Read Nzema Aye 30 Bible Online

Aye 30 - Nzema bible

Aye 30

¹Ɛdɛnkɛma se, “Munzule ɛha ngakula mɔɔ te atua na bɛyɛ mɔɔ bɛdabɛ bɛkɛhyehyɛ na bɛnli me ngyehyɛlɛ ɛdeɛ ne azo la. Bɛ nee awie mɔ yɛ ngyehyɛlɛ wɔ mekɛ mɔɔ me sunsum ɛmboka bɛ nwo la, na bɛfa ɛtane bɛbɔ ɛtane zo.

²Bɛmbiza me ɛnee bɛzi nu kɛ bɛkɔ Yigyibiti bɛahɔbiza moalɛ bɛavi Yigyibiti belemgbunli ne ɛkɛ ne kɛ bɛkpondɛ ɛleka bɛavea na ɔlie bɛ ti.

³Zɔhane ati Yigyibiti belemgbunli ne ɛlielɛ mɔɔ ɔbalie bɛ la bahakyi bɛ nyunlu aze ɛgualɛ, yɛɛ ɛleka mɔɔ bɛbanyia ye wɔ Yigyibiti bɛavea la bamaa bɛabɔ anyiemgba.

⁴Ɔluakɛ ye maanle mgbanyima ne mɔ wɔ Zowan yɛɛ ye ɛbɔfoɔma wɔ Heenɛze bɔbɔ ɛdeɛ,

⁵noko bɛ nuhua ko biala anyunlu ɛgua aze kɛ bɛlie menli mɔɔ anwo ɛnlɛ nvasoɛ na bɛnlɛ moalɛ biala bɛmmaa bɛ kɛ anyiemgba nee nyiane ala la bɛli.”

⁶Nyamenle nrɛlaleɛ mɔɔ fane nane ne mɔ mɔɔ wɔ nyiakɛ ɛsɛlɛ ne azo lɔ la anwo la ɛne: “Bɛdua azɛlɛ mɔɔ nyane nee amaneɛnwunlɛ, awenade mbelɛ nee awenade nyinli, bɔna nee nwɔlɛ mɔɔ tu la wɔ zolɛ la avinli bɛfa anwonyia wɔ afunlumu nee asoaso zo bɛbɛlɛ menli mɔɔ bɛnnyia bɛ nwo zo nvasoɛ la.

⁷Ɔluakɛ Yigyibiti moalɛ le mgbane mɔɔ nvasoɛ ɛnle zolɛ a, yemɔti medo ye ‘Releehabe mɔɔ tɛnla diinyi’ la.”

⁸Nyamenle zele me kɛ akee mengɔ na mengɛlɛ ye bɛ nyunlu ɛkɛ ne wɔ bolɛ ɛdɛbaa zo nee buluku nu, amaa yeayɛ daselɛ yeatia bɛ dahuu.

⁹Ɔluakɛ bɛle atuadelɛma, alanema mɔɔ ɛndie Ɛdɛnkɛma ngilehilelɛ a.

¹⁰Bɛka bɛkile ɛnyelɛzodeɛnwunlɛma kɛ “Bɛmmanwu debie,” na bɛaze Nyamenle kpɔmanvolɛma kɛ, “Bɛmmaka Nyamenle nrɛlaleɛ biala mɔɔ le nɔhalɛ la bɛkile yɛ. Bɛha mɔɔ le menlemenle nee nrɛlaleɛ mɔɔ ɛnle nɔhalɛ la.

¹¹Bɛvi nɔhalɛ adenle ne anu bɛye bɛ nwo, bɛmmamaa yɛte Yizilayɛ Nwuanzanwuanza Ko ne nrɛlaleɛ biala.”

¹²Yemɔti kɛ Yizilayɛ Nwuanzanwuanza Ko ne se la ɛne, “Kɛmɔ bɛkpo me nloa edwɛkɛ ɛhye, na bɛ adwenle wɔ nzisi nee mgbane mgbane ɛyɛlɛ zo, na bɛva bɛ adwenle bɛwula nu la,

¹³ɛtane ɛhye bayɛ kɛ bane mɔɔ hanlɛ la nu na yebuke haanwu yede ɔ nwo wanaanwo na ɔkpondɛ yeagolo yeagua la yeamaa bɛ; ye azegualɛ ne bayɛ arɛlevilɛ nu.

¹⁴Ɔbabubu dwɔkɔdwɔkɔ kɛ buakɛ mɔɔ bɛde ye aze ɛsesebɛ la; bɛnrɛnyia ekyi bɔbɔ wɔ nu mɔɔ bɛfa bɛfa senle a ɔyɛ boɛ, anzɛɛ bɛfa bɛfe angola nu nzule bɔbɔ la.”

¹⁵Awulae Nyamenle, Yizilayɛ Nwuanzanwuanza Ko ne se, “Saa bɛsia bɛ nzi bɛba me ɛkɛ bɛbadie bɛ ɛnwomenle a, bɛkɛlie bɛ. Saa bɛfa bɛ rɛle bɛwula me nu na bɛsie bɛ nwo diinyi a, bɛkɛnyia anwosesebɛ.” Noko bɛnrɛra!

¹⁶Bɛ edwɛkɛ se, “Kyɛkyɛ! Yɛfo mgbɔnwɔ zo yɛahɔ waa.” Yemɔti waa ala yɛɛ bɛbahɔ a. Eza bɛse, “Yɛfo mgbɔnwɔ mɔɔ anwo yɛ ndɛ kpalɛ la azo yeahɔ ndɛndɛ.” Yemɔti bɛ kpɔvolɛma ne noko anwo bayɛ ndɛ.

