Read Nzema Aye 32 Bible Online

Aye 32 - Nzema bible

Aye 32

¹Bɛnlea, belemgbunli bie bara mɔɔ ɔbava tenleneyɛlɛ a yeabu ye maanle a, yɛɛ maanle mgbanyima bava pɛlepɛlelilɛ abu bɛ amaamuo.

²Bɛ nuhua ko biala bayɛ kɛ ɛvealeka, bodane bɔne mɔɔ bɛfea nu wɔ anwoma anzɛɛ ahumudulɛ kpole nu la. Bɛbayɛ kɛ azudenle wɔ ɛleka mɔɔ le resee, bodane kpole bie alubo wɔ azɛlɛ mɔɔ mbaka ɛnle zo la azo.

³Akee menli mɔɔ anye nwu debie la anye zo bade kpalɛ, yɛɛ bɛdabɛ mɔɔ bɛ nzo te edwɛkɛ la badie.

⁴Mɔɔ pele ndɛndɛ bua edwɛkɛ la babua ndɛne kpalɛ, yɛɛ mɔɔ yi bɛlɛbɛlɛ la badendɛ kolokolo.

⁵Bɛnrɛvɛlɛ koasea kɛ ɔle sonla mɔɔ di ɔ nwo eni, yɛɛ bɛnrɛze twondwolondwo kɛ ɔfɛta enililɛ.

⁶Ɔluakɛ koasea tendɛ ngoasea nu, yɛɛ ye adwenle le ɛtane; ɔsukoa ɔdi ɛtane, ɔka Ɛdɛnkɛma anwo edwɛkɛ ɛtane ɛtane, ɔmmaa mɔɔ ɛhɔne ɛlɛku ye la aleɛ yɛɛ ɔmmaa mɔɔ nzuhɔne ɛlɛku ye la nzule ɔnno.

⁷Sonla mɔɔ le twondwolondwo la koaseayɛlɛ le munzule; ɔfa amumuyɛ adwenle kɛ ɔfa adalɛ yeazɛkye ehyianvolɛma, saa bɛ edwɛkɛ yɛ fɛ bɔbɔ a, ɔnvane ɔ nwo.

⁸Na sonla mɔɔ di ɔ nwo eni la dwenle ninyɛne kpalɛ nwo na ɔdi ninyɛne kpalɛ nzi.

⁹Bɛmɛ mraalɛ mɔɔ bɛ nwo ɛdɔ bɛ, bɛdwazo bɛdie me ne. Bɛmɛ mralɛ mraalɛ mɔɔ bɛ sa ɛdɔ bɛ kunlu, bɛdie mɔɔ melɛka la.

¹⁰Megye bɛ ɛvolɛ ko nee ekyi. Ɛzulolɛ baha bɛ, bɛmɛ mraalɛ mɔɔ bɛ nye sɔ bɛ nwo, bɛnlea, vanye ɛnrɛzo ma kpalɛ biala la ati, nwanyeyɛlɛ melahyinli ne ɛnrɛyɛ gyima.

¹¹Bɛmɛ mraalɛ mɔɔ bɛ nwo ɛdɔ bɛ, bɛ nwo bawozo bɛ. Bɛmɛ mraalɛ mɔɔ bɛ sa ɛdɔ bɛ kunlu, ɛzulolɛ baha bɛ. Bɛkpa bɛgua na bɛheda ɛrele.

¹²Bɛpɛ bɛ kunlu adɛka bɛli nyane bɛmaa bɛ azɛlɛ kɛnlɛma ne, bɛ vanye mbaka ne mɔ mɔɔ so kɛ debie la,

¹³ɔluakɛ me menli ne azɛlɛ ne azo ɛfifi mbowule nee mbowunyɛma. Bɛzu bɛmaa awuke ne mɔ mɔɔ anyelielɛ wɔ nu, nee suakpole ne mɔɔ zolɛ yɛ fɛ la.

¹⁴Ɔluakɛ menli gbudugbudu ɛhye bakpo suakpole ne, ye belemgbunli sua nu badɔ mgbane; ye awoka nee ye tawa ne mɔ mɔɔ bɛgyinla zo bɛsinza la bayɛ awenade alaleɛ dahuu, ɔbayɛ anyelielɛ ɛleka yeamaa ɛbɔ nu asoaso, na yeayɛ nyɛmoa adidileka;

¹⁵kɔkpula kɛ Nyamenle kɛwola ye Sunsum ne kɛgua yɛ nwo zo, na azɛlɛ ne mɔɔ ɛhwee ɛnle zolɛ la kɛyɛ azɛlɛ kpalɛ mɔɔ kye aleɛ na azɛlɛ mɔɔ kye aleɛ la kɛyɛ kpɔkɛmile la.

¹⁶Akee pɛlepɛlelilɛ nee tenleneyɛlɛ bara azɛlɛ ne azo ɛleka biala.

¹⁷Ɔlua tenleneyɛlɛ ne azo, anzonudwolɛ bara; tenleneyɛlɛ ne bava anzonudwolɛ nee anwondɔlɛ ara dahuu.

¹⁸Me menli ne badɛnla anzonudwolɛ nu, wɔ awuke mɔɔ nuhua le diinyi la anu, na bɛ nwo adɔ bɛ.

¹⁹(Saa bɛso kpɔkɛ ne bɔbɔ a, ezuawolɛ badɔ kpole, na suakpole ne azo ayɛ alɔbɔlɛ.)

²⁰Nyilalɛ ɛha bɛdabɛ mɔɔ bɛdua bɛ ma wɔ azule nloa na bɛmaa bɛ nlankɛ nee bɛ asoaso didi ɛkɛ ne la.