Read Nzema Aye 28 Bible Online

Aye 28 - Nzema bible

Aye 28

¹Munzule ɛha Yizilayɛ suakpole kɛnlɛma ne mɔɔ nzabovoma ɛyi ye tɛkɛɛ la! Munzule ɛha ye, ye anyunlunyia ɛlɛkpa kɛ ndotolo abɔtile mɔɔ bobɔ menli mɔɔ nza ɛgya bɛ la ati wɔ anwonyia bɔnza nu la.

²Bɛnlea, Awulae lɛ awie mɔɔ le katakyie na ɔ nwo yɛ se la; ahenle zɔhane le kɛ ahumu mɔɔ ɛlɛtu atete ezuawolɛ agua la, ahumu kpole mɔɔ sɛkye ninyɛne, ahumu anloa ɛsesebɛ mɔɔ maa azule yi bu aze la; ɔbava ɛzɛkyelɛ kpole yeara, yeadudu debie biala yeagua.

³Bɛbali Yizilayɛ suakpole kɛnlɛma ne mɔɔ nzabovoma ɛyi ye tɛkɛɛ la anwo zo konim;

⁴na ye anyunlunyia ne mɔɔ ɛlɛkpa kɛ ndotolo abɔtile mɔɔ bobɔ menli mɔɔ wɔ anwonyia bɔnza nu la ati la bayɛ kɛ wawaa nloa feege nzoleɛ mɔɔ kɛlumua kɛbolo la. Saa sonla nwu ye a, ɔte ɔdi ndɛndɛ.

⁵Mekɛ ne anu Tumivolɛ Ɛdɛnkɛma bayɛ kɛ anyunlunyia abɔtile nee zolɛ kpɔba kɛnlɛma yeamaa ye menli ne mɔɔ hale la.

⁶Ɔbamaa mɔɔ bua ndɛne la pɛlepɛlelilɛ ahonle yeamaa yeabua ndɛne fɔɔnwo, na yeamaa mɔɔ ka konlema gua wɔ anlenkɛ kpole ne anloa la anwosesebɛ.

⁷Menli ɛhye mɔ noko no nwanye bo yɛɛ bɛno nza ɛsesebɛ bɛtinda. Sɛlɛvolɛma nee Nyamenle kpɔmanvolɛma no nza ɛsesebɛ tinda. Nwanye maa bɛ adwenle ka bɔ nu yɛɛ nza ɛsesebɛ maa bɛtinda. Bɛfo wɔ bɛ ɛnyelɛzodeɛnwunlɛ nu, yɛɛ bɛmbua ndɛne fɔɔnwo.

⁸Bɛ ɛkponle mɔɔ bɛde nwolɛ la azo le ɛveleɛ ngome, ɛleka ekyi bɔbɔ ɛnle zo mɔɔ le bɔkɔbɔkɔ a.

⁹Bɛbiza kɛ, “Nwane a ɔkɛhilehile ye ɔkɛbuke ye adwenle nu a, yɛɛ nwane a ɔkɛhile ye nrɛlaleɛ ne anu ɔkɛhile ye a? Asoo bɛdabɛ mɔɔ bɛva ɛnlankɛ nyɛfonzule bɛli bɛ adane, anzɛɛ bɛdabɛ mɔɔ bɔ zo mɔɔ bɛpɛ bɛ nyɛfonlɛ la?

¹⁰Ɔluakɛ ɔkilehile yɛ edwɛkɛ agbɔkɛ, ɛhonlone ɛhonlone, ɛke ekyi, nehane ekyi.”

¹¹ Kyɛkyɛ, Ɛdɛnkɛma balua menli mɔɔ ka aneɛ gyɛne la anwo zo adendɛ ahile menli ɛhye mɔ

¹²mɔɔ ɔzele bɛ kɛ, “Ɛnwomenlelielɛ a le ɛhye, bɛmaa mɔɔ ɛvɛ la ɛlie ye ɛnwomenle, ɛhye a le ɛnwomenlelielɛ a,” noko bɛandie la.

¹³Zɔhane ati Ɛdɛnkɛma edwɛkɛ ne bayɛ bɛ kɔme nu edwɛkɛ agbɔkɛ agbɔkɛ, ɛhonlone, ɛhonlone, ɛke ekyi, nehane ekyi, amaa bɛahɔ na bɛadu bɛagua alɛnranyunlu, bɛabubu na bɛahye bɛ ɛhane nu bɛ nee bɛ ahɔ.

¹⁴Yemɔti bɛmɛ agolobɛnwoma mɔɔ bɛsie menli ɛhye mɔ wɔ Gyɛlusalɛm la, bɛdie Ɛdɛnkɛma!