¹⁷Bɛ nuhua apenle ko yia kpɔvolɛma ko a bɛbagua ɛbɔ nu, na saa kpɔvolɛma nnu nwunlonwunla bɛ a, bɛbanriandi; bɛ bie ɛnrɛha kɛ bɛ fɛlɛnra ne anzɛɛ bɛ sɛkɛlɛneɛ ne mɔɔ bɛkpɔnla ye boka ne azo la ala.

¹⁸Yemɔti Ɛdɛnkɛma ɛlɛkendɛ bɛ aze bɛ anwunvɔne. Yemɔti yeboɔboa ɔ nwo kɛ ɔnwu bɛ anwunvɔne. Nyilalɛ ɛha bɛdabɛ mɔɔ bɛfa bɛ rɛle bɛwula ye nu la.

¹⁹O Zayɔnoma mɔɔ de Gyɛlusalɛm, bɛnrɛzu bieko. Nɔhalɛ, saa bɛsu bɛfɛlɛ ye a, ɔbanwu bɛ anwunvɔne. Saa ɔte bɛ ne a, ɔbalie bɛ zo.

²⁰Awulae ɛlɛmaa bɛali nyane, bɛanwu amaneɛ bɔbɔ ɛdeɛ, bɛ Kilehilevolɛ ne ɛnrɛva ɔ nye ɛnrɛvea bɛ bieko. Bɛ nye banwu Kilehilevolɛ ne.

²¹Bɛbade edwɛkɛ wɔ bɛ nzi kɛ ɔlɛka yeahile bɛ kɛ, “Adenle ne ɛne, bɛlua nuhua” wɔ mekɛ mɔɔ bɛkɛminli bɛkɛva bɛne anzɛɛ fema zo la.

²²Akee bɛbazɛkye bɛ dwɛtɛ fufule nee bɛ ezukoa nvutuke ananze ne mɔ. Bɛbavuandi bɛ bɛagua kɛ bɛle ninyɛne mɔɔ nwolɛ ɛnde a, na bɛaha ye kɛ, “Bɛhɔ.”

²³Akee Ɛdɛnkɛma bamaa ezule adɔ agua bɛ ma mɔɔ bɛlua la azo na bɛ bɛyɔba azo dɔɔnwo. Mekɛ ne anu bɛ nlankɛ bahɔ adidileka mɔɔ le mgbole la anu ahɔdidi.

²⁴Bɛ nlankɛ nyinli nee bɛ asoaso ne mɔ mɔɔ bɛfa bɛso ɛya la banyia ndile mɔɔ bɛva ngyenle bɛfonla ye, na bɛva sofi nee faka bɛkpogya ye kpalɛ la ali.

²⁵Azudenle bazenze awoka mgbole nee ngyikyi zo wɔ mekɛ mɔɔ bɛbahu bɛ kpɔvolɛma ne, bɛabubu bɛ tawa ne mɔ bɛagua la.

²⁶Siane ne ɛdalɛ ne bayɛ kpole kɛ sɛnzɛne ne ɛdalɛ la, yɛɛ sɛnzɛne ne ɛdalɛ bayɛ mɔnwo nsuu kɛ kenle nsuu ɛdalɛ wɔ mekɛ mɔɔ Ɛdɛnkɛma kɛze kɛ ɔyɛ ye menli ne ayile na yeakyekye bɛ nganlɛ ne mɔ mɔɔ yebɔ bɛ la azo la.

²⁷Bɛnlea, Ɛdɛnkɛma anyunlunyia vi moa moa ɛlɛba, yeva ɛya na ɔlua esike kabii mɔɔ ɛdwazo bolonwonwo la anu. Ɛya wɔ ye ɛdendɛlɛ nu, yɛɛ ɔ nloa edwɛkɛ yela kɛ sendɔlɔra.

²⁸Ɔ bonyi nu anwoma le kɛ azuyilɛ mɔɔ li bɛ kɔme nu la. Ɔlɛ ye ɛzɛkyelɛ akegyebɛ ne ɔbahegye maanle maanle ne mɔ, na yeava nyɛma yeasosɔ bɛ nloa yeaminli bɛ.

²⁹Bɛbado edwɛne, kɛmɔ bɛto ye nɔɔzo wɔ ɛvoyialilɛ nwuanzanwuanza nu la, na bɛali fɛlɛko kɛ mekɛ mɔɔ bɛlɛ anyelielɛ bɛli fulutubɔlɛ nzi bɛlɛkɔ Ɛdɛnkɛma, Yizilayɛ Bodane ne ɛkɛ ne la.

³⁰Ɛdɛnkɛma bamaa bɛade ɔ ne ɛzulolɛ ne na bɛanwu ye tumi kpole ne wɔ ɛyavalɛ kpole nee sendɔlɔra kpole nu, ahumu nee ezuawolɛ ɛdɔlɛ nu.

³¹Saa Aseleama te Ɛdɛnkɛma ane na ɔfa ye baka ne ɔbɔ bɛ avinli a bɛ ahonle badu.

³²Mɔɔ Ɛdɛnkɛma ɛlɛfa ye ndeanlɛ baka ne abɔ Aseleama la ɛnee ye menli ne lɛ akɛya nee getaa ɛlɛdielie zolɛ. Nyamenle ɔdaye ɔbava tumi kpole yeaho yeamaa ye menli ne.

³³Bɛziezie ɛleka wɔ ɛkɛ ne dɛbadɛba mɔɔ bɛbava bɛayela Aselea belemgbunli ne a. Nuhua le kuma, ɔtɛlɛ, yɛɛ bɛziezie ɛyɛne dɔɔnwo wɔ nuhua. Ɛdɛnkɛma bava ye ɛnwomenle ne mɔɔ sɔ kɛ sɔlefe la yeamaa yeazɔ.