Read Nzema Aye 35 Bible Online

Aye 35 - Nzema bible

Aye 35

¹Ɛsɛlɛ nee azɛlɛ resee bali fɛlɛko, fienemgbole anye balie, zolɛ abɔ ndotolo;

²zolɛ bawula kpole kɛ ndotolo baka, na yeava anyelielɛ yeado edwɛne. Zolɛ kɛnlɛma bayɛ kɛ Lɛbanɔn Awoka zo, ye azɛlɛ bahye aleɛ kɛ Kamɛle Boka nee Hyɛlɔn azɛlɛ. Bɛbanwu Ɛdɛnkɛma anyunlunyia ne nee yɛ Nyamenle ne bedevinliyɛlɛ ne.

³ Bɛmaa mɔɔ asa anu ɛtuto la anwosesebɛ, na bɛmaa mɔɔ agyakɛ anzi ɛtuto la ɛgyinla kpundii.

⁴Bɛha bɛhile bɛdabɛ mɔɔ bɛle avoanvoanle la kɛ, “Bɛmaa bɛ nwo ɛyɛ se, bɛmmasulo! Bɛnlea, bɛ Nyamenle ne bara arali bɛ ti nzenralɛ. Nyamenle bara aralie bɛ ti. Ɔbara yearalie bɛ ngoane.”

⁵ Anyenzinlirama anye badukue, anzondilirama anzo badukue.

⁶Abuburama bawuluwulu kɛ ahɛtɛboɛ, yɛɛ mumulema bava anyelielɛ ado edwɛne. Ɔluakɛ azule bavinde fienemgbole ne mɔ anu, yɛɛ azudenle baze ɛsɛlɛ zo.

⁷Ɛnwea wuluwulu ne bahakyi azule bula, na nzubula bavinde azɛlɛ resee zo. Ɛzonlɛ ne mɔ alaleɛ bahakyi azia, ndile nee ndɔ bafifi ɛkɛ.

⁸Bɛbakpakye ademgbole bɛado ɛkɛ, bɛbavɛlɛ ye “Nwuanzanwuanza Adenle.” Sonla mɔɔ anwo ɛnde la ɛnrɛva zolɛ, yɛɛ ahoasea ɛnrɛhola menli mɔɔ fa ɛkɛ la koasea yɛ.

⁹Awenade ɛnrɛhɔ ɛkɛ, yɛɛ nane biala mɔɔ di nane la ɛnrɛhɔ ɛkɛ. Awie ɛnrɛnwu bie bɔbɔ wɔ ɛkɛ, na bɛdabɛ mɔɔ bɛlie bɛ ngoane la baze ɛkɛ.

¹⁰Bɛdabɛ mɔɔ Ɛdɛnkɛma ɛkpɔne bɛ la bava edwɛndolɛ azia ara Gyɛlusalɛm. Bɛbali fɛlɛko mɔɔ ɛnlɛ awieleɛ; bɛ nye balie, bɛali fɛlɛko, na nyane nee alɔbɔlɛ baminliminli.