¹⁵Kɛmɔ bɛha kɛ, “Yɛ nee ewule ɛyɛ ngyekyeleɛ, yɛɛ yɛ nee ɛbolɔ ɛyɛ ngyehyɛlɛ la, saa munzule kpole ne ba a ɔnrɛha yɛ, ɔluakɛ yɛmaa adalɛ ɛyɛ yɛ ɛvealeka, yɛɛ adalɛ nu a yɛnriandi yɛhɔvea a.”

¹⁶ Yemɔti kɛ Awulae Nyamenle ne se la ɛne, “Bɛnlea, melɛfa bolɛ meado adiabo wɔ Zayɔn. Ɔbayɛ bolɛ mɔɔ bɛzɔ bɛnlea, mgbɛnezo bolɛ mɔɔ sonle bolɛ kpalɛ wɔ adiabo kpundii nu, na meahɛlɛ zolɛ kɛ, ‘Mɔɔ die di la ɛnrɛpele ndɛ.’

¹⁷Mebamaa pɛlepɛlelilɛ ayɛ ɛzuzulɛ nyɛma ne na tenleneyɛlɛ ayɛ ɔ ti bolɛ ne. Ezuawolɛ ahumu bapia ɛvealeka ɛtane ne ahɔ na nzule ayi ava bodane ne.”

¹⁸Akee bɛbazɛkye ngyekyeleɛ ne mɔɔ bɛ nee ewule kyekyɛle, yɛɛ ngyehyɛlɛ ne mɔɔ bɛ nee Ɛbolɔ hyehyɛle la. Saa munzule kpole ne ba a, ɔbabu yeava bɛ nwo zo.

¹⁹Mekɛ dodo biala mɔɔ ɔse la, ɔbava bɛ, ɔluakɛ nwonlomɔ biala, alehyenlɛ biala nee aledwolɛ biala ɔbara, na nrɛlaleɛ biala mɔɔ bara la bayɛ ɛzulolɛ mɔɔ bɛnrɛde ɔ bo a.

²⁰Ɔluakɛ ɛkpa ne le ezinraa mɔɔ bɛda zolɛ a bɛngola bɛ nwo tenrɛ, yɛɛ mɔɔ bɛfa bɛagua bɛ nwo la bayɛ ɛdenraa; ɔnrɛza bɛ nwo gua.

²¹ Ɔluakɛ Ɛdɛnkɛma bamaa ɔ nwo zo, kɛmɔ ɔyɛle wɔ Pɛleezem Boka, yɛɛ ye ɛya ne bayɛ kɛ mɔɔ ɔvale wɔ Gebɛyɔn Bɔnza la. Saa ye nyɛleɛ yɛ ɛzulolɛ bɔbɔ a, ɔbayɛ, yɛɛ saa ye gyimayɛlɛ yɛ nwanwane bɔbɔ a, ɔbali gyima ne yeawie.

²²Yemɔti bɛmmasi amgbu na anrɛɛ bɛ ndeanlɛ kɛyɛ kpole, ɔluakɛ mede kɛ Tumivolɛ Awulae Nyamenle ne ɛli mɛla bie mɔɔ ɔbava yeazɛkye azɛlɛ ye amuala a.

²³Bɛdie, bɛdie mɔɔ melɛka la; bɛyɛ ɛnzonlɛ bɛdie me edwɛkɛ.

²⁴Asoo mɔɔ so ɛya dua la so ɛya dahuu? Asoo dahuu ɔtudu azɛlɛ nwo, ɔfunvu ahuma?

²⁵Saa ɔsiezie azɛlɛ ne ɔwie a asoo ɔmkponde aledonlɛ nya nya evuanlɛ ma wɔ azɛlɛ ne azo, na ɔnlua hwiiti nee baale ɛhonlone ɛhonlone wɔ ɛleka mɔɔ fɛta la, na ɔngya bɛ ɛweɛne?

²⁶Sonla zɛhae ze mɔɔ ɔwɔ kɛ ɔyɛ la, ye Nyamenle ne a kilehile ye a.

²⁷Aledonlɛ ninyɛne evuanlɛ ne mɔ, bɛnva ɛnlankɛ nee ehwili bɛntietia zolɛ bɛnwozo. Bɛfa baka a bɛbolo a.

²⁸Asoo bɛwozo hwiiti ma a bɛgelegele nu? Kyɛkyɛ, bɛnyɛ ye zɔhane ɛlɛ. Saa ɔka ye ehwili ne yeawozo a, ɔyɛ ye bɛtɛɛ na yeangelegele ma ne anu.

²⁹Ɛhye noko vi Tumivolɛ Ɛdɛnkɛma. Ye folɛdulɛ yɛ nwanwane, yɛɛ ye nrɛlɛbɛ bo zolɛ.