Read Nzema Aye 34 Bible Online

Aye 34 - Nzema bible

Aye 34

¹Maanle maanle kɔsɔɔti, bɛhwe bɛbikye na bɛdie! Bɛmaa azɛlɛ ye nee debie biala mɔɔ wɔ zo, ewiade nee debie biala mɔɔ wɔ nu la ɛyɛ ɛnzonlɛ ɛdie.

²Ɔluakɛ Ɛdɛnkɛma ɛva maanle maanle ne mɔ kɔsɔɔti anwo ɛya, na ye ahonle ɛfutu kpole wɔ bɛ ɛlɔnema anwo; yemaa munzule ɛdo bɛ, yeye bɛ yemaa kɛ bɛhu bɛ.

³Bɛbavuandi bɛ menli mɔɔ bɛhu bɛ la bɛagua, bɛnrɛzie bɛ; bɛ mogya bazonyi awoka ne mɔ azo na bɛ avunli ne mɔ abɔ nvoanvoa.

⁴ Anwumaneamra kɔsɔɔti bawodo na bɛabobɔ anwomanyunlu kɛ nwoma la. Bɛ muala bɛbakpolo bɛagua kɛ vanye baka anzɛɛ feege baka nya mɔɔ ɛlɛkpolo agua la.

⁵ Ɛdɛnkɛma se ye dadeɛ ne ɛwie da wɔ anwumaneamra avinli, na nea, akee ɔlɛdwu yearadea Yidɔmma mɔɔ yeye bɛ yemaa kɛ bɛzɛkye bɛ la. Oba 1-14; Mal 1.2-5

⁶Ɛdɛnkɛma lɛ konle dadeɛ; mogya ɛbia ye takaa kɛ mboane nee mbɔnkye mogya, yɛɛ ɛnlome ɛyɛ nwolɛ sofuaa kɛ boane nyinli kelenzia nwo ɛnlome. Ɔluakɛ Ɛdɛnkɛma lɛ azubɔlɛ wɔ Bɔzela, na ɔbahu menli dɔɔnwo wɔ Yidɔm azɛlɛ zo.

⁷Menli nee nlankɛ nyinli mgbole nee ndonrandonra badɔ. Bɛ azɛlɛ ne azo bayɛ mogya ngome na bɛ ɛnlome ayɛ anwea ne tɔfɔtɔfɔ.

⁸Ɛdɛnkɛma lɛ ye nzenralɛlilɛ mekɛ mɔɔ ɔbava yealie Zayɔn ati a.

⁹Azule mɔɔ wɔ Yidɔm la amuala bahakyi bilewu na ye azɛlɛ ne ayɛ kɛ belesetɔn. Azɛlɛ ne balɔ kɛ bilewu mɔɔ senle la nu la.

¹⁰ Ye esike ne badwazo bolonwonwo dahuu, yɛɛ bɛnrɛhola ye nua alehyenlɛ nee aledwolɛ kɔsɔɔti. Azɛlɛ ne badɔ mgbane, ɔvi awolɛndoazo kɔdwu awolɛndoazo. Awie ɛnrɛpɛ nu ɛkɛ ne ɛlɛ.

¹¹Kyɛnyema nee fuke bava ɛkɛ ne ayɛ bɛ ɛdeɛ, yɛɛ kpadule nee kɔkɔsɛlɛ badɛnla ɛkɛ ne bie. Ɔbamaa menli mɔɔ wɔ maanle ne anu la anye zo ada bɛ na ye mgbanyima abɔ atondo.

¹²Bɛbavɛlɛ ye “Maanle mɔɔ belemgbunlililɛ ɛnle ɛkɛ,” yɛɛ ye mgbanyima bayɛ mgbane.

¹³Mbowule bafifi ye aranemgbole ne mɔ anu, yɛɛ bɛ azuamgbole mɔɔ bɛhye nwolɛ ɛhane la azo bafifi mbowule ndile. Ɛzonlɛ barakpɔsa ɛkɛ yɛɛ soholo bava ɛkɛ ayɛ bɛ tɛnlabelɛ.

¹⁴Nanemgbole nee bedi bayia ɛkɛ, mɛnlamenlakɛ bavɛlɛvɛlɛ bɛ gɔnwo mɔ yɛɛ aledwolɛ nu bayivolɛma baralie bɛ ɛnwomenle ɛkɛ.

¹⁵Ɛkɛ ne a kpadule bayɛ ye sane, ado, abobɔ na yeali ɔ mra ne mɔ adane a. Ɛhɛe, ɛkɛ ne a sanzia baradɛnlɛdɛnla ye nyinli nee belɛ a.

¹⁶Bɛnleɛnlea Ɛdɛnkɛma buluku ne anu na bɛkpondɛ ye kpalɛ. Ɛhye mɔ anu ko ɛnrɛminli; biala bahɔ ye nyinli nee belɛ. Ɔluakɛ Ɛdɛnkɛma ɛha ɛdo gua na ye Sunsum ne ɛboɔboa bɛ nloa ɛwie.

¹⁷Ɛdɛnkɛma ɔdaye a yegua bɛ ti nzeleba yeye bɛ a. Yehyɛ azɛlɛ ne yemaa bɛ na yegya biala ɛweɛne. Bɛbava bɛayɛ bɛ ɛdeɛ dahuu, na bɛbadɛnla ɛkɛ ne ɔvi awolɛndoazo kɔdwu awolɛndoazo.