Read Nzema Aye 3 Bible Online

Aye 3 - Nzema bible

Aye 3

¹Bɛnlea, Awulae Tumivolɛ Ɛdɛnkɛma ɛlɛye debie biala, aleɛ nee nzule, nee awie biala mɔɔ menli ne ati zɔ ye la avi Gyɛlusalɛm nee Dwuda.

²Katakyiema, ɛlɔnema, ndɛnebuavolɛma, Nyamenle kpɔmanvolɛma, menli mɔɔ tendɛ nwomenle nloa azo, maanle mgbanyinli,

³safohyenlema mɔɔ nea ɛlɔnema abulanlu anwo zo nee ɛlɔne nu mgbanyima mɔɔ ɛha la amuala, menli mɔɔ tu folɛ nee ngonyiama mɔɔ ɛbe kpalɛ, nee menli mɔɔ kola kye sili kpalɛ kpalɛ la, ɔbaye bɛ kɔsɔɔti yeavi ɛkɛ.

⁴Akee Ɛdɛnkɛma bamaa ngakula mrenya ayɛ arelemgbunli, na ngakula ndetendete azie maanle ne.

⁵Menli ne basisi bɛ nwo ngoko ngoko; awie biala basisi ɔ gɔnwo anzɛɛ ɔ diema. Mgbavolɛ nee mbɛlɛra bayɛ mgbanyizonle ahile mgbanyinli, yɛɛ kpamgbanvolɛma badu bɛ nwo ahile menli mɔɔ lɛ dibilɛ la.

⁶Mekɛ ne anu sonla bazɔ ɔ diema mɔɔ ɔ nee ye wɔ abusua ekpulike ko anu la na yeaze ye kɛ, “Wɔmɔ, ɛlɛ ndanlɛ ɛkeda, yemɔti yɛ yɛ abusua kpanyinli na nea yɛ nwo zo wɔ yɛ ngyianlɛ nee yɛ amaneɛnwunlɛ ye anu.”

⁷Na adiema ne baha kɛ, “Menrɛhola menrɛli bɛ kpanyinli. Menlɛ aleɛ anzɛɛ ɛdanlɛ wɔ me sua nu. Bɛfa me bɛdi kpanyinli a ɔnyɛ boɛ.”

⁸Dwuda maanle ne ɛzɛkye, Gyɛlusalɛm ɛbɔ, ɔboalekɛ bɛ ɛdendɛlɛ nee bɛ nyɛleɛ muala tia Ɛdɛnkɛma. Bɛngulo kɛ bɛnwu ye anyunlunyia ne.

⁹Bɛ mɔguazo ne di daselɛ tia bɛ. Bɛka bɛ nyɛleɛ ɛtane ne mɔ baguasee kɛ Sodɔm la. Bɛnvea nwolɛ. Munzule ɛha bɛ! Ɔluakɛ bɛhwe munzule bɛmaa bɛ nwo.

¹⁰Maa tenlenema ɛde kɛ ɔbayɛ boɛ yeamaa bɛ, ɔluakɛ bɛbadidi bɛ gyima mɔɔ bɛyɛ la anwo.

¹¹Munzule ɛha amumuyɛnli ne! Ɔnrɛwie boɛ ɛlɛ, ɔluakɛ mɔɔ yeyɛ la, bɛbayɛ ye bie bɛazie ɔ bo zo.

¹²Ngakula yɛɛ akee sisi me menli ne a, yɛɛ mraalɛ a sie bɛ a. O me menli, bɛ mgbanyima ne mɔ ɛda bɛ nye zo, ɛminli bɛ ndenle mɔɔ ɔwɔ kɛ bɛdua nu la.

¹³Ɛdɛnkɛma akee ɛrava ye gyinlabelɛ ne na yeboɔboa ɔ nwo kɛ ɔbua ye menli ne ndɛne.

¹⁴Ɛdɛnkɛma de ye ndɛnebualɛ ebia nu kɛ ɔbua ye menli ne mgbanyima ne nee bɛ arelemgbunli ne mɔ ndɛne. Ɔse, “Bɛdabɛ yɛɛ bɛzɛkye vanye egyinli ne anu ninyɛne kɔsɔɔti a. Ehyianvolɛma ninyɛne kɔsɔɔti wɔ bɛ azua nu.

¹⁵Duzu ati a bɛsisi me menli ne zɛhae, na bɛfa ehyianvolɛma anyunlu bɛkyikyi aze ɛ? Medame Tumivolɛ Awulae Nyamenle a mebiza bɛ a.”

¹⁶Ɛdɛnkɛma zele kɛ, “Kɛmɔ Gyɛlusalɛm mraalɛ memaa bɛ nwo zo, bɛtia a bɛtoto bɛ kɔme, bɛtwe bɛ nye anzi bɛkile mrenya, bɛbɔ bɛ gyakɛ aze bɛtia ahulomrenya nu la,

¹⁷medame Ɛdɛnkɛma, mebamaa bɛ ti anwo atulu abonle na meakpa bɛ nwo.”

¹⁸Mekɛ ne anu Awulae bamaa bɛayeye debie biala mɔɔ le kɛnlɛma mɔɔ bɛfa bɛsiezie bɛ nwo la, bɛ gyakɛ ngɛba, bɛ duku ne mɔ mɔɔ bɛfa bɛkye bɛ ti abo nee bɛ mgbɔba ne mɔ mɔɔ bɛfa bɛbobɔ bɛ kɛnra azo;

¹⁹bɛ ndweabane ti mgbɔba ne mɔ, bɛ sa ngɛba ne mɔ nee bɛ ti duku ne mɔ;

²⁰bɛ ti zo mgbɔba, bɛ funga ne mɔ, bɛ akyeso ne mɔ, bɛ ehuabɛtɛba, bɛ kiti ne mɔ;

²¹bɛ sa mgbɔdelera, bɛ bonyi nu ngɛba ne mɔ;

²²bɛ ɛvoyialilɛ adɛladeɛ ngɛnlɛma ne mɔ, bɛ bubu ne mɔ, bɛ adɛladeɛ aguzo ne mɔ, yɛɛ bɛ sa nu ahodoku ne mɔ;

²³bɛ leesi adɛladeɛ ne mɔ, bɛ lenen adɛladeɛ ne mɔ, bɛ abɔtile ne mɔ, yɛɛ bɛ ti zo ɛhedalɛ ndanlɛ ne mɔ, bɛbayeye bɛ muala bɛagua.

²⁴Bɛ nwo ɛnrɛbɔ evuanlɛ, bɛ nwo babɔ ɛnyane; bɛnrɛhye falɛ, bɛbahye nyɛma; bɛ ti enrinli ngɛnlɛma ne, bɛnrɛyɛ bɛ bieko, bɛ ti zo bakpa; bɛnrɛwula adɛladeɛ ngɛnlɛma, bɛbava ɛrele bɛakyekye bɛ nwo, na bɛ anwofɛlɛko ne bahakyi anyiemgba.

²⁵Mrenya ne mɔ badɔ dadeɛ nloa yɛɛ bɛ katakyiema bawu konle nu.

²⁶Bɛ suakpole ne nlenkɛ mgbole ne mɔ bazu aye awolɛ; suakpole mumua ne bayɛ kɛ raalɛ mɔɔ bɛkpa ɔ nwo na ɔkpofo azɛlɛ nwo la.