Read Nzema Aye 29 Bible Online

Aye 29 - Nzema bible

Aye 29

¹Munzule ɛha Ɛlayɛle, Gyɛlusalɛm suakpole ne mɔɔ belemgbunli Devidi dɛnlanle zolɛ la. Bɛva ɛvolɛ bɛdo ɛvolɛ zo na bɛmaa ɛkponledolɛ ɛhɔ zo mekɛ biala.

²Noko mebamaa Ɛlayɛle anwu amaneɛ. Bɛbazu bɛaye awolɛ, na suakpole ne bayɛ kɛ azukponle Ɛlayɛle la.

³Mebava ɛlɔne measisi tawa ndendenle meabɛnra meayia wɔ, na meahuohua anwea meazi wɔ bane ne.

⁴Ɛbadendɛ ɛ bonyi nu kɛ nwomenle, na ɛ ne aminli ɛ nwo kɛ sonla mɔɔ vea ndɛtɛlɛ nu la.

⁵Na bɛbabɔ wɔ kpɔvolɛma dɔɔnwo ne bɛagua kɛ munlutu, yɛɛ atisesebɛma banriandi kɛ abonle mɔɔ anwoma ɛlɛbɔ ye ahɔ la. Na mɔɔ ɛ nye zo katete wɔ la, arɛlevilɛ nu ala,

⁶Tumivolɛ Ɛdɛnkɛma bava ɛnelɛ kpole, ɛhululɛ nee azɛlɛkpusulɛ aralie wɔ. Ɔbara kɛ ahumuakyima nee ahumu kpole, yɛɛ sendɔlɔra senle la.

⁷Na maanle maanle ɛwolaa ne mɔɔ ɛlɛko atia Ɛlayɛle, bɛdabɛ mɔɔ bɛlɛko bɛava ye aranemgbole ne na bɛahwe amaneɛnwunlɛ bɛamaa ye la bayɛ kɛ ɛlalɛ bie, anzɛɛ nɔɔzo ɛnyelɛzodeɛnwunlɛ bie la.

⁸Na kɛ sonla mɔɔ ɛhɔne ɛlɛku ye la ka ɛlalɛ a ɛnee ɔlɛdi debie, noko ɔtunwue a ɛnee ɛhɔne ne tɛku ye, anzɛɛ kɛ sonla mɔɔ nzuhɔne ɛlɛku ye la ka ɛlalɛ a ɛnee ɔlɛno nzule, noko ɔtunwue a ɛnee nzuhɔne asɛɛ ɛmaa ɔ nye zo ɛbulu la, zɔhane ala yɛɛ maanle maanle ɛwolaa mɔɔ ko tia Zayɔn Boka la bayɛ a.

⁹Bɛhɔ zo bɛyɛ ahoasea gyibilito, bɛheda bɛ nye na bɛmaa bɛ nye ɛzi! Bɛmmano nwanye, noko bɛbo, yɛɛ bɛmmano nza ɛsesebɛ, noko bɛdinda!

¹⁰ Ɔluakɛ Ɛdɛnkɛma ɛva nafelɛ sunsum ɛwula bɛ na bɛbalafe botoo, na bɛmɛ Nyamenle kpɔmanvolɛma, yeheda bɛ nye, yɛɛ yeheda ɛnyelɛzodeɛnwunlɛma ati zo.

¹¹Ninyɛne ɛhye mɔ kɔsɔɔti anwo ɛnyelɛzodeɛnwunlɛ ɛyɛ kɛ edwɛkɛ mɔɔ wɔ buluku mɔɔ bɛzɔ ɔ nloa la anu la. Saa menli fa maa sonla mɔɔ kola kenga la kɛ, “Kenga ɛhye” a, ɔka kɛ, “Menrɛhola, ɔboalekɛ bɛzɔ ɔ nloa.”

¹²Eza saa bɛfa buluku ne bɛmaa sonla mɔɔ ɛnze kenga la kɛ ɔgenga a, ɔbua bɛ kɛ, “Menze kenga.”

