Read Nzema Aye 31 Bible Online

Aye 31 - Nzema bible

Aye 31

¹Munzule ɛha bɛdabɛ mɔɔ bɛkɔ Yigyibiti kɛ bɛkabiza moalɛ, na bɛva bɛ rɛle bɛdo mgbɔnwɔ nwo zo la. Munzule ɛha bɛ kɛ bɛva bɛ rɛle bɛdo konle ehwili dɔɔnwo nee mgbɔnwɔ kavolɛma mɔɔ anwo yɛ se la anwo zo na bɛnnea Yizilayɛ Nwuanzanwuanza Ko ne anzɛɛ bɛmbiza Ɛdɛnkɛma la!

²Nyamenle ze nrɛlɛbɛ, ɔka a ɔndwe ɔnzia, yɛɛ ɔ nloa edwɛkɛ nee amaneɛ lua. Ɔbadwazo yeatia amumuyɛma nee bɛdabɛ mɔɔ bɛdi bɛboa menli mɔɔ di ɛtane la.

³Yigyibitima le menli, bɛnle Nyamenle. Bɛ mgbɔnwɔ ne mɔ lɛ nwonane, bɛnle sunsum. Saa Ɛdɛnkɛma tenrɛ ɔ sa a, boavolɛ ne nee mɔɔ bɛboa ye la amuala badu agua, na bɛ muala bɛ bo zo baminli.

⁴Ɔluakɛ Ɛdɛnkɛma zele me kɛ, “Kɛmɔ awenade, saa ɔle ekyi bɔbɔ na ɔkye nane na ɔlɛdi a, mboaneneavolɛma ekpunli ɛdeɛdeanlɛ ɛmkputi ye ahonle la, zɔhane ala yɛɛ medame Tumivolɛ Ɛdɛnkɛma mebaraho wɔ Zayɔn Boka nee ye awoka ngyikyi ne mɔ azo a.

⁵Medame Tumivolɛ Ɛdɛnkɛma, mebayɛ kɛ anloma mɔɔ ɛdu faa la na meazinza Gyɛlusalɛm. Mebazinza ye meaho mealie ye. Mebanwu ye anwunvɔne na mealie ye.”

⁶O Yizilayɛma, bɛzia bɛhɔ ahenle ne mɔɔ bɛde ɔ nwo atua la ɛkɛ.

⁷Ɔluakɛ mekɛ ne anu awie biala bavuandi ye dwɛtɛ fufule nee ye ezukoa nvutuke mmonle ananze ne mɔ mɔɔ bɛdabɛ bɛyɛ na ɔlua zolɛ bɛyɛ ɛtane la agua.

⁸Aseleama badɔ dadeɛ mɔɔ tɛ sonla a to la anloa, na dadeɛ mɔɔ sonla ɛnlɛ nu la baha bɛ senle dwɛɛ. Bɛbanriandi dadeɛ ne, na bɛ mgbavolɛ ne mɔ bayɛ mialera nu gyima.

⁹Bɛ bodane ne mɔɔ gyi bɛ nzi, belemgbunli ne bava ɛzulolɛ anriandi, yɛɛ ye safohyenlema ne mɔ anye zo bada bɛ na bɛanriandi bɛagyakyi bɛ konle fɛlɛnra ne mɔ. Kɛ Ɛdɛnkɛma, mɔɔ ye senle wɔ Zayɔn, na ye fonlomo wɔ Gyɛlusalɛm la, se la ɛne.