Read Nzema Aye 33 Bible Online

Aye 33 - Nzema bible

Aye 33

¹Munzule ɛha bɛ, bɛmɛ sɛkyevolɛma mɔɔ bɛtɛsɛkyele bɛmɛ a; bɛmɛ ngunzima, mɔɔ bɛtɛyɛle bɛmɛ bɛ nwo ngunzi a! Saa bɛwie bɛ ɛzɛkyelɛ ɛbɛla ne mɔ bɔ a, bɛbazɛkye bɛdabɛ noko; yɛɛ saa bɛwie bɛ ngunzi nyɛleɛ ne mɔ yɛ a, bɛ nee bɛ bali ye ngunzi nu.

²O Ɛdɛnkɛma, nwu yɛ anwunvɔne; yɛlɛkendɛ wɔ. Die yɛ ti alehyenlɛ biala, saa ngyegyelɛ to yɛ a die yɛ.

³Ɛtendɛ na ɛ ne dielie a, menli gua ɛbɔ nu; ɛmaa ɛ nwo zo a, maanle maanle bɔ asande,

⁴na menli wuluwulu maanle maanle ne mɔ anu kɛ abɛbɛ, na bɛfe zolɛ ninyɛne kɔsɔɔti kɛ nyangomango di nya la.

⁵Ɛdɛnkɛma le bedevinli, ɔde anwuma lɔ; ɔbava pɛlepɛlelilɛ nee tenleneyɛlɛ yeayi Zayɔn,

⁶na yeamaa maanle ne agyinla bɛ mekɛ zo, na bɛanyia ngoanelielɛ molozo, nrɛlɛbɛ nee adwenle. Ye anwonyia a le Ɛdɛnkɛma ɛzulolɛ.

⁷Bɛnlea, bɛ katakyiema ɛlɛsu; bɛ anzonudwolɛ ɛbɔfoɔma ne ɛlɛsu alɔbɔlɛ ɛzunlɛ.

⁸Ademgbole ne mɔ azo ɛyɛ kɛnlanana, adendulɛma mɔɔ fa zolɛ la ɛgyakyi adenle ɛdulɛ. Bɛtulu ngyekyeleɛ ne mɔ, daselɛlilɛ nwo ɛnlɛ nvasoɛ, bɛmbu sonla biala.

⁹Azɛlɛ ne ɛdɔ mgbane, awie ɛnle zolɛ; Lɛbanɔn mbaka ɛgyengye. Hyɛlɔn mbɔnza azɛlɛ ngɛnlɛma ne mɔ ɛhakyi ɛsɛlɛ, yɛɛ mbaka mɔɔ wɔ Beehyan nee Kamɛle Boka la nya ɛwie kpolo gua.

¹⁰Ɛdɛnkɛma se, “Akee mebadwazo; kɛkala akee mebamaa me nwo zo; akee mebahile me tumi ne.

¹¹Bɛnrenzɛ abonle, bɛwo ewula; bɛdabɛ bɛ ɛnwomenle le senle mɔɔ bayela bɛ ahu bɛ a.

¹²Na menli ne kɔsɔɔti bayela, bɛ mbowule ayɛ nwohyee kɛ kalo. Bɛbayɛ kɛ mbowule mɔɔ bɛpɛ bɛgua senle nu la; bɛbayela bɛadɔ nzonle.

¹³Bɛdabɛ mɔɔ bɛwɔ moa nee bɛdabɛ mɔɔ bɛbikye la, bɛdie mɔɔ meyɛ la na bɛlie me tumi ne bɛdo nu.”

¹⁴Ɛtanevolɛma mɔɔ wɔ Zayɔn la ahonle ɛdu, ɛzulolɛ kpole ɛha bɛdabɛ mɔɔ bɛnze Nyamenle la, bɛ nwo ɛlɛwozo bɛ. Bɛse, “Nwane bɔbɔ yɛɛ wɔ yɛ avinli mɔɔ kɛhola senle gbolamgbolam nu tɛnla a? Nwane a wɔ yɛ avinli mɔɔ kɛhola senle mɔɔ ɛnnu ɛlɛ la anu tɛnla a?”

¹⁵Sonla ne mɔɔ dua tenlene adenle nu na ɔtendɛ fɔɔnwo, mɔɔ kpo nzisima nvasoɛ, ɔkpɔlɔkpɔla ɔ sa anwo wɔ ndoloboalielɛ nwo, ɔtuodua ɔ nzo wɔ kɔdiawu ɛbɛla nwo, na ɔmuomua ɔ nye wɔ ɛtaneyɛlɛ nwo la,

¹⁶yemɔ yɛɛ ɔbadɛnla anwuma anwuma na yeava awolɛ mgbole yeayɛ aranemgbole yeabɔ ɔ nwo bane a. Ɔbanyia aleɛ yeali na yeanyia nzule yeanlo dahuu.

¹⁷Eza bɛbanwu kɛ belemgbunli ne de ye ebia nu na bɛanwu kɛ ɔsie azɛlɛ mɔɔ tɛlɛ kɔ moa la.

¹⁸Ɛzulolɛ bamaa bɛabizebiza bɛ ngome bɛ nwo wɔ kpɔvolɛ ne anwo kɛ, “Abɔlɔba ne mɔɔ tia menli, dielie adwule la wɔ nienwu? Sonla ne mɔɔ tia tawa ne mɔ la wɔ nienwu?”

¹⁹Bɛnrɛnwu menli adubɛnwoma ɛhye mɔ mɔɔ bɛ ɛdendɛlɛ le basabasa na bɛnde ɔ bo, na eza bɛyi bɛlɛbɛlɛ la bieko.

²⁰Bɛdo bɛ nye bɛnlea Zayɔn, ɛleka ne mɔɔ yɛdi yɛ nyamenlezonlenlɛ ɛvoyia ne mɔ la! Bɛ nye banwu Gyɛlusalɛm kɛ menli ne de ye anzonudwolɛ nu wɔ ndanlɛ azua mɔɔ bɛndudu la anu. Ndanlɛ azua zɔhane mɔ biala adakola ɛnrɛdu yɛɛ bie nyɛma ɛnrɛde.

²¹Ɛkɛ ne yɛɛ Ɛdɛnkɛma badɛnla ye anyunlunyia nu yeamaa yɛ a. Ɔle ɛleka mɔɔ azule mgbole mɔɔ tɛlɛ nee azudenle wɔ a, noko ɛlɛne biala anzɛɛ meli biala ɛngola ɛngɔ ɛkɛ.

²²Ɔluakɛ Ɛdɛnkɛma a le yɛ ndɛnebuavolɛ a, Ɛdɛnkɛma a sie yɛ a, Ɛdɛnkɛma a le yɛ belemgbunli a; ɔbalie yɛ ngoane.

²³Bɛ ɛlɛne ne mɔ ɛtuto, bɛngola avela baka ne sɔ bɛmmaa ɔngyinla kpundii anzɛɛ ɔndɛlɛ avela ne mɔ anu. Akee bɛbahyɛ ninyɛne dɔɔnwo ne mɔɔ bɛnyia la bɛamaa abuburama bɔbɔ anyia bɛ afoa nu ɛdeɛ.

²⁴Na awie biala mɔɔ wɔ sua ne azo la ɛnrɛha kɛ, “Me nwo ɛdo me.” Bɛbava awie biala mɔɔ wɔ sua ne azo la ɛtane bɛahyɛ ye.