¹³ Awulae zele kɛ, “Kɛmɔ menli ɛhye mɔ fa bɛ nloa mgbane a twe bikye me, bɛdi me eni na bɛ ahonle ɛmbikye me, yɛɛ bɛ ɛzulolɛ mɔɔ bɛsulo me la le menli mɛla mɔɔ ɛli la azolilɛ, na bɛzukoa bɛgua bɛ ti anu ala la,

¹⁴ bɛnlea, eza mebava menli ɛhye mɔ meayɛ ninyɛne ɛzulolɛ bie mɔɔ yɛ nwanwane a. Bɛ nrɛlɛbɛvolɛma nrɛlɛbɛ baminli, yɛɛ bɛ menli mɔɔ nwu adwenle nu la deɛnwunlɛ baminli.”

¹⁵Munzule ɛha bɛdabɛ mɔɔ bɛfa bɛ adwenle ngyehyɛlɛ bɛfea Ɛdɛnkɛma, na bɛfa awozinli bɛwa bɛ nye bɛyɛ nyɛleɛ bie, na bɛka kɛ, “Nwane a nwu yɛ a? Nwane a ze yɛ a?” la.

¹⁶ Bɛdabɛ bɛkakyi ninyɛne ti aze! Asoo buakɛ nwovolɛ bahakyi ɔ nwo ɛva, yeamaa deɛ ne mɔɔ yenwo la aha kɛ, “Tɛ wɔ a ɛnwonle me a.” Anzɛɛ asoo deɛ ne mɔɔ yehyehyɛ la baha kɛ, “Sonla ne mɔɔ hyehyɛle me la ɛnlɛ ndelebɛbo?”

¹⁷Ɔnrɛhyɛ biala ɛnee Lɛbanɔn ɛhakyi ɛya azɛlɛ mɔɔ kye aleɛ na ɛya azɛlɛ mɔɔ kye aleɛ la ahakyi kpɔkɛ.

¹⁸Mekɛ ne anu anzondilirama bade buluku nu edwɛkɛ, na anyenzinlirama vi bɛ awozinli kabii ne anu anwu debie.

¹⁹Sonla mɔɔ le bɛlɛvo la banyia anyelielɛ fofolɛ bie wɔ Ɛdɛnkɛma ati, na Yizilayɛ Nwuanzanwuanza Ko ne ati, ehyianvolɛma mɔɔ wɔ menli avinli la ali fɛlɛko.

²⁰Ɔluakɛ atisesebɛma ɛnrɛnyia ɛleka ɛnrɛgyinla yɛɛ agolobɛnwo bazi aze, na bɛbazɛkye bɛdabɛ mɔɔ bɛtetɛ bɛdi ɛtane la kɔsɔɔti.

²¹Menli zɛhae mɔ fa bɛ nloa maa sonla yɛ ɛtane, bɛsua mɔɔ de anlenkɛ kpole ne anloa twi bɛ nyunlu la ɛhane, na bɛfa adalɛbɔlɛ mgbane mgbane bɛbua mɔɔ di benle la mgbɔvondɛne.

²²Yemɔti kɛ Ɛdɛnkɛma mɔɔ liele Ebileham la ka mɔɔ fane Gyekɔbo abo zo amra ne anwo la ɛne: “Gyekɔbo abo zo amra anyunlu ɛnrɛgua aze bieko, bɛ nyunlu ɛnrɛza bieko.

²³Ɔluakɛ saa bɛnwu bɛ mra ne mɔ, medame me sa anloa gyima a, bɛbade me duma ne anwo; bɛbade medame Gyekɔbo Nwuanzanwuanza Ko ne duma ne anwo, na bɛazulo Yizilayɛ Nyamenle ne.

²⁴Bɛdabɛ mɔɔ sunsum nu bɛfo la bade ɔ bo, na bɛdabɛ mɔɔ bɛtendɛ bɛ nzo abo la balie ngilehilelɛ ne ado nu.”