔɔ bɔle bɛ la ɛnrɛze bɛ anwunvɔne, yɛɛ ɔnrɛvavi bɛ.

¹²Mekɛ ne anu Ɛdɛnkɛma bawozo ma ne, ɔvi Azule Yufileti ne anloa yeahɔgua ye wɔ Azudenle ne mɔɔ wɔ Yigyibiti ɛweɛne zo la anloa. O Yizilayɛma, bɛbadindi bɛ ngoko ngoko na bɛaboa bɛ nloa.

¹³Mekɛ ne anu bɛbabɔ aweɛne tendenle kpole ne anu, na bɛdabɛ mɔɔ bɛminlinle bɛhɔle Aselea azɛlɛ zo, nee bɛdabɛ mɔɔ bɛvoanle bɛ bɛmanle bɛhɔle Yigyibiti azɛlɛ zo la bara na bɛarazonle Ɛdɛnkɛma wɔ Boka Nwuanzanwuanza ne azo wɔ Gyɛlusalɛm.